શ્રીનગર : જમ્મુ અને કાશ્મીરના રાજકારણમાં હાલમાં ગરમાવો જોવા મળી રહ્યો છે. ભાજપ દ્વારા ૧૦૦ કરોડ રૂપિયાની માનહાનિની કાનૂની નોટિસ મોકલ્યા બાદ મુખ્યમંત્રી ઓમર અબ્દુલ્લાએ તેના પર કટાક્ષભરી શૈલીમાં પ્રતિક્રિયા આપી છે. અબ્દુલ્લાએ આ નોટિસને "પ્રેમ પત્ર" (Love Letter) ગણાવીને ભાજપ પર શાબ્દિક પ્રહારો કર્યા હતા. તેમણે દાવો કર્યો કે ભાજપ રાજકીય લડાઈ મેદાનમાં લડવાને બદલે કોર્ટના સહારે લડવા માંગે છે, જે તેમની નબળાઈ દર્શાવે છે.

શું છે સમગ્ર વિવાદ?

તાજેતરમાં ઓમર અબ્દુલ્લાએ ગંભીર આરોપ લગાવ્યો હતો કે ભાજપ દ્વારા જમ્મુ ક્ષેત્રના નેશનલ કોન્ફરન્સના ધારાસભ્યોને તોડવાનો પ્રયાસ કરવામાં આવી રહ્યો છે. તેમણે દાવો કર્યો હતો કે એક ધારાસભ્યે તેમને જણાવ્યું હતું કે ભાજપના એક પદાધિકારીએ તેમને પક્ષ પલટો કરવા બદલ રૂ. ૨૦ થી ૩૦ કરોડની રોકડ, મંત્રાલયનું પદ અને રાજ્યનો દરજ્જો આપવાની ઓફર કરી હતી. આ નિવેદન બાદ ભાજપે આક્રમક વલણ અપનાવીને અબ્દુલ્લાને માનહાનિની નોટિસ ફટકારી છે, જેમાં સાત દિવસની અંદર બિનશરતી જાહેર માફી માંગવાની અને આરોપો પાછા ખેંચવાની માંગ કરવામાં આવી છે. અન્યથા ૧૦૦ કરોડ રૂપિયાના માનહાનિના દાવાની ચેતવણી આપવામાં આવી છે.

"હું એવી શક્તિ છું જેને તમે અવગણી શકતા નથી"

નોટિસના જવાબમાં ઓમર અબ્દુલ્લાએ મક્કમતાથી કહ્યું કે, "મને કોઈ સમન્સ મળ્યું નથી, માત્ર વકીલનો પત્ર મળ્યો છે. હું આને મારું સૌભાગ્ય અને સન્માન માનું છું કારણ કે જમ્મુ-કાશ્મીરમાં હું એકમાત્ર એવો રાજકારણી છું જેને ભાજપ તરફથી આવો 'પ્રેમ પત્ર' મળ્યો છે." તેમણે ભાજપને આડેહાથ લેતા કહ્યું કે, ભાજપ જાણે છે કે તેઓ એક એવી રાજકીય શક્તિ છે જેને અવગણી શકાય તેમ નથી. અબ્દુલ્લાએ વધુમાં ઉમેર્યું કે, "ભાજપ જે રીતે લડાઈ લડી રહ્યું છે તે આશ્ચર્યજનક છે. તેઓ રાજકીય રીતે સામનો કરવાને બદલે કોર્ટની પાછળ છુપાઈ રહ્યા છે."

રાજકારણમાં વધ્યો તણાવ

ભાજપે પોતાની નોટિસમાં અબ્દુલ્લાના આરોપોને પાયાવિહોણા, દ્વેષપૂર્ણ અને બદનક્ષીભર્યા ગણાવ્યા છે. ભાજપના મતે આ આરોપોથી તેમની પ્રતિષ્ઠાને ભારે નુકસાન પહોંચ્યું છે. હવે આ સમગ્ર વિવાદ કાનૂની લડાઈ તરફ વળી રહ્યો છે, ત્યારે જોવું રહ્યું કે ઓમર અબ્દુલ્લા આ નોટિસના જવાબમાં શું પગલાં લે છે. આ ઘટનાએ જમ્મુ-કાશ્મીરની રાજકીય સ્થિરતા અને સત્તાધારી તથા વિરોધ પક્ષ વચ્ચેના સંબંધોને ફરીથી ચર્ચાના કેન્દ્રમાં મૂકી દીધા છે.