તેહરાન ; પશ્ચિમ એશિયા (મિડલ ઈસ્ટ) માં લાંબા સમયથી ચાલી રહેલો તણાવ હવે સત્તાવાર રીતે એક ભયાનક મહાયુદ્ધમાં ફેરવાઈ ગયો છે. અમેરિકા દ્વારા કરવામાં આવેલા લશ્કરી હુમલાનો અત્યંત આકરો અને સીધો બદલો લેતા ઈરાનની સર્વોચ્ચ સૈન્ય પાંખ 'ઇસ્લામિક રિવોલ્યુશનરી ગાર્ડ કોર્પ્સ' (IRGC) એ જોર્ડનમાં આવેલા અમેરિકાના અત્યંત મહત્વના ગણાતા 'પ્રિન્સ હસન એર બેઝ' પર ઉપરાઉપરી મિસાઈલ અને ડ્રોન વડે ભયાનક બોમ્બમારો કર્યો છે. આ પ્રચંડ હુમલામાં અમેરિકી સૈન્યના ઈંધણ ડેપો અને દારૂગોળાના વિશાળ ભંડારોમાં ભીષણ આગ લાગી ગઈ છે, જેના ધુમાડાના ગોટેગોટા માઈલો દૂરથી જોઈ શકાય છે.
અમેરિકાની સૈન્ય ક્ષમતા પર મોટો પ્રહાર
ઈરાનના સૈન્ય કમાન્ડ (IRGC) એ એક સત્તાવાર નિવેદન જાહેર કરીને આ ચોક્કસ બદલાની કાર્યવાહીની જવાબદારી સ્વીકારી છે. ઈરાનનો દાવો છે કે આ સચોટ હુમલાના કારણે પ્રિન્સ હસન એર બેઝ પર અમેરિકાની લોજિસ્ટિકલ (સામગ્રી પુરવઠો) ક્ષમતાઓ અને યુદ્ધ માટેની ઓપરેશનલ તૈયારીઓને અત્યાર સુધીનો સૌથી મોટો અને ઘાતક ફટકો પડ્યો છે. અમેરિકી સેનાના અતિ મહત્વના સંસાધનો આ હુમલામાં બળીને ખાખ થઈ ગયા છે.
કુવૈત અને બહેરીન પણ ધ્રુજ્યા: ચારેય તરફ મિસાઈલ વર્ષા
ઈરાન આટલેથી જ અટક્યું નથી. જોર્ડનની સાથે-સાથે તેણે આખા પ્રદેશમાં ફેલાયેલા અમેરિકી સૈન્ય માળખાને નિશાન બનાવવાનું શરૂ કર્યું છે. ઈરાન દ્વારા કુવૈત અને બહેરીનમાં આવેલા યુએસ આર્મી સાથે સંકળાયેલા વિવિધ સૈન્ય મથકો અને રડાર સિસ્ટમ્સ પર પણ એકસાથે ઘાતક મિસાઇલો અને આત્મઘાતી ડ્રોન વડે હુમલા કરવામાં આવ્યા છે.
પશ્ચિમ એશિયામાં અમેરિકા અને ઈરાન હવે આમને-સામને આવી જતાં સમગ્ર વિશ્વમાં ભારે ગભરાટ ફેલાયો છે. આ હુમલા બાદ અમેરિકા ઈરાન પર કેવો વળતો પ્રહાર કરે છે, તેના પર આખી દુનિયાની નજર ટકેલી છે.