ટોકિયો:વિશ્વભરમાં વેબસાઇટોની સુરક્ષાને જોખમમાં મૂકતી પી.એચ.પી. સોફ્ટવેરની ગંભીર ખામીઓ સામે જાપાન સરકારે કૃત્રિમ બુદ્ધિ - એઆઈ આધારિત વિશેષ સુરક્ષા કવાયત હાથ ધરવાનો નિર્ણય કર્યો છે. સરકાર એક વિશેષ ટીમ બનાવશે, જે કમ્પ્યુટર વ્યવસ્થાઓ ઉપર નકલી સાયબર હુમલા કરીને તેમની નબળાઈઓ શોધશે.

જાપાનના ઉદ્યોગમંત્રી ર્યોસેઈ અકાઝાવાએ જણાવ્યું કે સાયબર હુમલાખોરને સફળ થવા માત્ર એક નબળો રસ્તો પૂરતો છે. તેથી સુરક્ષા સંસ્થાઓએ પણ કૃત્રિમ બુદ્ધિનો ઉપયોગ કરીને હુમલાખોરો કરતાં એક ડગલું આગળ રહેવું જરૂરી છે.

દરમિયાન, જાપાનની મોટી મોબાઇલ કંપની સોફ્ટબેન્કે સુરક્ષા સુધારકામ દરમિયાન પોતાની મોબાઇલ આપત્તિ ચેતવણી સેવા અસ્થાયી બંધ રાખવાની જાહેરાત કરી છે. તેના કારણે સંબંધિત ગ્રાહકોને આ સેવા મારફતે ભૂકંપ, સુનામી અને સ્થળાંતરની આગોતરી ચેતવણીઓ નહીં મળે. જોકે વૈકલ્પિક એપ્લિકેશન મારફતે ચેતવણી મેળવવાની વ્યવસ્થા ઉપલબ્ધ છે.

જાપાનની નાણાકીય સંસ્થાઓ, રેલવે, વિમાન કંપનીઓ તથા સરકારી વિભાગોની કેટલીક ઓનલાઇન સેવાઓ પણ સાવચેતીરૂપે સ્થગિત કરાઈ હતી. ઇસ્ટ જાપાન રેલવેએ કેટલીક સેવાઓ પુનઃ શરૂ કરી છે. સોફ્ટવેર નિર્માતાઓએ સુરક્ષા સુધારા જાહેર કરી તાત્કાલિક અપડેટ કરવાની અપીલ કરી છે