સાન ફ્રાન્સિસ્કો : આજ સુધી કોઈ પણ ટેકનોલોજી કે સોફ્ટવેર સંબંધિત સ્ટાર્ટઅપ શરૂ કરવા માટે કોડિંગ, એન્જિનિયરિંગ કે સોફ્ટવેર ડેવલપમેન્ટનું જ્ઞાન હોવું અનિવાર્ય માનવામાં આવતું હતું. પરંતુ OpenAI ના સીઈઓ સેમ ઓલ્ટમેનના મતે હવે એ દિવસો ભૂતકાળ બની ગયા છે. તેમણે એક તાજેતરના ઈન્ટરવ્યુમાં જણાવ્યું છે કે આર્ટિફિશિયલ ઈન્ટેલિજન્સ (AI) ના યુગમાં હવે કોઈ વિચારને સફળ બિઝનેસમાં બદલવા માટે કોડિંગ આવડવું જરૂરી નથી. જો તમારી પાસે ગ્રાહકોની જરૂરિયાતો અને માર્કેટની સચોટ સમજ હોય, તો તમે ટેકનિકલ બેકગ્રાઉન્ડ વિના પણ સફળ સ્થાપક બની શકો છો.

ઓલ્ટમેને જણાવ્યું હતું કે ભૂતકાળમાં જે લોકો પાસે માત્ર ઉત્તમ આઇડિયા હતા પણ કોડિંગનું જ્ઞાન નહોતું, તેમની સિલિકોન વેલીમાં મજાક ઉડાવવામાં આવતી હતી. પરંતુ હવે પરિસ્થિતિ તદ્દન બદલાઈ ગઈ છે. આર્ટિફિશિયલ ઈન્ટેલિજન્સના અત્યાધુનિક ટૂલ્સ હવે ડેવલપમેન્ટ અને કોડિંગનું તમામ ભારે કામ જાતે જ સંભાળી લે છે. "હવે અચાનક એવા લોકોનો બદલો (Revenge of Idea Guys) શરૂ થયો છે. જો સ્થાપક પાસે તેના ગ્રાહકો અને માર્કેટની તીક્ષ્ણ સમજ હોય, તો તેઓ માત્ર એકલા જ આખું પ્રોડક્ટ બનાવીને માર્કેટમાં ઉતારી શકે છે."

માત્ર 'એક વ્યક્તિ' દ્વારા સંચાલિત અબજોની કંપનીઓ શક્ય બનશે

ઓલ્ટમેનના જણાવ્યા અનુસાર, AI ટેકનોલોજીના કારણે ભવિષ્યમાં ખૂબ જ નાની ટીમ અથવા તો માત્ર એક જ વ્યક્તિ દ્વારા સંચાલિત બહુરાષ્ટ્રીય કંપનીઓ જોવા મળશે. કસ્ટમર સપોર્ટ, માર્કેટિંગ, લીગલ અને ઓપરેશન્સ જેવા તમામ વિભાગોનું કામ AI સિસ્ટમ્સ ખૂબ સરળતાથી કરી શકે છે. તેમણે પોતાની કંપનીના આગામી GPT-6 અસ્ટ્રા (Astra) મોડેલનો ઉલ્લેખ કરતાં કહ્યું કે, આવા એડવાન્સ્ડ AI મોડેલ્સ એક જ સમયે મલ્ટીપલ સક્ષમ કર્મચારીઓની બેન્ચ તરીકે કામ કરે છે.

નાના અને ચોક્કસ (Niche) બિઝનેસ મોડેલ પણ હવે થશે નફાકારક

AI ના કારણે સોફ્ટવેર ડેવલપમેન્ટનો ખર્ચ અને સમય લગભગ શૂન્ય થઈ ગયો છે. ઓલ્ટમેને ઉદાહરણ આપતાં જણાવ્યું કે, અગાઉ માત્ર ૫૦ ગ્રાહકો માટે સોફ્ટવેર કે ગેમ બનાવવી આર્થિક રીતે ફાયદાકારક નહોતી. પરંતુ હવે AI ની મદદથી ખૂબ જ નાના પ્રેક્ષકો કે ચોક્કસ ગ્રાહક વર્ગ માટે સ્પેશિયલાઈઝ્ડ સોફ્ટવેર અને ગેમ્સ બનાવીને તેને વ્યાપારી રીતે સુપરહિટ બનાવી શકાય છે. AI એ ઉદ્યોગસાહસિકતાના તમામ જૂના દરવાજા તોડી નાખ્યા છે.