જીનીવા, તા.૨૯: સ્વિટ્ઝરલેન્ડના જીનીવા શહેરમાં સંયુક્ત રાષ્ટ્ર માનવાધિકાર પરિષદ (UNHRC)ના ૬૩મા સત્રમાં પાકિસ્તાનનો આતંકવાદી અને હિંસક ચહેરો વૈશ્વિક મંચ પર ફરી એકવાર ખુલ્લો પડી ગયો છે. સામાજિક-રાજકીય અને માનવાધિકાર કાર્યકર તસ્લીમા અખ્તરે સંયુક્ત રાષ્ટ્ર મહાસભા (UNGA)માં પાકિસ્તાનના વડાપ્રધાન શાહબાઝ શરીફ દ્વારા આપવામાં આવેલા નિવેદનની આકરા શબ્દોમાં ઝાટકણી કાઢી હતી. તેમણે સ્પષ્ટ શબ્દોમાં જણાવ્યું હતું કે શાહબાઝ શરીફનું નિવેદન પોતે જ સાબિત કરે છે કે તેઓ કોઈ દેશના જવાબદાર નેતા નથી, પરંતુ 'આતંકવાદના ઉદ્યોગ'માંથી આવે છે.

શાહબાઝ શરીફના દાવાની પોલ ખોલી

UNHRCના સત્ર બાદ એક ખાસ વાતચીતમાં તસ્લીમા અખ્તરે પાક પીએમના નિવેદનનો ઉલ્લેખ કરતા કહ્યું કે, "શાહબાઝ શરીફે દુનિયા સમક્ષ એવું કહ્યું હતું કે જો આતંકવાદીઓને રોકવામાં નહીં આવે તો તેઓ લંડનથી અમેરિકા સુધી ફેલાઈ જશે. તેમના આ નિવેદને જ સાબિત કરી દીધું છે કે પાકિસ્તાન પોતે આતંકવાદનું ઉત્પાદન અને નિકાસ કરનારો ઉદ્યોગ ચલાવી રહ્યું છે." અખ્તરે સવાલ ઉઠાવ્યો હતો કે જે કાશ્મીરમાં પાકિસ્તાન પોતે નિર્દોષ લોકોની હત્યાઓ કરાવે છે, તે જ મુદ્દાને આંતરરાષ્ટ્રીય મંચો પર ઉઠાવવાની તેની પાસે કઈ નૈતિકતા બચી છે?

PoJKમાં પાકિસ્તાની સેનાનું દમન અને ઇન્ટરનેટ પર પ્રતિબંધ

પાકિસ્તાન અધિકૃત જમ્મુ-કાશ્મીર (PoJK)ની કમનસીબ સ્થિતિ અંગે ચિંતા વ્યક્ત કરતા અખ્તરે જણાવ્યું કે ત્યાં નાગરિકોના મૂળભૂત માનવાધિકારો છીનવી લેવામાં આવ્યા છે. પાકિસ્તાન દાવો કરે છે કે PoJK ના લોકો સ્વતંત્ર છે, પરંતુ જો એવું જ હોત તો ત્યાં સતત ૪ મહિના સુધી ઇન્ટરનેટ બંધ રાખવાની કે લોહીયાળ સંઘર્ષ કરવાની જરૂર ન પડી હોત. રાવલાકોટ અને ગિલગિટ-બાલ્ટિસ્તાન જેવા વિસ્તારોમાં પાકિસ્તાની સેના અને રેન્જર્સ દ્વારા શાંતિપૂર્ણ પ્રદર્શનો કરી રહેલા નાગરિકો પર હિંસા આચરવામાં આવી રહી છે. ત્યાં કોઈ લોકશાહી નથી પરંતુ પાકિસ્તાની સેનાની કઠપૂતળી સરમુખત્યારશાહી ચાલી રહી છે.

જમ્મુ-કાશ્મીર અને PoJK વચ્ચે જમીન-આસમાનનો તફાવત

જમ્મુ-કાશ્મીર અને PoJKની સરખામણી કરતા માનવાધિકાર કાર્યકરે ઉમેર્યું હતું કે ભારતના જમ્મુ-કાશ્મીરમાં લોકોને શિક્ષણ, સ્વાસ્થ્ય, માળખાગત સુવિધાઓ અને શાંતિપૂર્ણ જીવન જીવવાનો અધિકાર મળ્યો છે. ભારત સરકાર લોકોની સમસ્યાઓ સાંભળે છે અને તેનો ઉકેલ લાવે છે. બીજી તરફ, પાકિસ્તાન પોતાના નાગરિકોને અન્ન, વસ્ત્ર અને મકાન જેવી પાયાની જરૂરિયાતો પૂરી પાડવામાં પણ સંપૂર્ણપણે નિષ્ફળ ગયું છે અને પોતાના આ નિષ્ફળ આતંકવાદી ઉદ્યોગને બચાવવા માટે સતત ખોટો પ્રચાર કરી રહ્યું છે.