ઇસ્લામાબાદ, તા. 18 જૂન 2026: ગયા વર્ષે એપ્રિલમાં કાશ્મીરના પહેલગામમાં થયેલા કાયરતાપૂર્ણ આતંકવાદી હુમલા બાદ ભારત સરકારે પાકિસ્તાન વિરૂદ્ધ ઐતિહાસિક અને આકરા કદમ ઉઠાવ્યા હતા. ભારતે બંને દેશો વચ્ચે વર્ષ 1960 થી ચાલી આવતી 'સિંધુ જળ સંધિ' (Indus Water Treaty) ને સ્થગિત કરી દીધી હતી. ભારતના આ એક જ નિર્ણયથી પાકિસ્તાનમાં પાણીના ટીપે-ટીપા માટે તરફડાટ શરૂ થઈ ગયો છે. આ આકરા આર્થિક અને ભૌગોલિક ઝટકાના બરાબર 14 મહિના બાદ, પાકિસ્તાન પીપલ્સ પાર્ટી (PPP) ના અધ્યક્ષ અને શાહબાઝ શરીફ સરકારના સભ્ય બિલાવલ ભુટ્ટો ઝરદારીએ ભારતને ખુલ્લી ધમકી આપી છે.
પાકિસ્તાનની નેશનલ એસેમ્બલીમાં ભુટ્ટોનું ઝેરીલું નિવેદન
પાકિસ્તાનની સંસદ (રાષ્ટ્રીય સભા) માં બોલતા પૂર્વ વિદેશ મંત્રી બિલાવલ ભુટ્ટોએ ભારત પર પાકિસ્તાનનું પાણી રોકવાનો સીધો આરોપ લગાવ્યો હતો. તેમણે ઉશ્કેરણીજનક અંદાજમાં કહ્યું કે, "ઇસ્લામાબાદ ભારતની આ દાદાગીરી સહન નહીં કરે. અમે નદીઓના પાણીના અમારા હકના હિસ્સા સાથે કોઈ જ સમાધાન કરવાના નથી. પાકિસ્તાન પોતાના અધિકારો માટે આખરી દમ સુધી લડશે. જો ભારત પાણીનો પ્રવાહ રોકશે તો તેનો જડબાતોડ અને કડક જવાબ આપવામાં આવશે." ઉલ્લેખનીય છે કે ભુટ્ટો અગાઉ પણ "નદીઓમાં લોહી વહેશે" જેવા યુદ્ધખોર નિવેદનો આપી ચૂક્યા છે.
યુરોપમાં જઈને રડ્યું પાકિસ્તાન, ભારતના મેગા પ્રોજેક્ટ્સથી ફાફડાટ
પોતાની નબળી આર્થિક સ્થિતિ વચ્ચે પાકિસ્તાને હવે આ મુદ્દાને આંતરરાષ્ટ્રીય સ્તરે ઉઠાવવાનું શરૂ કર્યું છે. બેલ્જિયમની રાજધાની બ્રસેલ્સમાં પાકિસ્તાન હાઇ કમિશન અને યુરોપિયન થિંક ટેન્ક (CEPS) દ્વારા એક ખાસ કોન્ફરન્સ યોજીને ભારત વિરુદ્ધ પ્રોપગેન્ડા ચલાવવામાં આવ્યો હતો. પાકિસ્તાનના નાયબ વડાપ્રધાન ઇશાક ડારે ભારત પર પ્રહારો કરતા કહ્યું કે, સંધિ સ્થગિત કર્યા બાદ ભારત સાવલકોટ, કિર્થાઈ અને ક્વાર જેવા વિશાળ હાઇડ્રોઇલેક્ટ્રિક પ્રોજેક્ટ્સ પર યુદ્ધના ધોરણે કામ કરી રહ્યું છે. આ સિવાય બગલીહાર અને સલાલ ડેમનો વિસ્તાર કરીને ભારત સિંધુ, ચિનાબ અને રાવી નદીઓનો પ્રવાહ પોતાની તરફ વાળી રહ્યું છે, જેના કારણે પાકિસ્તાન આખું ભૂખમરાની ગર્તામાં ધકેલાઈ જશે.
સંયુક્ત રાષ્ટ્ર (UN) માં ભારતનો સણસણતો જવાબ
પાકિસ્તાનની આ આંતરરાષ્ટ્રીય ઉધામાઓ પર ભારતે ગઈકાલે યુએનએસસી (UNSC) ના 62મા સત્રમાં જડબાતોડ જવાબ આપ્યો છે. સંયુક્ત રાષ્ટ્રમાં ભારતના કાયમી મિશનના પ્રથમ સચિવ અનુપમા સિંહે સ્પષ્ટ શબ્દોમાં પાકિસ્તાનને સંભળાવી દીધું કે, દિલ્હી પોતાના વલણ પર અડગ છે. તેમણે કહ્યું કે, "1960 ના દાયકાના જૂના કરારને કોઈ કાયમી અધિકાર ન માની શકાય. પાકિસ્તાન જ્યાં સુધી સરહદ પારથી આતંકવાદીઓને આશ્રય, ફંડિંગ અને તાલીમ આપવાનું બંધ નહીં કરે, ત્યાં સુધી પાણી પર કોઈ જ ચર્ચા શક્ય નથી." ભારતે દુનિયાને સ્પષ્ટ સંદેશ આપ્યો છે કે નિર્દોષ ભારતીયોનું લોહી અને નદીઓનું પાણી બંને એકસાથે વહી શકે નહીં.