નવી દિલ્હી : સંસદમાં પેપર લીક વિરોધી બિલ (Paper Leak Bill) પર ચર્ચા દરમિયાન રાજકીય ગરમાવો ચરમસીમાએ પહોંચ્યો છે. ભારતીય જનતા પાર્ટીના સાંસદ અને પૂર્વ કેન્દ્રીય મંત્રી અનુરાગ ઠાકુરે કોંગ્રેસના નેતા રાહુલ ગાંધી અને સમાજવાદી પાર્ટીના પ્રમુખ અખિલેશ યાદવ પર આકરા પ્રહારો કરતા કહ્યું કે, પોતાની સરકારોમાં સેંકડો પેપર લીક કરાવ્યા બાદ હવે આ નેતાઓ વિરોધ પ્રદર્શન કરવાનું નાટક કરી રહ્યા છે.

"નકલ વિરોધી કાયદો ભાજપ જ લાવી હતી"

અનુરાગ ઠાકુરે સંસદમાં દાવો કર્યો હતો કે કેન્દ્ર હોય કે રાજ્ય સ્તર, છેતરપિંડી અને નકલ વિરોધી કાયદા લાવવાની પહેલ હંમેશા ભાજપ સરકારે જ કરી છે. ઉત્તર પ્રદેશનો ઉલ્લેખ કરતા તેમણે જણાવ્યું કે જ્યારે સમાજવાદી પાર્ટી સત્તામાં હતી ત્યારે પરીક્ષાઓમાં ધાંધલી અને નકલને ખુલ્લેઆમ સમર્થન આપવામાં આવતું હતું.

તેમણે ભૂતકાળને યાદ અપાવતા કહ્યું કે, "ઉત્તર પ્રદેશમાં જ્યારે કલ્યાણ સિંહની સરકાર હતી અને તત્કાલીન શિક્ષણ મંત્રી રાજનાથ સિંહ હતા, ત્યારે ભાજપે જ સૌથી પહેલા કડક નકલ વિરોધી કાયદો રજૂ કર્યો હતો."

રાહુલ ગાંધી પર કટાક્ષ અને સરકારનો સંકલ્પ

વિપક્ષના નેતા રાહુલ ગાંધી પર તીખો કટાક્ષ કરતા ઠાકુરે ઉમેર્યું હતું કે, "હું તેમની અકળામણ અને વેદના સારી રીતે સમજી શકું છું."

તેમણે ભારપૂર્વક જણાવ્યું કે વડાપ્રધાન નરેન્દ્ર મોદીના નેતૃત્વ હેઠળની કેન્દ્ર સરકાર દેશમાંથી પેપર લીક અને પરીક્ષાની ધાંધલીની સમસ્યાને જડમૂળથી નાબૂદ કરવા માટે સંપૂર્ણ રીતે કટિબદ્ધ છે અને આ બિલ દેશના કરોડો યુવાનોના ભવિષ્યને સુરક્ષિત બનાવશે.