મુંબઈ: મુંબઈના વિક્રોલી વિસ્તારમાં એક અત્યંત સનસનાટીભર્યા અને શરમજનક કિસ્સામાં, મુલુંડના ૨૬ વર્ષીય ફિઝિયોથેરાપિસ્ટનું નિર્માણાધીન ઈમારતની અંદર ચાર શખ્સોની ટોળકી દ્વારા અપહરણ કરીને મારપીટ કરવામાં આવી હોવાની ચોંકાવનારી ઘટના સામે આવી છે. આરોપીઓએ યુવક સાથે નિર્દયતાપૂર્વક મારપીટ કરી તેના કપડાં ઉતરાવીને અશ્લીલ વીડિયો બનાવ્યો હતો તેમજ સોના-ચાંદીના દાગીના અને એટીએમ દ્વારા કુલ ૪૫,૦૦૦ રૂપિયાની લૂંટ ચલાવી હતી. આ ગંભીર મામલે પાર્કસાઈટ પોલીસે ત્વરિત કાર્યવાહી કરીને બે આરોપીઓની ધરપકડ કરી લીધી છે.
ઘટનાની વિગતો મુજબ, પીડિત ફિઝિયોથેરાપિસ્ટ ૪ નવેમ્બરના રોજ બપોરે રેપિડો રાઈડ દ્વારા પાર્કસાઈટના એલબીએસ રોડ પર એક મહિલા મિત્રને મળવા પહોંચ્યા હતા, ત્યારે અચાનક આરોપીઓએ તેમને ધમકી આપીને સૂર્યા નગર વિસ્તારની એક નિર્જન, નિર્માણાધીન ઈમારતના ચોથા માળે ખેંચી ગયા હતા. ત્યાં વધુ શખ્સો ભેગા થઈને પીડિતના સોનાની ચેઈન, કાનની બુટ્ટી અને ચાંદીનું બ્રેસલેટ લૂંટી લીધા હતા. એટલું જ નહીં, વિરોધ કરવા પર બળજબરીથી કપડાં કઢાવી તેનું મોબાઈલ ફોનમાં શૂટિંગ કરવામાં આવ્યું હતું અને ડેબિટ-ક્રેડિટ કાર્ડનો પિન કઢાવી એટીએમમાંથી ૪૫,૦૦૦ રૂપિયા પડાવી લેવામાં આવ્યા હતા.
ભયભીત થયેલા પીડિતે ઘરે પહોંચીને પરિવારને આપવીતી જણાવ્યા બાદ પાર્કસાઈટ પોલીસ સ્ટેશનમાં ભારતીય ન્યાય સંહિતા (BNS) ની કલમો હેઠળ ગુનો દાખલ કરવામાં આવ્યો હતો. પોલીસે ટેકનિકલ સર્વેલન્સ અને બાતમીદારોની મદદથી રોહિત સાવંત ઉર્ફે અબ્બા અને રાજેશ દેવર નામના બે બેરોજગાર આરોપીઓની ધરપકડ કરી લીધી છે, જેમાં એકનો અગાઉનો ગુનાહિત ઈતિહાસ પણ સામે આવ્યો છે.
આ ગુનામાં સંડોવાયેલા અન્ય ચાર ફરાર શંકાસ્પદ આરોપીઓને ઝડપી પાડવા માટે પોલીસે ચક્રો ગતિમાન કર્યા છે અને વિશેષ તપાસ ટીમો કામે લગાડવામાં આવી છે. વધતા જતા અપહરણ અને લૂંટના આ બનાવને પગલે મુંબઈ પોલીસ દ્વારા સુરક્ષા વ્યવસ્થા વધુ કડક બનાવવામાં આવી રહી છે, તેમજ ફરાર આરોપીઓની ધરપકડ બાદ આ રેકેટ સાથે જોડાયેલા અન્ય તથ્યો પણ બહાર આવશે તેવી અપેક્ષા છે.