નડિયાદ : ગુજરાતના નડિયાદ ખાતે રહેતા અતુલ સોલંકી નામના પિતા દ્વારા ગત ૨૪ જુલાઈના રોજ વડાપ્રધાન નરેન્દ્ર મોદીને એક ભાવનાત્મક પત્ર લખીને તેમના ગંભીર બીમારીથી પીડિત પુત્રના સફળ ઓપરેશન અને સારવાર માટે 'પ્રધાનમંત્રી રાષ્ટ્રીય રાહત ભંડોળ' (PMNRF) દ્વારા સમયસર મળેલી આર્થિક સહાય બદલ હૃદયપૂર્વક આભાર વ્યક્ત કરવામાં આવ્યો હતો, જેના પ્રત્યુત્તરમાં વડાપ્રધાને અત્યંત સંવેદનશીલતા દાખવીને પરિવારના કઠિન સમયની પીડાને વાચા આપી છે.

સોલંકી પરિવાર દ્વારા મોકલવામાં આવેલા આ કૃતજ્ઞતા પત્રનો જવાબ આપતા વડાપ્રધાન નરેન્દ્ર મોદીએ પુત્રની સફળ સર્જરી અંગે ખુશી વ્યક્ત કરી હતી અને પત્રમાં લખ્યું હતું કે, પોતાના સંતાનોના સ્વાસ્થ્ય અને જીવનને લઈને માતા-પિતાના મનમાં કેવા પ્રકારની ચિંતાઓ ઘેરાયેલી હોય છે તે હું ખૂબ સારી રીતે અનુભવી શકું છું, અને PMNRF જેવી કલ્યાણકારી પહેલ મારફતે દેશના અસંખ્ય ગરીબ અને વંચિત પરિવારો સુધી સમયસર મદદ પહોંચાડીને તેમને આર્થિક સંકટમાંથી મુક્તિ અપાવવી એ સરકારની પ્રાથમિકતા રહી છે.

વડાપ્રધાને વધુમાં ઉમેર્યું હતું કે નાગરિકોના જીવનમાં સકારાત્મક પરિવર્તન લાવવા માટે સરકાર કટિબદ્ધ છે અને લાભાર્થીઓ દ્વારા જ્યારે આવા અનુભવો શેર કરવામાં આવે છે ત્યારે તે દેશસેવા માટે અવિરત કામ કરવાની એક નવી જ ઉર્જા અને પ્રેરણા પૂરી પાડે છે, તેમજ તેમણે અતુલ સોલંકીના પરિવાર અને સ્વસ્થ થયેલા બાળકને ઉજ્જવળ ભવિષ્ય તથા ઉત્તમ સ્વાસ્થ્ય માટે હાર્દિક શુભકાભનાઓ પાઠવી હતી.

આ ઘટના દર્શાવે છે કે કેવી રીતે કેન્દ્ર સરકારની કલ્યાણકારી યોજનાઓ અને રાહત ભંડોળ કટોકટીના સમયે સામાન્ય પરિવારો માટે મોટો સહારો બનીને આવે છે, અને ભવિષ્યમાં પણ દેશના જરૂરિયાતમંદ નાગરિકો આવી યોજનાઓનો મહત્તમ લાભ મેળવી શકે તે માટે પ્રશાસન દ્વારા જાગૃતિ અને પારદર્શિતા પર વિશેષ ભાર મૂકવામાં આવી રહ્યો છે.