​શ્રીનગર/દિલ્હી: જમ્મુ-કાશ્મીરના રાજકારણમાં આગામી દિવસોમાં મોટા ઉલટફેરના એંધાણ વર્તાઈ રહ્યા છે. નેશનલ કોન્ફરન્સ દ્વારા જમ્મુ-કાશ્મીરને પૂર્ણ રાજ્યનો દરજ્જો અપાવવાની માંગ સાથે દિલ્હીમાં યોજવામાં આવનારા મોટા આંદોલન પહેલા પીપલ્સ ડેમોક્રેટિક પાર્ટી (પીડીપી)ના વડા મહેબૂબા મુફ્તીએ આ આંદોલનમાં સહભાગી થવા માટે પોતાની શરતો સ્પષ્ટ કરી છે.

​પીડીપી પ્રમુખ મહેબૂબા મુફ્તીએ એક મહત્વપૂર્ણ નિવેદન આપતા જણાવ્યું છે કે, તેઓ નેશનલ કોન્ફરન્સના આ દિલ્હી ચલો આંદોલનમાં માત્ર ત્યારે જ સામેલ થશે જો તેમાં જમ્મુ-કાશ્મીરના અત્યંત સંવેદનશીલ મુદ્દાઓને પ્રાથમિકતા આપવામાં આવશે. તેમણે મુખ્યમંત્રી ઉમર અબ્દુલ્લા સામે મુખ્યત્વે બે શરતો રાખી છે. પ્રથમ, આંદોલનના ઉદ્દેશ્યમાં આર્ટિકલ ૩૭૦ની પુનઃસ્થાપનાને સામેલ કરવી અને બીજી, રાજ્યના રાજકીય કેદીઓની તાત્કાલિક મુક્તિ તેમજ જમાત-એ-ઈસ્લામી જેવી સંસ્થાઓ પરથી પ્રતિબંધ હટાવવાની માંગ કરવી.

​મહેબૂબા મુફ્તીએ સ્પષ્ટ શબ્દોમાં કહ્યું છે કે, જો આંદોલન માત્ર રાજ્યના દરજ્જા સુધી જ મર્યાદિત રહેશે, તો તે પ્રદેશની જનતા સાથેનો વિશ્વાસઘાત ગણાશે. તેમણે આશંકા વ્યક્ત કરી હતી કે, માત્ર એક જ મુદ્દા પર આંદોલન કરવાથી એવો ખોટો સંદેશ જઈ શકે છે કે તેઓ કેન્દ્ર સરકાર દ્વારા ૫ ઓગસ્ટ ૨૦૧૯ના રોજ લેવાયેલા નિર્ણયોનું સમર્થન કરી રહ્યા છે, જે પીડીપી માટે ક્યારેય સ્વીકાર્ય નથી.

​વધુમાં, મહેબૂબા મુફ્તીએ સૂચન કર્યું છે કે, લદ્દાખની જેમ જમ્મુ-કાશ્મીરના તમામ રાજકીય પક્ષોએ અને સિવિલ સોસાયટીના પ્રતિનિધિઓએ એક મંચ પર આવવું જોઈએ. આ માટે તેમણે તાત્કાલિક સર્વદળીય બેઠક બોલાવવાની હિમાયત કરી છે, જેથી તમામ પક્ષોની માંગણીઓમાં એકરૂપતા લાવી શકાય અને કેન્દ્ર સરકાર સામે એક મજબૂત મોરચો માંડી શકાય.

​નોંધનીય છે કે, નેશનલ કોન્ફરન્સ ૨૦ માર્ચે દિલ્હીના જંતર-મંતર પર મોટા પાયે પ્રદર્શન કરવાની તૈયારી કરી રહી છે. આ આંદોલન માટે ઉમર અબ્દુલ્લાએ વિવિધ રાજકીય પક્ષો અને પ્રભાવશાળી નેતાઓને આમંત્રણ પાઠવ્યું છે. હવે જ્યારે મહેબૂબા મુફ્તીએ પોતાની શરતો રજૂ કરી છે, ત્યારે આ આંદોલનનું સ્વરૂપ કેવું રહેશે અને ઉમર અબ્દુલ્લા આ શરતો પર શું પ્રતિસાદ આપે છે, તેના પર સમગ્ર દેશની નજર ટકેલી છે.