ચેન્નાઈ : તમિલનાડુના દરિયાકાંઠેથી કરોડો રૂપિયાનું આંતરરાષ્ટ્રીય ડ્રગ્સ નેટવર્ક પકડાયા બાદ રાજ્યના રાજકારણમાં ભારે ચકચાર મચી ગઈ છે. AIADMK ના મહાસચિવ અને ભૂતપૂર્વ મુખ્યમંત્રી એડપ્પાડી કે. પલાનીસ્વામીએ મંગળવારે એક સનસનાટીભર્યા નિવેદનમાં તમિલનાડુના મુખ્યમંત્રી સી. જોસેફ વિજયની સંપૂર્ણ "ચૂપકીદી" સામે તીખા પ્રહારો કર્યા છે. તેમણે સીધો સવાલ ઉઠાવ્યો છે કે શું આટલું મોટું આંતરરાષ્ટ્રીય ડ્રગ રેકેટ સત્તાધારી પક્ષ 'તમિલનાડુ વેત્રિ કઝગમ' (TVK) ના ઉચ્ચ નેતૃત્વની જાણકારી અને છૂપા આશીર્વાદથી ચાલી રહ્યું છે?

ડિરેક્ટોરેટ ઓફ રેવન્યુ ઈન્ટેલિજન્સ (DRI) દ્વારા હાથ ધરવામાં આવેલા એક ગુપ્ત અને મોટા ઓપરેશનમાં નાગપટ્ટિનમ જિલ્લાના એક દરિયાકાંઠાના ગામમાંથી ૧૩૭ કિલોગ્રામ અત્યંત ઘાતક 'ક્રિસ્ટલ મેથામ્ફેટામાઈન' નો જથ્થો જપ્ત કરવામાં આવ્યો છે, જેની આંતરરાષ્ટ્રીય બજારમાં કિંમત આશરે ૪૦૦ કરોડ રૂપિયા આંકવામાં આવી રહી છે. આ નશીલા પદાર્થોને સમુદ્ર માર્ગે શ્રીલંકા સ્મગલ કરવાની યોજના હતી. આ કેસમાં કથિત માસ્ટરમાઇન્ડ અને TVK ના કાર્યકારી તથા વકીલ એન. બૂપલન સહિત ચાર લોકોની અટકાયત કરવામાં આવી છે, જે બાદ રાજ્યની રાજકીય ચિત્ર બદલાઈ ગયું છે.

પલાનીસ્વામીએ મુખ્યમંત્રી વિજય પર કટાક્ષ કરતા તેમને 'રીલ્સ સીએમ' ગણાવ્યા હતા અને કહ્યું હતું કે એક તરફ મુખ્યમંત્રી ડ્રગ્સ વિરોધી ઝુંબેશ ચલાવીને "સ્પોર્ટ્સ-અ એડુ, ડ્રગ્સ-અ વિડુ" ના નારા લખી રહ્યા છે, તો બીજી તરફ તેમના જ પક્ષના નેતાઓ 'બ્રેકિંગ બેડ' સીરીઝના 'વોલ્ટર વ્હાઇટ' ની જેમ ડ્રગ કિંગપિન તરીકે બેવડું જીવન જીવી રહ્યા છે. વધુમાં, પલાનીસ્વામીએ આરોપ લગાવ્યો હતો કે TVK ના સ્થાનિક હોદ્દેદારો આ સમાચાર કવર કરનારા મીડિયા હાઉસને ખુલ્લેઆમ ધમકીઓ આપી રહ્યા છે, જેથી કરીને સત્યને દબાવી શકાય.

રાજ્યની ગુપ્તચર એજન્સીઓ અને સ્થાનિક પોલીસની નિષ્ફળતા પર પ્રહારો કરતા ભૂતપૂર્વ મુખ્યમંત્રીએ ઉમેર્યું હતું કે આટલું મોટું નેટવર્ક કેન્દ્રીય એજન્સી DRI દ્વારા પકડવામાં આવ્યું છે, જે દર્શાવે છે કે રાજ્ય પોલીસ વહીવટીતંત્ર સંપૂર્ણપણે નિષ્ક્રિય બની ગયું છે. તેમણે તાત્કાલિક ધોરણે મુખ્યમંત્રી પાસે સત્તાવાર ખુલાસાની માંગ કરી છે. ૪૦૦ કરોડના આ ડ્રગ્સ કૌભાંડ અને સત્તાધારી પક્ષના નેતાઓની કથિત સંડોવણીએ તમિલનાડુના રાજકારણમાં એક નવો અને અત્યંત ગંભીર વળાંક આણ્યો છે.