શિમલા : હિમાચલ પ્રદેશના રાજકારણમાં હાલ નિવેદનબાજી અને પલટવારનો દૌર પરાકાષ્ઠાએ પહોંચ્યો છે. રાજ્યના મુખ્ય પ્રધાન સુખવિંદર સિંહ સુક્ખૂ દ્વારા કરવામાં આવેલા એક કટાક્ષ સામે ભાજપના દિગ્ગજ નેતા અને રાજ્યસભા સાંસદ હર્ષ મહાજને અત્યંત આક્રમક અંદાજમાં વળતો પ્રહાર કર્યો છે. ક્યારકોટી ખાતે એક એમ્બ્યુલન્સને લીલી ઝંડી બતાવીને પ્રસ્થાન કરાવવાના કાર્યક્રમ દરમિયાન મીડિયા સાથે વાત કરતા હર્ષ મહાજને સ્પષ્ટ શબ્દોમાં જણાવ્યું હતું કે, ‘ગુરુ એ ગુરુ હોય છે અને ચેલો એ ચેલો જ રહે છે’. તેમણે મુખ્યમંત્રીને સલાહ આપતા કહ્યું કે વડાપ્રધાન કે વરિષ્ઠ નેતાઓ વિશે બોલતા પહેલા તેમણે ગંભીરતાથી વિચારવું જોઈએ.

આ રાજકીય વિવાદની શરૂઆત ત્યારે થઈ જ્યારે તાજેતરમાં મુખ્ય પ્રધાન સુક્ખૂએ એક જાહેર સભામાં હર્ષ મહાજન પર નિશાન સાધતા દાવો કર્યો હતો કે મહાજન જ્યારે કોંગ્રેસમાં સલાહકાર હતા ત્યારે પાર્ટીને હારનો સામનો કરવો પડ્યો હતો. સીએમે એમ પણ કહ્યું હતું કે પૂર્વ મુખ્યમંત્રી વીરભદ્ર સિંહ પોતાની સરકાર એટલા માટે રિપીટ નહોતા કરી શક્યા કારણ કે તેમને મહાજનની ખોટી સલાહો મળી હતી અને હવે તેઓ ભાજપમાં જઈને બેઠા છે.

વીરભદ્ર સિંહને યાદ કરી હર્ષ મહાજનો પલટવાર

સીએમના આ આરોપોનો આકરો જવાબ આપતા હર્ષ મહાજને જણાવ્યું કે તેઓ દિવંગત નેતા વીરભદ્ર સિંહના રાજકીય શિષ્ય રહ્યા છે અને વીરભદ્રજી તેમના જીવનના અંતિમ શ્વાસ સુધી રાજકારણમાં અત્યંત સક્રિય રહ્યા હતા. મહાજને કોંગ્રેસ પાર્ટી પર પ્રહાર કરતા દાવો કર્યો હતો કે વર્તમાન સમયમાં કોંગ્રેસનું રાજકીય ભવિષ્ય સંપૂર્ણપણે અંધકારમય બની ગયું છે, જ્યારે ભારતીય જનતા પાર્ટીની નીતિઓ સ્પષ્ટ હોવાથી ભવિષ્ય ઉજ્જવળ છે. આ કાર્યક્રમમાં પૂર્વ મંત્રી સુરેશ ભારદ્વાજ અને જિલ્લા પરિષદના સભ્ય ખુશ વિક્રમ સેન પણ તેમની સાથે ઉપસ્થિત રહ્યા હતા, જેણે રાજ્યના રાજકીય સમીકરણોમાં વધુ ગરમાવો લાવી દીધો છે.