મુંબઈ : છેલ્લા કેટલાક દિવસોથી આમ આદમી પાર્ટી (AAP) છોડીને ભારતીય જનતા પાર્ટી (BJP) માં જોડાયેલા રાઘવ ચઢ્ઢા અત્યારે સોશિયલ મીડિયા પર ભારે ટીકાઓનો સામનો કરી રહ્યા છે. આ વિવાદમાં જાણીતા અભિનેતા પ્રકાશ રાજે પણ ઝંપલાવ્યું છે. રાઘવ ચઢ્ઢાએ સોમવારે ઇન્સ્ટાગ્રામ પર એક વિડીયો શેર કરીને પોતાનો પક્ષ રજૂ કર્યો હતો, જેના પર પ્રકાશ રાજે અત્યંત કડક શબ્દોમાં પ્રતિક્રિયા આપીને સોશિયલ મીડિયા પર ગરમાવો લાવી દીધો છે.
"હું ખોટો હોઈ શકું, પણ ૧૦ લાખ લોકો નહીં"
પોતાના વિડીયોમાં રાઘવ ચઢ્ઢાએ બચાવ કરતા કહ્યું હતું કે, "કદાચ હું ખોટો હોઈ શકું, પણ મારી સાથે પાર્ટી છોડનારા અન્ય સાત લોકો ખોટા ન હોઈ શકે." આ નિવેદન પર કટાક્ષ કરતા પ્રકાશ રાજે એક્સ (ટ્વિટર) પર લખ્યું કે, "કદાચ હું પણ ખોટો હોઈ શકું... પણ એ ૧૦ લાખ (એક મિલિયન) લોકો ખોટા નથી જેમણે તમને સોશિયલ મીડિયા પર અનફોલો કરીને તમારો સાથ છોડી દીધો છે." પ્રકાશ રાજે આ પોસ્ટમાં #NamakHarami અને #justasking જેવા હેશટેગનો ઉપયોગ કરીને સીધું નિશાન સાધ્યું છે.
મીમ વોર: પોલીસ અને દાઉદ સાથે સરખામણી
આ અગાઉ પણ પ્રકાશ રાજે રાઘવ ચઢ્ઢાના પક્ષપલટા પર એક વિવાદાસ્પદ મીમ શેર કર્યો હતો. આ મીમમાં લખ્યું હતું કે, "હું પોલીસ ફોર્સ છોડી રહ્યો છું... અને દાઉદ ઈબ્રાહિમ સાથે જોડાઈ રહ્યો છું." આ સરખામણી દ્વારા પ્રકાશ રાજે રાઘવના AAP થી ભાજપ સુધીના પ્રવાસને નૈતિક રીતે ખોટો ગણાવ્યો હતો.
નેટીઝન્સના મિશ્ર પ્રતિસાદ
પ્રકાશ રાજની આ પ્રતિક્રિયા પર ઇન્ટરનેટ યુઝર્સ બે ભાગમાં વહેંચાયેલા જોવા મળ્યા છે. કેટલાક લોકો રાઘવ ચઢ્ઢાને 'ઘેટાના વેશમાં વરુ' કહી રહ્યા છે અને કહી રહ્યા છે કે ભાજપમાં જોડાઈને તેમણે પોતાની નૈતિકતા ગુમાવી દીધી છે. તો બીજી તરફ, કેટલાક લોકો પ્રકાશ રાજને પૂછી રહ્યા છે કે જો રાઘવ કોંગ્રેસમાં જોડાયા હોત તો પણ શું તેઓ આટલો જ વિરોધ કરત? કુમાર વિશ્વાસ જેવા નેતાઓનું ઉદાહરણ આપીને કેટલાક યુઝર્સ પ્રકાશ રાજના વલણને પક્ષપાતી ગણાવી રહ્યા છે.
રાઘવ ચઢ્ઢાનો AAP થી ભાજપ તરફનો આ પ્રવાસ અત્યારે રાજકીય વર્તુળોમાં સૌથી વધુ ચર્ચાતો વિષય બની ગયો છે. ખાસ કરીને યુવા નેતા તરીકેની તેમની છબી પર આ પક્ષપલટાની શું અસર થશે તે જોવું રહ્યું. પ્રકાશ રાજના આ પ્રહાર બાદ હવે રાઘવ ચઢ્ઢા કે ભાજપ તરફથી કોઈ જવાબ આવે છે કે કેમ તેના પર સૌની નજર છે.