વોશિંગ્ટન : અમેરિકામાં સ્થાયી થવા માંગતા અને ત્યાં નોકરી કરતા લાખો ભારતીયો માટે એક મહત્વના સમાચાર સામે આવ્યા છે. નોર્થ કેરોલિનાના ટોચના શ્રમ અધિકારી (Labour Commissioner) લ્યુક ફાર્લીએ H-1B, H-1B1 અને E-3 વિઝા પ્રોગ્રામ હેઠળ વિદેશી કામદારોના લઘુત્તમ વેતનમાં વધારો કરવાના ફેડરલ પ્રસ્તાવને ખુલ્લું સમર્થન જાહેર કર્યું છે. ફાર્લીનું માનવું છે કે હાલના વિઝા નિયમોમાં રહેલી છટકબારીઓને કારણે અમેરિકન કામદારોના વેતન પર નકારાત્મક અસર પડી રહી છે.
લ્યુક ફાર્લીએ યુએસ ડિપાર્ટમેન્ટ ઓફ લેબરને મોકલેલા પત્રમાં જણાવ્યું છે કે, "H-1B વિઝા કાર્યક્રમો ઘણીવાર અમેરિકન અને નોર્થ કેરોલિનાના સ્થાનિક કામદારોની નોકરીઓ છીનવી લે છે. અમે ટ્રમ્પ પ્રશાસન દ્વારા સૂચિત નવા નિયમનું સમર્થન કરીએ છીએ, જે સુનિશ્ચિત કરશે કે વિદેશી વિઝા ધારકો અમેરિકન કામદારોના વેતનમાં ઘટાડો કરવાનું કારણ ન બને." તેમણે વધુમાં ઉમેર્યું કે દેશના શ્રમ કાર્યક્રમો ક્યારેય પણ અમેરિકન કામદારોના મૂલ્યને ઓછું કરવાનો કે તેમને બાયપાસ કરવાનો પાછલો રસ્તો ન બનવો જોઈએ.
ટ્રમ્પ પ્રશાસન દ્વારા 26 માર્ચના રોજ રજૂ કરવામાં આવેલા આ પ્રસ્તાવ મુજબ, જો કોઈ કંપનીએ વિદેશી કામદારને નોકરી પર રાખવો હોય, તો તેણે બજારના વાસ્તવિક દરો મુજબ વેતન ચૂકવવું પડશે. અત્યાર સુધી અનેક કંપનીઓ ઓછું વેતન આપીને વિદેશી શ્રમિકોને નોકરી પર રાખતી હતી, જેના કારણે સ્થાનિક અમેરિકનો માટે તકો ઘટી જતી હતી. આ નવા નિયમ પર આગામી 25 મે સુધી જાહેર જનતાના મંતવ્યો મંગાવવામાં આવ્યા છે.
જો આ પ્રસ્તાવ કાયદો બનશે, તો તેની સીધી અસર ભારતીય આઈટી (IT) પ્રોફેશનલ્સ અને કંપનીઓ પર પડશે. વેતન વધારવાના આ નિયમથી અમેરિકન કંપનીઓ માટે વિદેશી ટેલેન્ટને હાયર કરવું મોંઘું સાબિત થશે, જે લાંબા ગાળે H-1B વિઝા મેળવવાની પ્રક્રિયાને વધુ જટિલ બનાવી શકે છે. અમેરિકામાં 'અમેરિકા ફર્સ્ટ' (America First) ની નીતિ હેઠળ લેવામાં આવી રહેલા આ પગલાંથી ગ્લોબલ જોબ માર્કેટમાં નવા સમીકરણો રચાય તેવી પૂરેપૂરી શક્યતા છે.