નવી દિલ્હી: પશ્ચિમ એશિયા (મધ્ય પૂર્વ) માં ઈરાન અને અમેરિકા-ઈઝરાયેલ વચ્ચે ચાલી રહેલા ભયાનક સંઘર્ષ અને મંત્રણાઓમાં આવેલી મડાગાંઠ વચ્ચે ભારતના વડાપ્રધાન નરેન્દ્ર મોદી અને અમેરિકી રાષ્ટ્રપતિ ડોનાલ્ડ ટ્રમ્પ વચ્ચે આજે મહત્વની ટેલિફોનિક વાતચીત થઈ હતી. ભારતમાં અમેરિકી રાજદૂત સર્જિયો ગોરે આ મંત્રણાની પુષ્ટિ કરતા જણાવ્યું હતું કે બંને નેતાઓ વચ્ચે અંદાજે ૪૦ મિનિટ સુધી ચાલેલી આ વાતચીતમાં પ્રાદેશિક સુરક્ષા અને વૈશ્વિક શાંતિ અંગે વિસ્તૃત ચર્ચા કરવામાં આવી હતી.

ચાલુ વર્ષની ત્રીજી અને યુદ્ધ બાદની બીજી મંત્રણા:

વર્ષ ૨૦૨૬માં બંને નેતાઓ વચ્ચેની આ ત્રીજી ફોન કોલ છે. આ અગાઉ ૨ ફેબ્રુઆરીએ વેપાર કરાર અંગે અને ૨૪ માર્ચે પશ્ચિમ એશિયાની સ્થિતિ પર ચર્ચા થઈ હતી. ૨૮ ફેબ્રુઆરીના રોજ જ્યારે અમેરિકા અને ઈઝરાયેલે ઈરાન પર હુમલો કર્યો અને યુદ્ધ ફાટી નીકળ્યું, ત્યાર બાદ બંને નેતાઓ બીજી વખત ફોન પર આમને-સામને આવ્યા છે. આ મંત્રણા એવા સમયે થઈ છે જ્યારે આંતરરાષ્ટ્રીય સ્તરે શાંતિ સ્થાપવા માટે ભારતની ભૂમિકા અત્યંત મહત્વની મનાઈ રહી છે.

પાકિસ્તાનમાં મંત્રણા નિષ્ફળ જતા મડાગાંઠ:

તાજેતરમાં પાકિસ્તાનની રાજધાની ઈસ્લામાબાદમાં બંને પક્ષો વચ્ચે યોજાયેલી શાંતિ મંત્રણાનું કોઈ પરિણામ આવ્યું નથી. પરિણામે, યુદ્ધ અત્યારે મડાગાંઠ (Stalemate) જેવી સ્થિતિમાં આવી ગયું છે. હાલમાં ૨૨ એપ્રિલ સુધીનો એક કામચલાઉ અને નાજુક યુદ્ધવિરામ અમલી છે, પરંતુ બંને પક્ષો પોતાની શરતો પર મક્કમ હોવાથી ફરીથી સંઘર્ષ ફાટી નીકળવાનો ભય સેવાઈ રહ્યો છે. આ ડેડલાઇન નજીક આવી રહી છે ત્યારે ટ્રમ્પ અને મોદી વચ્ચેની વાતચીત ખૂબ જ સૂચક માનવામાં આવે છે.

વૈશ્વિક અર્થતંત્ર પર યુદ્ધની અસર:

સર્જિયો ગોરે વધુમાં જણાવ્યું હતું કે પીએમ મોદી અને ડોનાલ્ડ ટ્રમ્પ વચ્ચે પશ્ચિમ એશિયાની સ્થિતિને શાંત પાડવાના સંભવિત માર્ગો પર ચર્ચા થઈ છે. યુદ્ધને કારણે ઉર્જા ક્ષેત્ર અને સપ્લાય ચેઈન પર પડી રહેલી અસરો અંગે પણ ભારતે પોતાની ચિંતા વ્યક્ત કરી છે. હવે જોવાનું એ રહેશે કે ૨૨ એપ્રિલ પછી આ કામચલાઉ યુદ્ધવિરામ આગળ વધે છે કે ફરી એકવાર મધ્ય પૂર્વના દેશોમાં મિસાઈલોનો મારો શરૂ થાય છે. સમગ્ર વિશ્વની નજર અત્યારે વોશિંગ્ટન અને નવી દિલ્હીના રાજદ્વારી પગલાં પર ટકેલી છે.