અબુ ધાબી : વડાપ્રધાન નરેન્દ્રભાઈ મોદી શુક્રવારે પાંચ દેશોના તેમના મહત્વપૂર્ણ વિદેશ પ્રવાસના પ્રથમ ચરણમાં સંયુક્ત આરબ અમીરાત (UAE) ની રાજધાની અબુ ધાબી પહોંચ્યા હતા. વડાપ્રધાનના વિમાને જેવું યુએઈના એરસ્પેસમાં પ્રવેશ કર્યો કે તરત જ યુએઈ વાયુસેનાના F-16 લડાકુ વિમાનોએ તેમના વિમાનને એસ્કોર્ટ કરીને વિશેષ સન્માન આપ્યું હતું. અબુ ધાબી પહોંચતા જ વડાપ્રધાન નરેન્દ્રભાઈ મોદીને ભવ્ય 'ગાર્ડ ઓફ ઓનર' આપવામાં આવ્યું હતું, જે બંને દેશો વચ્ચેના ગાઢ સંબંધોની પ્રતીતિ કરાવે છે.

 ઉર્જા અને ટેકનોલોજીના ક્ષેત્રમાં નવા આયામો:

આ મુલાકાત દરમિયાન વડાપ્રધાન મોદી યુએઈના રાષ્ટ્રપતિ શેખ મોહમ્મદ બિન જાયદ અલ નાહયાન સાથે દ્વિપક્ષીય મંત્રણા કરશે. આ ઉચ્ચ સ્તરીય બેઠકમાં ઉર્જા સહયોગ, વેપાર, ટેકનોલોજી અને પ્રાદેશિક સુરક્ષા સહિતના પરસ્પર હિતના વિષયો પર વિસ્તૃત ચર્ચા કરવામાં આવશે. યુએઈના આંતરરાષ્ટ્રીય સહકાર રાજ્ય મંત્રી રીમ અલ હાશિમીએ વડાપ્રધાન મોદીને યુએઈના નેતૃત્વ અને જનતા માટે "સાચો ખજાનો" ગણાવ્યા હતા અને વિશ્વાસ વ્યક્ત કર્યો હતો કે આ મુલાકાતથી બંને દેશોના સંબંધો નવી ઊંચાઈઓને સ્પર્શશે.

 ૧૫ થી ૨૦ મે દરમિયાન પાંચ દેશોની વ્યસ્ત મુલાકાત:

વડાપ્રધાન નરેન્દ્રભાઈ મોદીનો આ વિદેશ પ્રવાસ અત્યંત વ્યસ્ત રહેવાનો છે. યુએઈ બાદ તેઓ નીચે મુજબના દેશોની મુલાકાત લેશે:

 *  નેધરલેન્ડ (૧૫-૧૭ મે):  વડાપ્રધાન અહી ડચ વડાપ્રધાન રોબ જેટ્ટન અને કિંગ વિલેમ-એલેક્ઝાન્ડરને મળશે. જેમાં સેમિકન્ડક્ટર, ગ્રીન હાઇડ્રોજન અને જળ વ્યવસ્થાપન જેવા વિષયો પર ધ્યાન કેન્દ્રિત કરવામાં આવશે.

 *  સ્વીડન (૧૭-૧૮ મે):  સ્વીડિશ પીએમ ઉલ્ફ ક્રિસ્ટરસન સાથે દ્વિપક્ષીય વાર્તા અને 'યુરોપિયન રાઉન્ડ ટેબલ ફોર ઇન્ડસ્ટ્રી'ને સંબોધન કરશે, જેમાં AI અને ઉભરતી ટેકનોલોજી પર ભાર મૂકવામાં આવશે.

 *  નોર્વે (૧૯ મે):  ઓસ્લોમાં વડાપ્રધાન ત્રીજી ભારત-નોર્ડિક સમિટમાં ભાગ લેશે, જેમાં ડેનમાર્ક, ફિનલેન્ડ, આઇસલેન્ડ અને સ્વીડનના નેતાઓ પણ હાજર રહેશે.

 *  ઈટાલી (૧૯-૨૦ મે):  પ્રવાસના અંતિમ ચરણમાં પીએમ મોદી ઈટાલીના વડાપ્રધાન જ્યોર્જિયા મેલોની અને રાષ્ટ્રપતિ સર્જિયો મેટરેલા સાથે મુલાકાત કરી સંરક્ષણ અને સ્વચ્છ ઉર્જા ક્ષેત્રે સહયોગ પર ચર્ચા કરશે.

 વ્યૂહાત્મક ભાગીદારી વધુ મજબૂત બનશે:

વડાપ્રધાનની આ મુલાકાત ભારતની વિદેશ નીતિ અને આર્થિક હિતો માટે અત્યંત મહત્વની માનવામાં આવી રહી છે. ખાસ કરીને યુએઈ સાથેના મજબૂત સંબંધો ભારતની ઉર્જા સુરક્ષા માટે નિર્ણાયક સાબિત થશે. વડાપ્રધાનની આ પાંચ દેશોની મુલાકાતથી યુરોપિયન અને આરબ દેશો સાથે ભારતના વેપાર અને સંરક્ષણ સંબંધોમાં એક નવો અધ્યાય જોડાવાની અપેક્ષા રાખવામાં આવી રહી છે. હાલમાં અબુ ધાબીમાં વડાપ્રધાનના ભવ્ય સ્વાગતથી સમગ્ર વિશ્વમાં ભારતના વધતા પ્રભાવનો સંકેત મળ્યો છે.