​રામનગર: ​બેંગલુરુ નજીકના બિડદીમાં સ્માર્ટ સિટી પ્રોજેક્ટ માટે જમીન સંપાદન અર્થે સર્વે કરવા ગયેલી સરકારી અધિકારીઓની ટીમને સ્થાનિક મહિલા ખેડૂતોના ઉગ્ર વિરોધનો સામનો કરવો પડ્યો હતો. જમીન માપણી માટે આવેલા સરકારી કર્મચારીઓ અને અધિકારીઓને મહિલાઓએ ઝાડુ મારીને ખેતરમાંથી બહાર નીકળી જવા મજબૂર કર્યા હતા, જેના કારણે ભારે હોબાળો મચી ગયો હતો.

​ઘટનાની વિગત મુજબ, સ્માર્ટ સિટી પ્રોજેક્ટના ભાગરૂપે જમીનનું સર્વેક્ષણ કરવા માટે વહીવટી તંત્ર દ્વારા એક ટીમ મોકલવામાં આવી હતી. આ ટીમ જ્યારે ખેતરોમાં માપણીનું કામ શરૂ કરવા માટે પહોંચી, ત્યારે સ્થાનિક મહિલાઓએ તેનો સખત વિરોધ નોંધાવ્યો હતો. મહિલા ખેડૂતોનું સ્પષ્ટપણે કહેવું છે કે, તેમની ફળદ્રુપ જમીન છીનવી લેવાના પ્રયાસો સામે તેઓ છેલ્લા ઘણા સમયથી લડત આપી રહ્યા છે.

​વિરોધ કરી રહેલી મહિલાઓએ સ્થળ પર આવેલા અધિકારીઓને ઘેરી લીધા હતા અને પ્રશ્ન કર્યો હતો કે, તેઓ કોના આદેશથી જમીન માપવા આવ્યા છે. જ્યારે અધિકારીઓ સંતોષકારક જવાબ આપી શક્યા નહીં અને કોઈ પણ પ્રકારનો લેખિત આદેશ રજૂ ન કરી શક્યા, ત્યારે મહિલાઓનો ગુસ્સો સાતમા આસમાને પહોંચ્યો હતો. આક્રોશમાં આવેલી મહિલાઓએ હાથમાં રહેલા ઝાડુ વડે અધિકારીઓ પર હુમલો કરી તેમને સ્થળ પરથી ખદેડી મૂક્યા હતા.

​મહિલા ખેડૂતોએ આક્રમક વલણ અપનાવતા ચીમકી ઉચ્ચારી હતી કે, 'અમને મૌખિક આદેશમાં રસ નથી. જ્યાં સુધી જિલ્લા કલેક્ટર (DC) દ્વારા હસ્તાક્ષરિત લેખિત આદેશ અમારી સમક્ષ રજૂ કરવામાં નહીં આવે, ત્યાં સુધી ગામની કોઈ પણ જમીન પર સર્વેક્ષણની કામગીરી કરવા દેવામાં આવશે નહીં.'

​આ ઘટનાને પગલે બિડદી વિસ્તારમાં તંગદિલીનો માહોલ સર્જાયો છે. ઘટનાની જાણ થતાં જ આસપાસના અન્ય ખેડૂતો પણ મોટી સંખ્યામાં એકઠા થઈ ગયા હતા અને સરકાર વિરોધી સૂત્રોચ્ચાર કર્યા હતા. ખેડૂતોનો આક્ષેપ છે કે પ્રશાસન પારદર્શિતા રાખ્યા વિના બળજબરીથી તેમની જમીન સંપાદન કરવાના પ્રયાસો કરી રહ્યું છે. હાલ આ મામલે વહીવટી તંત્ર દ્વારા કોઈ સત્તાવાર નિવેદન આપવામાં આવ્યું નથી, પરંતુ ખેડૂતોનો વિરોધ વધુ ઉગ્ર બનવાના એંધાણ વર્તાઈ રહ્યા છે.