નવી દિલ્હી, તા.26: ભારતીય રેલ્વે દરરોજ કરોડો મુસાફરોને તેમના ગંતવ્ય સ્થાન સુધી સુરક્ષિત પહોંચાડવા માટે અવિરત દોડતી રહે છે. જો કે, રેલ્વે પ્રવાસને ગમે તેટલો સુરક્ષિત બનાવવામાં આવે તો પણ ક્યારેક અણધારી આફત કે અકસ્માત જેવી દુર્ઘટનાઓ સર્જાતી હોય છે. આવી કટોકટીની સ્થિતિમાં મુસાફરો અને તેમના પરિવારો લાચાર ન બને અને તેમને મજબૂત આર્થિક ટેકો મળી રહે તે માટે રેલ્વે અને સરકાર દ્વારા ચોક્કસ વળતરના નિયમો બનાવવામાં આવ્યા છે. દરેક ટ્રેન મુસાફરે પોતાના અધિકારો અને આ વળતરની રકમ વિશે માહિતગાર હોવું ખૂબ જ જરૂરી છે.
માત્ર નજીવી ફી અને ₹10 લાખ સુધીનું સુરક્ષા કવચ!
જ્યારે પણ તમે IRCTC અથવા અન્ય ઓનલાઈન માધ્યમથી ટ્રેન ટિકિટ બુક કરો છો, ત્યારે એક નાનકડો 'ટ્રાવેલ ઈન્સ્યોરન્સ' (મુસાફરી વીમો) નો વિકલ્પ દેખાય છે. મોટાભાગના લોકો તેને અવગણી દે છે, પરંતુ અકસ્માત સમયે આ વીમો જાદુઈ લાકડી સાબિત થાય છે. આ વીમા યોજના હેઠળ અલગ-અલગ પરિસ્થિતિમાં નીચે મુજબ આર્થિક સહાય મળવાપાત્ર છે:
•    મૃત્યુના કિસ્સામાં: જો કોઈ મુસાફર ટ્રેન અકસ્માતમાં પોતાનો જીવ ગુમાવે છે, તો વીમા કંપની દ્વારા તેના નોમિની અથવા પરિવારને ₹10 લાખ સુધીનું પૂરેપૂરું વળતર આપવામાં આવે છે.
•    કાયમી સંપૂર્ણ અપંગતા: અકસ્માત એટલો ગંભીર હોય કે મુસાફર કાયમ માટે સંપૂર્ણપણે અપંગ થઈ જાય, તો પણ તેને જીવનનિર્વાહ માટે ₹10 લાખની સહાય ચૂકવવામાં આવે છે.
•    કાયમી આંશિક અપંગતા: જો દુર્ઘટનામાં મુસાફર શરીરનું કોઈ અંગ ગુમાવે અથવા આંશિક અપંગતાનો ભોગ બને, તો તેને ₹7.5 લાખ સુધીનું વળતર મળે છે.
•    હોસ્પિટલનો ખર્ચ: અકસ્માતમાં ઘાયલ થયેલા મુસાફરોની તાત્કાલિક સારવાર, દવાઓ અને હોસ્પિટલમાં દાખલ થવાના ખર્ચ પેટે રેલ્વે વીમા તરફથી ₹2 લાખ સુધીની રોકડ સહાય આપવામાં આવે છે.
સરકાર તરફથી મળતી વધારાની મસમોટી સહાય
આ મુસાફરી વીમા ઉપરાંત, જ્યારે પણ દેશમાં કોઈ મોટી ટ્રેન દુર્ઘટના બને છે ત્યારે કેન્દ્ર અને રાજ્ય સરકારો દ્વારા તાત્કાલિક ધોરણે વિશેષ રાહત પેકેજ જાહેર કરવામાં આવે છે. રેલ્વે મંત્રાલય દ્વારા મૃતકોના આશ્રિતોને અને ગંભીર રીતે ઈજાગ્રસ્ત થયેલા લોકોને ત્વરિત આર્થિક સહાય પૂરી પાડવામાં આવે છે. આ સાથે જે તે રાજ્ય સરકાર પણ પોતાના સ્તરેથી મૃતકોના પરિવારોને વળતર, સરકારી નોકરીની જાહેરાત કે ઘાયલોને શ્રેષ્ઠ હોસ્પિટલોમાં તદ્દન મફત સારવાર જેવી સુવિધાઓ આપે છે.
તેથી, હવે જ્યારે પણ તમે ટ્રેનની મુસાફરીનું આયોજન કરો, ત્યારે ટિકિટ બુકિંગ દરમિયાન વીમા (Insurance)ના બોક્સ પર ટિક કરવાનું ક્યારેય ન ભૂલતા. તમારો આ એક નાનો નિર્ણય અણધારી પરિસ્થિતિમાં તમારા પરિવાર માટે ઢાલ બની શકે છે.