​અયોધ્યા: ​અયોધ્યામાં રામ જન્મભૂમિ તીર્થ ક્ષેત્ર ટ્રસ્ટ દ્વારા સંચાલિત ભવ્ય રામ મંદિરમાં આવેલ ભક્તોના દાનમાં થયેલી કથિત ઉચાપતની તપાસ હવે ગંભીર વળાંક પર પહોંચી છે. આ ગંભીર મામલે ઉત્તર પ્રદેશ પોલીસ દ્વારા ટીન્નુ યાદવ નામના વ્યક્તિને કસ્ટડીમાં લેવામાં આવ્યો છે. ટીન્નુ યાદવની ધરપકડ અને પોલીસ કસ્ટડીની આ કાર્યવાહીને અત્યંત મહત્વની માનવામાં આવી રહી છે, કારણ કે તે શ્રી રામ જન્મભૂમિ તીર્થ ક્ષેત્ર ટ્રસ્ટના પૂર્વ મહાસચિવ ચંપત રાયના ખૂબ જ નજીકના ગણાતા હતા.

​પ્રાપ્ત અહેવાલો અનુસાર, ટીન્નુ યાદવ ઉપર રામ મંદિર પરિસરમાં રાખવામાં આવતી દાન પેટીઓનું સંચાલન કરવાની જવાબદારી હતી. તપાસ એજન્સીઓને એવી શંકા છે કે, મંદિર પરિસરમાં આવતા ભક્તોના દાનની રકમમાં મોટાપાયે ગેરરીતિ આચરવામાં આવી છે. આ તપાસમાં મનીષ નામના અન્ય એક વ્યક્તિનું નામ પણ સામે આવ્યું છે, જેઓ દાનમાં આવેલી રકમની ગણતરીની પ્રક્રિયામાં સંકળાયેલા હતા.

​પોલીસ સૂત્રોના જણાવ્યા અનુસાર, અત્યાર સુધીની પ્રાથમિક તપાસમાં દાનની રકમની હેરાફેરીના ચોક્કસ પુરાવાઓ એકત્રિત કરવા પર ધ્યાન કેન્દ્રિત કરવામાં આવ્યું છે. ટીન્નુ યાદવ મંદિરના વહીવટી અને દાન વ્યવસ્થાપન સાથે સીધો જોડાયેલો હોવાથી, આ ઉચાપતની ઘટનામાં કોની કોની સંડોવણી છે અને આ પૈસા ક્યાં ગયા, તે બાબતે પોલીસ દ્વારા સઘન પૂછપરછ કરવામાં આવી રહી છે.

​આ સમગ્ર પ્રકરણ બહાર આવતા જ ભક્તો અને ટ્રસ્ટની વિશ્વસનીયતા પર પ્રશ્નો ઊભા થયા છે. તીર્થ ક્ષેત્ર ટ્રસ્ટના પૂર્વ મહાસચિવ સાથે નજીકનો સંબંધ હોવાથી, આ તપાસ આગામી દિવસોમાં વધુ મોટા નામો સુધી પહોંચે તેવી પૂરેપૂરી શક્યતા છે. યુપી પોલીસ આ કેસને લઈને અત્યંત સતર્ક છે અને આર્થિક ગેરરીતિના દરેક પાસાઓને તપાસી રહી છે. સમગ્ર મામલો અયોધ્યામાં ચર્ચાનો વિષય બન્યો છે, ત્યારે હવે પોલીસ તપાસમાં કયા નવા ખુલાસા થાય છે, તેના પર સૌની નજર ટકેલી છે.