મુંબઈ, તા. 03: તાજેતરમાં મીડિયાના કેટલાક અહેવાલોમાં દાવો કરવામાં આવ્યો હતો કે, યુએસ-ઈરાન સંઘર્ષ અને આર્થિક દબાણ વચ્ચે રૂપિયાને ટેકો આપવા માટે રિઝર્વ બેંક ઓફ ઈન્ડિયા (RBI) એ આશરે $12 બિલિયનનું સોનું વેચી દીધું છે. આ અહેવાલોએ શેરબજાર અને આર્થિક વર્તુળોમાં ભારે ચર્ચા જગાવી હતી. જોકે, RBI એ બુધવારે આ તમામ અટકળોને સદંતર નકારી કાઢી છે અને તેને ખોટી ગણાવી છે.
RBI એ આપ્યો સ્પષ્ટ ખુલાસો
રિઝર્વ બેંકે એક સત્તાવાર પ્રેસ રિલીઝમાં સ્પષ્ટ કર્યું છે કે, સોનાના વેચાણ અંગેના અહેવાલોમાં કોઈ સત્ય નથી. કેન્દ્રીય બેંકે પોતાના માસિક બુલેટિનનો હવાલો આપતા જણાવ્યું હતું કે, ભારતનો ભૌતિક સોનાનો સ્ટોક હાલમાં 880.52 ટન છે, જે સ્થિર છે અને તેમાં કોઈ ઘટાડો કરવામાં આવ્યો નથી. RBI એ જનતાને સલાહ આપી છે કે આવી મહત્વની બાબતોમાં માત્ર સત્તાવાર પ્રકાશિત માહિતી પર જ ભરોસો રાખવો.
PIB દ્વારા ફેક્ટ ચેક: બ્લૂમબર્ગનો દાવો ખોટો
પ્રેસ ઇન્ફોર્મેશન બ્યુરો (PIB) ના ફેક્ટ-ચેક યુનિટે પણ આ અહેવાલનું ખંડન કર્યું છે. PIB એ જણાવ્યું કે, બ્લૂમબર્ગનો અહેવાલ જેમાં RBI દ્વારા $12 બિલિયનનું સોનું વેચવાનો દાવો કરાયો હતો, તે સંપૂર્ણપણે ખોટો છે. ઉલટું, સપ્ટેમ્બર 2025 ના અંતમાં જે સોનાનો હિસ્સો 13.92 ટકા હતો, તે વધીને 22 મે, 2026 સુધીમાં 16.85 ટકા સુધી પહોંચ્યો છે.
શું હતો સમગ્ર મામલો?
બ્લૂમબર્ગના એક અહેવાલમાં એવું અનુમાન લગાવવામાં આવ્યું હતું કે 22 મેના રોજ પૂરા થયેલા પખવાડિયા દરમિયાન RBI એ સોનાના ભંડારમાં ઘટાડો કર્યો છે. આ વિશ્લેષણમાં એવો તર્ક આપવામાં આવ્યો હતો કે સોનાના ભાવ અને ડ્યુટીમાં વધારો હોવા છતાં, જો હોલ્ડિંગમાં દેખીતો ઘટાડો જણાય તો તે વેચાણ તરફ નિર્દેશ કરે છે. જોકે, RBI ના સત્તાવાર આંકડાઓએ આ તર્કને ખોટો સાબિત કરી દીધો છે.
સોનું પરત લાવવાનું વલણ
ઉલ્લેખનીય છે કે, વિશ્વભરની અનેક સેન્ટ્રલ બેંકો હવે પોતાની અનામત સંપત્તિને સુરક્ષિત રાખવા માટે સોનાને પરત લાવી રહી છે. RBI ના તાજેતરના અહેવાલો મુજબ, ભારતનું લગભગ 77 ટકા સોનું હવે ભારતમાં જ સંગ્રહિત છે, જે અગાઉના છ મહિનામાં 66 ટકા હતું. આ ફેરફાર વૈશ્વિક અસ્થિરતા વચ્ચે સુરક્ષિત રોકાણ તરીકે સોનાના મહત્વને દર્શાવે છે.