નવી દિલ્હી : જો તમે પણ આગામી દિવસોમાં સુંદર દરિયાકિનારા અને જ્વાળામુખી ધરાવતા પ્રખ્યાત પ્રવાસન દેશ ઇન્ડોનેશિયા કે રોમેન્ટિક ટાપુ બાલી (Bali) જવાનો પ્લાન બનાવી રહ્યા છો, તો આ સમાચાર તમારા માટે અત્યંત જરૂરી છે. બાલી સ્થિત ભારતના કોન્સ્યુલેટ જનરલ (ભારતીય દૂતાવાસ) દ્વારા ભારતીય પ્રવાસીઓની સુરક્ષા અને સુવિધા માટે એક વિશેષ એડવાઇઝરી જાહેર કરવામાં આવી છે. દૂતાવાસે સ્પષ્ટ ચેતવણી આપી છે કે જો તમારી પાસે પૂરતા દસ્તાવેજો કે પ્રવાસની સ્પષ્ટ વિગતો નહીં હોય, તો ત્યાંના ઇમિગ્રેશન અધિકારીઓ તમને એરપોર્ટ પરથી જ પ્રવેશ આપવાનો ઇનકાર કરીને પરત દેશનિકાલ (Deport) કરી શકે છે. ફક્ત વિઝા ઓન અરાઇવલ (VOA) હોવો એ ઇન્ડોનેશિયામાં એન્ટ્રીની ગેરંટી નથી.

એરપોર્ટ પર ઉતરતા પહેલાં આ ૬ દસ્તાવેજો બેગમાં હોવા જ જોઈએ

ભારતીય દૂતાવાસની ગાઇડલાઇન અનુસાર, દરેક પ્રવાસી પાસે નીચે મુજબના દસ્તાવેજો હેન્ડબેગમાં તૈયાર હોવા જોઈએ:

· મુસાફરીની તારીખથી ઓછામાં ઓછી ૬ મહિનાથી વધુની માન્યતા ધરાવતો અસલ પાસપોર્ટ.

· માન્ય વિઝા અથવા ઇલેક્ટ્રોનિક વિઝા ઓન અરાઇવલ (e-VOA).

· ભારત પરત ફરવાની કે અન્ય કોઈ દેશમાં આગળ જવા માટેની કન્ફર્મ રિટર્ન ટિકિટ.

· હોટેલ બુકિંગ અથવા તમે જ્યાં રોકાવાના છો તે રહેઠાણનું પાકું સરનામું અને સંપર્ક નંબર.

· તમારા પ્રવાસના રોકાણ દરમિયાન થનારા તમામ ખર્ચને પહોંચી વળવા માટે પૂરતા ભંડોળ (રોકડ અથવા કાર્ડ) નો પુરાવો.

· તમે ત્યાં શા માટે આવ્યા છો (પ્રવાસન, બિઝનેસ કે અન્ય) તેની ઇમિગ્રેશન કાઉન્ટર પર સ્પષ્ટ અને વિશ્વસનીય સમજૂતી આપવાની તૈયારી.

મોંઘી મેડિકલ સારવાર અને ટ્રાફિકના કડક નિયમો

બાલીમાં મોટી સંખ્યામાં પ્રવાસીઓ ટૂ-વ્હીલર અથવા સ્કાઈ ડ્રાઇવિંગ માટે વાહનો ભાડે લેતા હોય છે. દૂતાવાસે સલાહ આપી છે કે વાહન ચલાવવા માટે તમારી પાસે ‘આંતરરાષ્ટ્રીય ડ્રાઇવિંગ લાઇસન્સ’ (International Driving License) હોવું ફરજિયાત છે અને હેલ્મેટ પહેરવું અનિવાર્ય છે. ઇન્ડોનેશિયામાં તબીબી અને હોસ્પિટલનો ખર્ચ ખૂબ જ મોંઘો હોવાથી પર્યાપ્ત તબીબી અને ટ્રાવેલ ઇન્સ્યોરન્સ લઈને જ પ્રવાસ શરૂ કરવો હિતાવહ છે. આ ઉપરાંત, ભીડભાડ વાળા વિસ્તારોમાં મોટી માત્રામાં રોકડ કે કિંમતી દાગીના પહેરીને ફરવાનું ટાળવું અને મોબાઈલ-પાકીટ જેવા વ્યક્તિગત સામાનને હોટેલના લોકરમાં સુરક્ષિત રાખવો.

બીચ અને ખડકો પર સેલ્ફી લેતા પહેલાં સાવધાન!

બાલીના સુંદર દરિયાકિનારા અને પહાડી ખડકો આકર્ષક જરૂર છે, પરંતુ ત્યાં પૂરતા પ્રમાણમાં ચેતવણીના બોર્ડ મારેલા હોતા નથી. સમુદ્રમાં સ્વિમિંગ કે વોટર સ્પોર્ટ્સ પ્રવૃત્તિઓ કરતી વખતે ભારે સાવચેતી રાખવી. ખાસ કરીને ઊંચા ખડકો (Cliffs) ની ધાર પર જઈને સેલ્ફી કે વીડિયો ઉતારવાના ચક્કરમાં જીવનું જોખમ ન ખેડવા વિનંતી કરાઈ છે. જો તમે બાલીના ભીડભાડ વાળા વિસ્તારોથી દૂર જવા માંગતા હોવ, તો જાવામાં આવેલા બૌદ્ધ મંદિરો, રાજા અમ્પટના કોરલ રીફ, સક્રિય જ્વાળામુખી અથવા બોર્નિયોના વર્ષાવનોની મુલાકાત લઈ શકો છો.

પ્રવાસી રિશ્તા પોર્ટલ પર નોંધણી કરાવવા અપીલ

ઇન્ડોનેશિયામાં કાયમી કે લાંબા સમય માટે વસતા ભારતીય નાગરિકો અને ત્યાં અભ્યાસ કરતા ભારતીય વિદ્યાર્થીઓને ભારત સરકારના સત્તાવાર ‘વૈશ્વિક પ્રવાસી રિશ્તા પોર્ટલ’ (Global Pravasi Rishta Portal) પર તાત્કાલિક નોંધણી કરાવવા માટે ખાસ આગ્રહ કરવામાં આવ્યો છે. વિદેશ મંત્રાલય (MEA) દ્વારા સંચાલિત આ પોર્ટલ વિદેશમાં વસતા ભારતીય સમુદાય વચ્ચે કનેક્ટિવિટી મજબૂત કરે છે. આ ડેટાબેઝ અપડેટ રાખવાથી ભવિષ્યમાં કોઈ મોટી કુદરતી આફત, કટોકટી કે યુદ્ધ જેવી આપત્તિજનક સ્થિતિના સમયે ભારતીય દૂતાવાસ સમુદાયના સભ્યો સુધી ખૂબ જ ઝડપથી પહોંચીને તમામ પ્રકારની કોન્સ્યુલર સહાય અને મદદ પૂરી પાડી શકશે.