જામનગર તા. ૨ (મુકુંદ બદીયાણી) : રિલાયન્સ ઇન્ડસ્ટ્રીઝની એફએમસીજી કંપની રિલાયન્સ કન્ઝ્યુમર પ્રોડક્ટ્સે પોતાની ‘ઇન્ડિપેન્ડન્સ’ બ્રાન્ડ હેઠળ બિસ્કિટની ૯ વેરાયટી અને ૨૮ નવા પેકિંગ વિકલ્પો રજૂ કર્યા છે. તમિલનાડુમાં ૨ નવેમ્બરથી શરૂ થયેલા વેચાણમાં રૂ. ૫થી રૂ. ૧૨૫ સુધીના પેક ઉપલબ્ધ બનશે. કંપનીએ ‘પાવર અપ’ બિસ્કિટના પ્રચાર માટે અજિત કુમાર રેસિંગ સાથે બ્રાન્ડ જોડાણ કર્યું છે.

રિલાયન્સ ઇન્ડસ્ટ્રીઝ લિમિટેડની એફએમસીજી શાખા રિલાયન્સ કન્ઝ્યુમર પ્રોડક્ટ્સ લિમિટેડ (આરસીપીએલ)એ બિસ્કિટ બજારમાં પોતાની હાજરી વધુ મજબૂત બનાવવા ‘ઇન્ડિપેન્ડન્સ’ બ્રાન્ડ હેઠળ નવ વેરાયટીનું વિસ્તરણ જાહેર કર્યું છે. તમિલનાડુમાં આજથી આ નવા ઉત્પાદનો ઉપલબ્ધ કરાવવામાં આવ્યા છે.

કંપનીના નવા પોર્ટફોલિયોમાં ઇન્ડિપેન્ડન્સ પાવર અપ, બટર બ્લિસ, મિલ્કી પાવર, મેરી પ્રાઇમ, કોકો વેનિલા એન્ડ ચોકલેટ, ક્રીમયમ ઓરેન્જ, ક્રીમયમ ચોકો, કોકો બોર્બન અને ગ્લુકોઝ બૂસ્ટનો સમાવેશ થાય છે. કુલ ૨૮ નવા પેકિંગ વિકલ્પોમાં રૂ. ૫ના ટ્રાયલ પેક, રૂ. ૧૦ના શેરિંગ પેક તથા રૂ. ૪૦થી રૂ. ૧૨૫ સુધીના ફેમિલી પેક મળશે.

કંપનીના ડિરેક્ટર ટી. કૃષ્ણકુમારે જણાવ્યું હતું કે તમિલનાડુ બિસ્કિટ વ્યવસાય માટે મહત્ત્વપૂર્ણ બજાર છે. ગ્રાહકોની બદલાતી પસંદગી અને જરૂરિયાતોને ધ્યાનમાં રાખીને પોર્ટફોલિયો વિસ્તૃત કરવામાં આવ્યો છે. દૂધ, ગ્લુકોઝ અને પ્રોટીનનું સંયોજન ધરાવતા ‘પાવર અપ’ બિસ્કિટને વિશેષ મહત્ત્વ આપવામાં આવ્યું છે.

કંપનીએ આ ઉત્પાદનના પ્રચાર માટે અભિનેતા અજિત કુમારની ‘અજિત કુમાર રેસિંગ’ ટીમ સાથે બ્રાન્ડ જોડાણ કર્યું છે. નવા બિસ્કિટ સામાન્ય દુકાનો, સુપરમાર્કેટ, ઇ-કોમર્સ, રિલાયન્સ રિટેલ તથા જથ્થાબંધ વેચાણ માધ્યમો દ્વારા ઉપલબ્ધ થશે.

રિલાયન્સ કન્ઝ્યુમર પ્રોડક્ટ્સ ‘ઇન્ડિપેન્ડન્સ’ ઉપરાંત શ્રીલંકાની જાણીતી બિસ્કિટ ઉત્પાદક કંપની ‘માલિબાન’ સાથેની ભાગીદારી દ્વારા પ્રીમિયમ બિસ્કિટ બજારમાં પણ પોતાનું સ્થાન મજબૂત બનાવી રહી છે.

રિલાયન્સ કન્ઝ્યુમર પ્રોડક્ટ્સ ‘ઇન્ડિપેન્ડન્સ’ ઉપરાંત શ્રીલંકાની જાણીતી બિસ્કિટ ઉત્પાદક કંપની ‘માલિબાન’ સાથેની ભાગીદારી દ્વારા પ્રીમિયમ બિસ્કિટ બજારમાં પણ પોતાનું સ્થાન મજબૂત બનાવી રહી છે