નવી દિલ્હી : ભારતના વિદેશ મંત્રી એસ. જયશંકરે આજે બ્રિક્સ (BRICS) વિદેશ મંત્રીઓના સંમેલનમાં અમેરિકા અને પશ્ચિમી દેશોની પ્રતિબંધો આધારિત વિદેશ નીતિ પર આકરા પ્રહાર કર્યા છે. કોઈ પણ દેશનું સીધું નામ લીધા વિના, તેમણે "એકપક્ષીય બળજબરીભર્યા પગલાં" સામે ચેતવણી આપતા કહ્યું કે, આંતરરાષ્ટ્રીય કાયદાને અવગણીને લાદવામાં આવતા પ્રતિબંધો વિકાસશીલ રાષ્ટ્રોની કમર તોડી નાખે છે. આ ગેરવાજબી પગલાં ક્યારેય સંવાદ કે રાજદ્વારી સંબંધોનું સ્થાન લઈ શકે નહીં.
 
પશ્ચિમ એશિયાની નાજુક સ્થિતિ અને વૈશ્વિક જોખમ
વિદેશ મંત્રીએ પશ્ચિમ એશિયા (મિડલ ઈસ્ટ) માં વધી રહેલા તણાવ અને તેની વૈશ્વિક અસરો પર ઊંડી ચિંતા વ્યક્ત કરી હતી. તેમણે ખાસ કરીને હોર્મુઝ સ્ટ્રેટ અને લાલ સમુદ્ર જેવા મુખ્ય શિપિંગ રૂટ પરના જોખમો વિશે ચેતવણી આપી હતી. જયશંકરે ભારપૂર્વક કહ્યું કે, "ઉર્જા માળખાગત સુવિધાઓ અને દરિયાઈ ટ્રાફિકમાં વિક્ષેપ વૈશ્વિક આર્થિક સ્થિરતા માટે મોટું જોખમ છે. સ્થિરતા પસંદગીયુક્ત ન હોઈ શકે અને શાંતિ ટુકડાઓમાં વહેંચાયેલી ન હોવી જોઈએ."
 
ગાઝામાં યુદ્ધવિરામ અને માનવતાવાદી સહાયની હાકલ
ગાઝાની પરિસ્થિતિ અંગે બોલતા જયશંકરે તાત્કાલિક અને સતત યુદ્ધવિરામ, માનવતાવાદી પહોંચ અને 'ટુ-સ્ટેટ સોલ્યુશન' (બે-રાજ્ય ઉકેલ) તરફ પ્રગતિ કરવા માટે આહવાન કર્યું હતું. આ ઉપરાંત તેમણે લેબનોન, સીરિયા, સુદાન, યમન અને લિબિયાની કટોકટીનો પણ ઉલ્લેખ કર્યો અને વિશ્વને આ સમસ્યાઓના ઉકેલ માટે સંકલિત પ્રયાસો કરવા આગ્રહ કર્યો હતો. ભારત આ ક્ષેત્રમાં તણાવ ઘટાડવા માટે દરેક સંભવિત મદદ કરવા તૈયાર હોવાનું પણ તેમણે ઉમેર્યું હતું.
 
આતંકવાદ સામે લાલ આંખ: ‘શૂન્ય સહિષ્ણુતા’ જ એકમાત્ર રસ્તો
આતંકવાદના મુદ્દે ભારતનું કડક વલણ દોહરાવતા જયશંકરે કહ્યું કે, "સીમાપાર આતંકવાદ આંતરરાષ્ટ્રીય સંબંધોના મૂળભૂત સિદ્ધાંતોનું ઘોર ઉલ્લંઘન છે. આતંકવાદ સામે શૂન્ય સહિષ્ણુતા (ઝીરો ટોલરન્સ) એ વૈશ્વિક ધોરણ હોવું જોઈએ અને તેમાં કોઈ પણ પ્રકારનું સમાધાન ચાલી શકે નહીં."
 
વૈશ્વિક નેતાઓની ઉપસ્થિતિમાં ભારતનું યજમાનપદ
ભારત દ્વારા આયોજિત આ મહત્વપૂર્ણ બેઠકમાં રશિયાના સેર્ગેઈ લવરોવ, ઈરાનના અબ્બાસ અરાઘચી, બ્રાઝિલના મૌરો વિએરા સહિત અનેક પ્રભાવશાળી દેશોના વિદેશ મંત્રીઓએ ભાગ લીધો હતો. આ સંમેલન એવા સમયે યોજાયું છે જ્યારે વિશ્વ ઉર્જા પુરવઠામાં વિક્ષેપ અને આર્થિક અનિશ્ચિતતાનો સામનો કરી રહ્યું છે. જયશંકરના આ નિવેદને ફરી એકવાર સાબિત કર્યું છે કે ભારત હવે વૈશ્વિક મંચ પર દક્ષિણના દેશો (Global South) ના અવાજ તરીકે મજબૂતીથી ઉભરી રહ્યું છે.