કિશ્તવાડ: જમ્મુ અને કાશ્મીરના કિશ્તવાડ જિલ્લાના દછન વિસ્તારમાં શનિવારે સવારે સીએનાબ નદી પર સર્જાયેલા એક ગમખ્વાર માર્ગ અકસ્માતમાં મહિન્દ્રા સ્કોર્પિયો કાર નદીમાં પડી જવાથી પાંચ વ્યક્તિઓનાં કમકમાટીભર્યા મોત નિપજ્યા છે.

ઘટનાની વિગત મુજબ, નોંધણી નંબર HR29AG-0648 ધરાવતી સ્કોર્પિયો કાર ડાંગદારુથી સૌંદર તરફ જઈ રહી હતી તે દરમિયાન સવારે અંદાજે ૧૦:૪૫ વાગ્યે ડાંગદારુના યાનવાન નજીકચાલકનો વાહન પરથી કાબૂ ગુમાવાતા કાર અચાનક રસ્તા પરથી લપસીને ઊંડી ચેનાબ નદીમાં ખાબકી હતી. આ ભયાનક દુર્ઘટનાની જાણ થતાની સાથે જ સ્થાનિક રહેવાસીઓ અને દછન પોલીસ સ્ટેશનની ટીમ તાત્કાલિક ઘટનાસ્થળે દોડી આવી હતી અને યુદ્ધના ધોરણે બચાવ કામગીરી શરૂ કરી હતી.

પોલીસ અને રાહત ટીમ દ્વારા ચલાવાયેલા સર્ચ ઓપરેશન દરમિયાન અત્યાર સુધીમાં ઘટનાસ્થળેથી પાંચ મૃતદેહો બહાર કાઢવામાં આવ્યા છે, જોકે અકસ્માત સમયે વાહનમાં કુલ કેટલા મુસાફરો સવાર હતા તે અંગે હજુ સુધી સત્તાવાર પુષ્ટિ થઈ શકી નથી. તંત્ર દ્વારા મૃતકોની ઓળખ કરવાની પ્રક્રિયા હાલમાં ચાલી રહી છે તેમજ નદીમાં અન્ય કોઈ વ્યક્તિ ફસાયેલી છે કે કેમ તેની તપાસ માટે વધારાની ટીમો તૈનાત કરવામાં આવી છે.

આ દુર્ઘટનાએ પર્વતીય વિસ્તારોમાં ખરાબ રસ્તાઓ અને ડ્રાઇવિંગ દરમિયાન થતી બેદરકારીના ગંભીર જોખમો તરફ ફરી એકવાર ધ્યાન ખેંચ્યું છે. વહીવટી તંત્ર દ્વારા મૃતકોના પરિવારજનોને સહાય આપવાની સાથે આ માર્ગ પર સુરક્ષાના પગલાં વધુ કડક બનાવવા અંગેની સમીક્ષા હાથ ધરવામાં આવી રહી છે.