નવી દિલ્હી તા.23 : દિલ્હીમાં ચૂંટણી પંચની ઓફિસ પાસે પ્રદર્શનકારીઓ એકઠા થવાની ઘટના બાદ રાજધાનીમાં સુરક્ષા વ્યવસ્થા વધુ કડક બનાવવામાં આવી છે. કેન્દ્ર સરકાર દ્વારા કેન્દ્રીય સશસ્ત્ર પોલીસ દળો એટલે કે CAPF ની 273 કંપનીઓની તૈનાતી 31 ઓક્ટોબર સુધી લંબાવવાનો નિર્ણય લેવામાં આવ્યો છે.

પ્રાપ્ત વિગતો મુજબ છેલ્લા કેટલાક દિવસોથી ચૂંટણી પંચની કામગીરી અને મતદાર યાદી સહિતના મુદ્દાઓને લઈને વિવિધ સંગઠનો અને રાજકીય પક્ષોના કાર્યકરો દ્વારા દિલ્હીમાં વિરોધ પ્રદર્શન કરવામાં આવી રહ્યું છે. આજે મોટી સંખ્યામાં પ્રદર્શનકારીઓ ચૂંટણી પંચની ઓફિસ પાસે એકઠા થતા પોલીસે ભારે બંદોબસ્ત ગોઠવ્યો હતો અને કોઈ અનિચ્છનીય ઘટના ન બને તે માટે બેરિકેડિંગ કરી દેવામાં આવ્યું હતું.

આ સ્થિતિને ધ્યાનમાં રાખીને ગૃહ મંત્રાલયે રાજધાનીમાં કાયદો અને વ્યવસ્થા જાળવવા અને ચૂંટણી પ્રક્રિયા શાંતિપૂર્ણ રીતે પૂર્ણ થાય તે સુનિશ્ચિત કરવા માટે પહેલાથી તૈનાત 273 કંપનીઓને હાલ પૂરતી પરત ન બોલાવવાનો અને તેમની તૈનાતી 31 ઓક્ટોબર સુધી ચાલુ રાખવાનો આદેશ આપ્યો છે. આ દળોમાં CRPF, BSF, CISF અને ITBP ના જવાનો સામેલ છે.

અધિકારીઓના જણાવ્યા અનુસાર આગામી દિવસોમાં તહેવારો અને સંવેદનશીલ વિસ્તારોમાં સુરક્ષાને લઈને પણ આ નિર્ણય મહત્વનો છે.