નવી દિલ્હી, તા. 28: કોંગ્રેસના સાંસદ અને તેમના અંગ્રેજી શબ્દભંડોળ માટે જાણીતા શશિ થરૂર સોશિયલ મીડિયા પર અવારનવાર કંઈક નવું શેર કરતા રહે છે. પરંતુ આ વખતે ચર્ચાનો વિષય તેમનું કોઈ ભાષણ નહીં, પણ તેમના નિવાસસ્થાને પધારેલા એક અણધાર્યા મહેમાન છે. થરૂરે તેમના ઘરના ઓફિસ પરિસરમાં આવેલા મંદિર પાસે ફરતા એક અત્યંત સુંદર મોરનો વીડિયો શેર કર્યો છે, જે ઈન્ટરનેટ પર જોરદાર વાયરલ થઈ રહ્યો છે.
જ્યારે 'નેચર' અને 'સ્પિરિચ્યુઆલિટી'નો થયો સંગમ
વીડિયોમાં જોઈ શકાય છે કે એક મોર થરૂરના ઘરના મંદિર પાસે ખૂબ જ શાંતિથી લટાર મારી રહ્યો છે. આ દ્રશ્ય જોઈને મંત્રમુગ્ધ થયેલા શશિ થરૂરે મજાકમાં ટિપ્પણી કરી હતી કે, "આ ખૂબ જ હેન્ડસમ મોર છે અને તે દેખીતી રીતે જ 'શિવભક્ત' છે, કારણ કે તે બરાબર મંદિર પાસે જ ઉભો છે." આ વીડિયોમાં કુદરત અને આધ્યાત્મિકતાનો સુંદર સમન્વય જોવા મળ્યો હતો.
વાદળી કુર્તામાં સાંસદ અને મોરનું 'ટ્વિનિંગ'
આ વીડિયોમાં સૌથી વધુ ધ્યાન ખેંચનારી બાબત એ હતી કે શશિ થરૂરે પહેરેલો વાદળી રંગનો કુર્તો અને મોરના પીંછાનો રંગ એકદમ મળતા આવતા હતા. થરૂરે આ વાતને 'ટ્વિનિંગ' (એકસરખા કપડાં) ગણાવતા રમૂજી કૅપ્શન લખ્યું હતું કે, "આ હેન્ડસમ મિત્ર સાથે હું મેચિંગ થઈ ગયો છું." વીડિયોના અંતે થરૂર ખૂબ જ પ્રેમાળ રીતે મોરને 'ગુડબાય' પણ કહે છે.
નેટિઝન્સે કરી કોમેન્ટ્સની રમઝટ
આ વીડિયો શેર થયાની ગણતરીની મિનિટોમાં જ લાખો વ્યૂઝ મળી ગયા હતા. યુઝર્સે કોમેન્ટ્સમાં રમૂજ કરતા લખ્યું હતું કે, "મોર પણ કદાચ શશિ થરૂર પાસે નવા અંગ્રેજી શબ્દો શીખવા આવ્યો હશે!" એક યુઝરે લખ્યું, "મોરને લાગ્યું હશે કે આખા કમ્પાઉન્ડમાં તે સૌથી સુંદર છે, પણ થરૂરને મેચિંગ કપડામાં જોઈને તેણે હાર માની લીધી." જ્યારે અન્ય એક યુઝરે 'જસ્ટ લુકિંગ લાઈક અ વાવ' મીમ સાથે સાંસદના લુકના વખાણ કર્યા હતા.
શશિ થરૂરનો આ અંદાજ ફરી એકવાર સાબિત કરે છે કે રાજકારણના વ્યસ્ત શિડ્યુલ વચ્ચે પણ તેઓ પ્રકૃતિ અને હળવી પળો માટે સમય કાઢવાનું ભૂલતા નથી.