ટોરોન્ટો : કેનેડાના ઓન્ટેરિયો પ્રાંતના વુડસ્ટોક શહેરમાં એક શીખ વૃદ્ધ પર વંશીય હુમલો થવાની આઘાતજનક ઘટના સામે આવી છે. ૨૨ એપ્રિલના રોજ બનેલી આ ઘટનામાં એક ઉદ્ધત યુવકે રસ્તા પર ચાલતા જઈ રહેલા શીખ વૃદ્ધને વંશીય અપશબ્દો કહીને શારીરિક રીતે હેરાન કર્યા હતા. આ ઘટનાના વીડિયો સોશિયલ મીડિયા પર વાયરલ થતાં કેનેડામાં રહેતા ભારતીય સમુદાય અને શીખ સંગઠનોમાં ભારે રોષ જોવા મળી રહ્યો છે.
"તમે અહીંના નથી" કહીને કર્યો હુમલો
વુડસ્ટોક પોલીસના જણાવ્યા અનુસાર, પીડિત વૃદ્ધ ફૂટપાથ પર શાંતિથી ચાલી રહ્યા હતા ત્યારે એક યુવક તેમની પાસે આવ્યો અને તેમને જોરદાર ધક્કો માર્યો હતો. કોઈ પણ ઉશ્કેરણી વગર કરવામાં આવેલા આ હુમલા દરમિયાન યુવકે બૂમો પાડીને કહ્યું હતું કે, "તમે અહીંના નથી, મારા દેશમાંથી અત્યારે જ બહાર નીકળી જાવ." વીડિયોમાં સ્પષ્ટ દેખાય છે કે યુવક સતત વંશીય ગાળો અને અપશબ્દોનો પ્રયોગ કરી રહ્યો હતો. જોકે, સદનસીબે વૃદ્ધને કોઈ ગંભીર શારીરિક ઈજા થઈ નથી.
પોલીસે આરોપીની કરી ધરપકડ
હુમલો કર્યા બાદ યુવક નજીકની ટર્ટલ આઈલેન્ડ સ્કૂલની વાડ કૂદીને ભાગી ગયો હતો. જોકે, પોલીસે ત્વરિત કાર્યવાહી કરીને આ નફરતથી પ્રેરિત હુમલાના ગુનામાં યુવકની ધરપકડ કરી લીધી છે. વુડસ્ટોક પોલીસે નિવેદન આપતા જણાવ્યું કે, "અમારા સમુદાયમાં નફરતને કોઈ સ્થાન નથી. અમે દરેક નાગરિકની સુરક્ષા માટે કટિબદ્ધ છીએ અને હેટ ક્રાઈમ કરનારાઓને છોડવામાં આવશે નહીં." આરોપીને હાલ કસ્ટડીમાં રાખીને તેની સામે કાયદેસરની કાર્યવાહી હાથ ધરવામાં આવી છે.
વર્લ્ડ શીખ ઓર્ગેનાઈઝેશન (WSO) નો પ્રતિસાદ
આ ઘટના અંગે વર્લ્ડ શીખ ઓર્ગેનાઈઝેશને 'એક્સ' (X) પર ચિંતા વ્યક્ત કરતા જણાવ્યું છે કે, શીખ સમુદાય વિરુદ્ધ વધી રહેલી નફરતની ઘટનાઓ એક ચિંતાજનક પેટર્નનો હિસ્સો છે. સંસ્થાએ પોલીસની ત્વરિત કામગીરીનો આભાર માન્યો હતો પરંતુ સાથે જ એવી માંગ પણ કરી હતી કે આવી ઘટનાઓને રોકવા માટે જાહેર શિક્ષણ અને પદ્ધતિસરની કાર્યવાહીની જરૂર છે.
કેનેડામાં તાજેતરના સમયમાં ભારતીયો અને ખાસ કરીને શીખ સમુદાયને નિશાન બનાવીને કરવામાં આવતા વંશીય હુમલાઓના કિસ્સા વધ્યા છે, જેના કારણે પ્રવાસી ભારતીયોમાં પોતાની સુરક્ષાને લઈને ચિંતા વધી રહી છે.