ચેન્નાઈ : દક્ષિણ ભારતીય સિનેમાના સુપરસ્ટાર અને દિગ્દર્શક ધનુષ (Dhanush) ના એક તાજેતરના ભાષણે તમિલનાડુના રાજકીય અને સિનેમા જગતમાં ભારે ખળભળાટ મચાવી દીધો છે. ચેન્નાઈમાં યોજાયેલા એક રક્તદાન શિબિર દરમિયાન પોતાના ચાહકોને આપેલા પ્રેરણાદાયી અને સૂચક વક્તવ્ય બાદ સોશિયલ મીડિયા પર ધનુષના રાજકારણમાં પ્રવેશ (Political Entry) અંગેની અટકળોએ જોર પકડ્યું છે. તમિલનાડુની વિધાનસભા ચૂંટણીમાં સુપરસ્ટાર વિજયની ભવ્ય જીત અને મુખ્યમંત્રી બન્યા બાદ હવે ધનુષ પણ તે જ રાહ પર આગળ વધી રહ્યા હોવાની ચર્ચાએ જોર પકડ્યું છે.

"એકતાને યોગ્ય હેતુ આપો": ચાહકોને ધનુષની વિનંતી

૪૩ વર્ષીય અભિનેતા ધનુષે રક્તદાન શિબિરમાં જાહેર સભાને સંબોધતા ચાહકોની શક્તિ અને એકતા પર વિશેષ ભાર મૂક્યો હતો. તેમણે ચાહકોને માત્ર ફિલ્મોના ઓડિયો લોન્ચ કે ફેન મીટિંગ્સ સુધી સીમિત રહેવાને બદલે જમીન સ્તરે લોકોની સેવા કરવા આહ્વાન કર્યું હતું.

"જ્યારે આટલી મોટી સંખ્યામાં લોકો એક જગ્યાએ ભેગા થાય છે, ત્યારે તે એકતામાં અપાર શક્તિ હોય છે. હવે સમય આવી ગયો છે કે આપણે આ શક્તિને યોગ્ય હેતુ આપીએ. ફક્ત ઓડિયો લોન્ચ અને મીટિંગ્સ કરવાથી આગળ વધીને સમાજસેવાના કાર્યોમાં જોડાઓ. તમારા વિસ્તારના લોકો અને પરિવારની જરૂરિયાતો સમજીને તેમને મદદ કરો."

— ધનુષ (અભિનેતા-દિગ્દર્શક)

નેટીઝન્સમાં તીવ્ર ચર્ચા: ભાજપનો ફેસ કે મત વિભાજનની રમત?

ધનુષના આ ભાષણનો વિડીયો વાયરલ થતાં જ ફેન્સ અને રાજકીય વિશ્લેષકો બે ખેમામાં વહેંચાઈ ગયા છે. સોશિયલ મીડિયા પર કેટલાક લોકો માને છે કે વિજયની સફળતા બાદ ધનુષ ભાજપ (BJP) નો ચહેરો બની શકે છે, જ્યારે અન્ય કેટલાકનું માનવું છે કે તમિલનાડુના રાજકારણમાં પહેલાથી જ દિગ્ગજ કલાકારો છે ત્યારે નવા અભિનેતા માટે જગ્યા બનાવવી મુશ્કેલ રહેશે.

'રાયન' ફિલ્મ અને નેશનલ એવોર્ડ વિવાદ પર મૌન તોડ્યું

પોતાના સંબોધન દરમિયાન ધનુષે તેમની તાજેતરની ફિલ્મ 'રાયન' (Raayan) ને મળેલા નેશનલ એવોર્ડ અંગે ચાલતા વિવાદ પર પણ ખુલીને વાત કરી હતી. સિનેપ્રેમીઓનો એક વર્ગ એવું માને છે કે ૨૦૨૪ માં રિલીઝ થયેલી 'મહારાજા' કે 'મેયાઝગન' જેવી ફિલ્મો 'રાયન' કરતાં વધુ મજબૂત દાવાદાર હતી.

·         પ્રક્ષકોના મંતવ્યોનો આદર: ધનુષે સ્વીકાર્યું કે ૨૦૨૪ માં તેમની ફિલ્મ કરતાં પણ ઉત્કૃષ્ટ ફિલ્મો બની હતી અને તેઓ ચાહકોની ટીકાનો આદર કરે છે.

·         ભૂતકાળની ફિલ્મોનો ઉલ્લેખ: તેમણે યાદ અપાવ્યું કે 'પુધુપેટ્ટાઈ', 'વાડા ચેન્નાઈ', 'કર્ણન', 'મરિયાન' અને 'રાંઝણા' જેવી તેમની શ્રેષ્ઠ ફિલ્મોને રાષ્ટ્રીય પુરસ્કાર નહોતો મળ્યો ત્યારે કોઈ બોલ્યું નહોતું, જેથી અત્યારે મળેલી આ સિદ્ધિની ઉજવણી કરવી જોઈએ.

૧૫૦ કરોડથી વધુનું કલેક્શન કરનાર ફિલ્મ 'રાયન' ના એવોર્ડ વિવાદ અને રાજકીય સંકેતો વચ્ચે ધનુષનું આ ભાષણ હાલ સમગ્ર દક્ષિણ ભારતમાં ભારે ચર્ચાનો વિષય બન્યું છે.