નોઇડા: ઉત્તર પ્રદેશના હબ ગણાતા નોઇડા (દિલ્હી-NCR) ના સેક્ટર ૬૩ પોલીસ સ્ટેશન વિસ્તારના ડી-બ્લોકમાંથી એક અત્યંત ચિંતાજનક અને ભયાનક ઘટના સામે આવી છે. શનિવારે બપોરે અહીં આવેલી એક કપડાંની ફેક્ટરી અને તેની પડોશમાં જ આવેલી બેગ બનાવતી કંપનીમાં અચાનક ભીષણ આગ ફાટી નીકળી હતી. આગ એટલી ઝડપથી ફેલાઈ કે જોતજોતામાં બંને મોટી ફેક્ટરીઓ આખી આગની લપેટમાં આવી ગઈ અને કરોડો રૂપિયાનો સામાન બળીને ખાખ થઈ ગયો હતો. જોકે, રાહતની વાત એ રહી કે વહીવટીતંત્રની તત્પરતાને કારણે આ ભયાનક હોનારતમાં કોઈ જાનહાનિ થઈ નથી.

એક કંપનીમાંથી બીજી કંપનીમાં પ્રસરી આગ

ચીફ ફાયર ઓફિસર (CFO) પ્રદીપ કુમાર ચૌબેએ ઘટનાની વિગતો આપતા જણાવ્યું હતું કે, શનિવારે બપોરના સુમારે સેક્ટર ૬૩ ના પ્લોટ નંબર D-140 માં આવેલી 'ઈગલ બિઝネス કોર્પોરેશન' નામની કંપનીમાં અચાનક કોઈ કારણોસર આગ લાગી હતી. આ કંપનીમાં કપડાં અને બેગનું મોટું ગોડાઉન હતું. કેમિકલ અને કાપડના કારણે આગે થોડી જ મિનિટોમાં વિકરાળ સ્વરૂપ ધારણ કરી લીધું અને તેની ઝપેટમાં બાજુના પ્લોટ D-139 પર આવેલી 'શૌર્ય એક્સપોર્ટ્સ' નામની કંપની પણ આવી ગઈ હતી. આકાશમાં કિલોમીટરો દૂર સુધી કાળા ધુમાડાના ગોટેગોટા દેખાતા સમગ્ર ઔદ્યોગિક વિસ્તારમાં અફરાતફરી અને ગભરાટનો માહોલ સર્જાયો હતો.

૧૬ ફાયર બ્રિગેડની ગાડીઓ અને ૨ કલાકનું યુદ્ધ

આગની માહિતી મળતાની સાથે જ સ્થાનિક પોલીસ સહિત ફાયર બ્રિગેડની ૧૬ જેટલી હાઇટેક ગાડીઓ ઘટનાસ્થળે રવાના થઈ ગઈ હતી. ફાયર ફાઇટરોએ ચારેય બાજુથી પાણીનો મારો ચલાવીને મોરચો સંભાળ્યો હતો. લગભગ બે કલાકની અવિરત અને ભારે જહેમત બાદ આગ પર સંપૂર્ણ કાબૂ મેળવી શકાયો હતો. ફાયર વિભાગે ભારે અગમચેતી વાપરીને આ ભયાનક આગને આસપાસની અન્ય કંપનીઓમાં ફેલાતી અટકાવી દીધી હતી, જેના કારણે એક બહુ મોટી દુર્ઘટના ટળી ગઈ હતી.

કર્મચારીઓનું દિલધડક રેસ્ક્યૂ ઓપરેશન:

સી.એફ.ઓ. ના જણાવ્યા અનુસાર, જ્યારે ફેક્ટરીમાં આગ લાગી ત્યારે અંદર મોટી સંખ્યામાં કર્મચારીઓ કામ કરી રહ્યા હતા. આગ લાગતા જ અંદર ચીસાચીસ થઈ ગઈ હતી. કેટલાક કર્મચારીઓ સમયસૂચકતા વાપરીને પોતે જ સુરક્ષિત બહાર નીકળી ગયા હતા, જ્યારે ધુમાડાના કારણે અંદર ફસાયેલા અન્ય કર્મચારીઓને પોલીસ અને ફાયર વિભાગના બહાદુર જવાનોએ બારીઓ તોડીને જીવના જોખમે બહાર કાઢ્યા હતા. હાલમાં આગ લાગવાનું ચોક્કસ કારણ જાણી શકાયું નથી, પરંતુ શોર્ટ સર્કિટના કારણે આગ લાગી હોવાની આશંકા સેવાઈ રહી છે. ફેક્ટરી માલિકો દ્વારા નુકસાનનું મૂલ્યાંકન કરવાની પ્રક્રિયા શરૂ કરવામાં આવી છે.