વોશિંગ્ટન : અમેરિકાના પ્રમુખ ડોનાલ્ડ ટ્રમ્પ અને કેનેડાના વડાપ્રધાન માર્ક કાર્ને વચ્ચે ચાલી રહેલો રાજકીય સંગ્રામ હવે એક નવી અને અનોખી ઊંચાઈએ પહોંચ્યો છે. પોતાના વિવાદિત સોશિયલ મીડિયા સ્ટંટ માટે જાણીતા ડોનાલ્ડ ટ્રમ્પે તેમના 'ટ્રુથ સોશિયલ' એકાઉન્ટ પર એક AI-જનરેટેડ (કૃત્રિમ બુદ્ધિમત્તાથી બનાવેલો) વિડીયો અને કાર્ટૂન શેર કર્યું છે. આ વિડીયોમાં બંને વિશ્વ નેતાઓ આઈસ હોકી રમતા નજરે પડે છે, જેમાં ટ્રમ્પ કેનેડિયન પીએમ કાર્નેને હોકી સ્ટીકથી નીચે પાડી દે છે અને જમીન પર પડેલા કાર્ને તરફ જોઈને કટાક્ષમાં કહે છે, "ઉઠો, ગવર્નર (રાજ્યપાલ)."

આ વાયરલ વિડીયો અને તસવીરમાં ડોનાલ્ડ ટ્રમ્પ યુએસએ હોકીની જર્સી પહેરેલા દેખાય છે, જ્યારે કેનેડાના વડાપ્રધાન હોકી કેનેડાના સ્વેટરમાં બરફ પર ઢળી પડેલા જોવા મળે છે. AI દ્વારા તૈયાર કરાયેલી આ ક્લિપમાં રમતગમતના માધ્યમથી બંને દેશો વચ્ચે ચાલી રહેલા રાજકીય અને આર્થિક તણાવને અત્યંત નાટકીય રીતે દર્શાવવામાં આવ્યો છે. ટ્રમ્પ અગાઉ પણ પોતાના રાજકીય વિરોધીઓ પર નિશાન સાધવા માટે આ પ્રકારની ડિજિટલ સામગ્રીનો ઉપયોગ કરતા રહ્યા છે.

ઉલ્લેખનીય છે કે, ટ્રમ્પ દ્વારા કેનેડિયન વડાપ્રધાનને "ગવર્નર" કહેવા પાછળ એક મોટો રાજકીય સંકેત છે. ટ્રમ્પ અગાઉ પણ સતત એવો દાવો કે સૂર ઉચ્ચારતા રહ્યા છે કે કેનેડાએ યુનાઇટેડ સ્ટેટ્સનું ૫૧મું રાજ્ય બની જવું જોઈએ. આ પહેલાં પણ તેઓ કેનેડાના ભૂતપૂર્વ વડાપ્રધાન જસ્ટિન ટ્રુડોને "ગવર્નર ટ્રુડો" કહીને સંબોધતા હતા. વેપાર, ટેરિફ અને સીમા સુરક્ષા જેવા મુદ્દાઓ પર બંને દેશો વચ્ચે પહેલાથી જ કડવાશ ચાલી રહી છે ત્યારે ટ્રમ્પની આ નવીનતમ રમૂજી પરંતુ ઉશ્કેરણીજનક પોસ્ટે આંતરરાષ્ટ્રીય રાજકારણમાં નવો વિવાદ ઊભો કર્યો છે.