દીકરાએ કરી આત્મહત્યાઃ આઘાતમાં માતા-પિતાએ ટ્રેન આગળ કૂદી પડયાઃ ત્રણેયના મોત
રક્ષાબંધનના દિવસે દમોહમાં એક જ પરિવાર સાથે બનેલી ઘટનાએ સૌને હચમચાવી દીધા
દમોહ તા.૨૯: મધ્યપ્રદેશના દમોહ જિલ્લામાં રક્ષાબંધનના દિવસે એક જ પરિવારના ત્રણ સભ્યોનાં મોતની હચમચાવી દેતી ઘટના સામે આવી છે. હિડોરિયા પોલીસ સ્ટેશન વિસ્તારના કરૈયા ગામમાં બનેલી આ ઘટનાથી સમગ્ર વિસ્તારમાં શોકનું વાતાવરણ છવાઈ ગયું છે.
મળતી માહિતી મુજબ કરૈયા ગામના રહેવાસી ૩૦ વર્ષીય મુકેશ અહિરવારનું કરૈયા ફાટક પાસે ટ્રેનની અડફેટે મોત થયું હતું. ઘટનાની જાણ થતાં સ્થાનિકોમાં ચકચાર મચી હતી. ત્યારબાદ મુકેશના માતા-પિતા પણ ધર્મપુરા ફાટક પાસે મૃત હાલતમાં મળી આવ્યા હતા.
મૃતકના માતા ૬૦ વર્ષીય ઉમા અહિરવાર અને પિતા ૬૫ વર્ષીય ભરત અહિરવારના મોત અંગે પ્રાથમિક તપાસમાં બંનેએ પણ ટ્રેન સામે જઈને જીવન ટૂંકાવ્યું હોવાની આશંકા વ્યક્ત કરવામાં આવી રહી છે. જોકે, સમગ્ર ઘટનાનું ચોક્કસ કારણ હજુ સામે આવ્યું નથી.
પોલીસને આપેલા નિવેદનમાં એક પાડોશીએ જણાવ્યું કે ઘટના બન્યાના થોડા સમય પહેલાં મુકેશ તેની પાસે આવ્યો હતો અને ઘરમાં કોઈ સમસ્યા હોવાની વાત કરી હતી. ત્યારબાદ થોડા જ સમયમાં મુકેશના મોતની માહિતી મળી હતી. જોકે, પાડોશીના આ નિવેદનની પોલીસ દ્વારા હાલ તપાસ અને ચકાસણી કરવામાં આવી રહી છે.
સ્થાનિક લોકોની જાણ થતાં RPF અને કોતવાલી પોલીસની ટીમો બંને સ્થળે પહોંચી હતી. ત્રણેય મૃતદેહોને પોસ્ટમોર્ટમ સહિતની કાર્યવાહી માટે જિલ્લા હોસ્પિટલના મૃતદેહગૃહમાં રાખવામાં આવ્યા છે.કોતવાલી પોલીસ સ્ટેશનના પ્રભારી મનીષ કુમારના જણાવ્યા મુજબ પ્રથમ લ્લષ્ટિએ આ મામલો આત્મહત્યાનો હોવાનું જણાઈ રહ્યું છે, પરંતુ ઘટનાનું કારણ હજુ સ્પષ્ટ નથી. પોલીસે કેટલાક પાડોશીઓના નિવેદનો નોંધ્યા છે અને અલગ-અલગ પાસાઓથી તપાસ શરૂ કરી છે.મૃતક ભરત અહિરવાર જિલ્લા હોસ્પિટલમાં Security Guard તરીકે ફરજ બજાવતા હતા. રક્ષાબંધન જેવા પવિત્ર દિવસે બનેલી આ કરુણ ઘટનાથી કરૈયા ગામ અને આસપાસના વિસ્તારમાં શોકનો માહોલ છે. પોલીસ તપાસ પૂર્ણ થયા બાદ જ ત્રણેય મોત પાછળની સંપૂર્ણ હકીકત સ્પષ્ટ થશે
(9:58 AM IST)
છેલ્લા 8 દિવસમાં સૌથી લોકપ્રિય 
