કેલિફોર્નિયા: અમેરિકામાં સ્થાયી થવાનું સપનું ક્યારેક કેટલી મોટી કિંમત માંગે છે, તેનો જીવંત અને કરુણ દાખલો કેલિફોર્નિયાના સોફ્ટવેર પ્રોફેશનલ ગૌતમ ડેએ રજૂ કર્યો છે. H-1B વિઝા પર અમેરિકામાં કાર્યરત ગૌતમ ડેની માતા જ્યારે સ્ટેજ-૪ કેન્સર સામે ઝઝૂમી રહી હતી, ત્યારે વિઝા સ્ટેમ્પિંગના વિલંબ અને કડક નીતિઓને કારણે તેઓ ભારત આવી શક્યા નહોતા. પોતાની માતાને અંતિમ વિદાય ન આપી શકવાનો રંજ તેમના જીવનનો સૌથી મોટો પસ્તાવો બની ગયો છે.
વિઝાના કાયદાઓમાં ફસાયેલી લાગણીઓ
ગૌતમ ડેએ સોશિયલ મીડિયા પર પોતાની વ્યથા ઠાલવતા જણાવ્યું કે, જ્યારે તેમની માતા ૧૭ દિવસ સુધી જીવન-મરણ વચ્ચે ઝોલા ખાતી હતી, ત્યારે તેઓ વિઝા સ્ટેમ્પિંગ માટે એપોઇન્ટમેન્ટ લેવા મરણિયા પ્રયાસો કરી રહ્યા હતા. ટ્રમ્પ વહીવટીતંત્ર દ્વારા ડ્રોપબોક્સ પ્રક્રિયામાં કરાયેલા અચાનક ફેરફારો અને ઇન્ટરવ્યુ સ્લોટની અછતને કારણે તેઓ અમેરિકામાં 'કેદ' થઈ ગયા હતા. ૨૬ દિવસ સુધી સતત કોન્સ્યુલેટમાં હોસ્પિટલના દસ્તાવેજો મોકલવા છતાં તેમને કોઈ મદદ મળી નહોતી.
પુત્ર અને પિતા વચ્ચેની ધર્મસંકટભરી પસંદગી
એક એન્જિનિયર તરીકે ૨૦ વર્ષનો અનુભવ ધરાવતા ગૌતમ પાસે બે જ વિકલ્પ હતા: કાં તો વિઝા વગર ભારત જઈને મરતી માતા પાસે પહોંચવું, અથવા અમેરિકામાં રહીને પોતાની બે દીકરીઓના ભવિષ્યની રક્ષા કરવી. જો તેઓ ભારત ગયા હોત, તો વિઝાના અભાવે તેઓ મહિનાઓ સુધી પાછા ફરી શક્યા ન હોત, જેના કારણે તેમની નોકરી અને પરિવારનું લીગલ સ્ટેટસ જોખમમાં મુકાઈ જાત. તેમણે ભારે હૈયે પોતાના બાળકોના ભવિષ્ય માટે માતાના અંતિમ દર્શનનો ત્યાગ કરવો પડ્યો.
ડિજિટલ સ્ક્રીન પર માતાની અંતિમ વિદાય
ગૌતમ ડેએ ભાવુક થઈને લખ્યું, "સમયે કોઈની રાહ ન જોઈ અને મારી માતાનું અવસાન થયું. હું તેમને માત્ર ફોન પર જોઈ શક્યો અને તેમનો અવાજ સાંભળી શક્યો. કોઈ પણ મનુષ્યને આવી પસંદગી કરવાની ફરજ ન પાડવી જોઈએ." તેમણે અમેરિકામાં નિષ્ણાત તરીકે બોલાવવામાં આવ્યા હોવા છતાં, વિઝા નીતિઓને કારણે જે માનવીય કિંમત ચૂકવવી પડી છે તેની ટીકા કરી હતી.
નવા પ્રોફેશનલ્સ માટે ચેતવણી
પોતાની પોસ્ટના અંતે ગૌતમ ડેએ H-1B વિઝાનું સપનું જોતા યુવાનોને એક ગંભીર પ્રશ્ન પૂછ્યો છે. તેમણે કહ્યું કે, "કોઈ પણ કરિયરનું સપનું એવું ન હોવું જોઈએ કે જે તમને તમારી માતાની અંતિમ ક્ષણો અને તમારા બાળકોના ભવિષ્ય વચ્ચે કોઈ એકને પસંદ કરવા મજબૂર કરે." આ ઘટનાએ અમેરિકાની ઈમિગ્રેશન સિસ્ટમમાં રહેલી ખામીઓ અને તેના કારણે વિખેરાતા પરિવારોની પીડા ફરી એકવાર દુનિયા સામે લાવી દીધી છે.