સિઓલ: વૈશ્વિક સ્તરે વધી રહેલા ભૌગોલિક-રાજકીય તણાવ અને આર્થિક ચિંતાઓની સીધી અસર વૈશ્વિક શેરબજારો પર જોવા મળી રહી છે. આજે ૧૩ જુલાઈના રોજ દક્ષિણ કોરિયાના મુખ્ય સ્ટોક માર્કેટ ઇન્ડેક્સ 'કોસ્પી' (KOSPI) માં ૮ ટકાનો ઐતિહાસિક અને ભીષણ કડાકો નોંધાયો છે. બજારમાં અચાનક સર્જાયેલી આ અફરાતફરીને કારણે સમગ્ર માર્કેટમાં ટ્રેડિંગ પર ૨૦ મિનિટ માટે બ્રેક લગાવવાની (ટ્રેડિંગ હોલ્ટ) ફરજ પડી હતી. આ ભયંકર મંદીના કારણે માત્ર એક જ દિવસમાં દક્ષિણ કોરિયાના સ્ટોક્સમાંથી ૩૨૮ અબજ ડોલર કરતાં પણ વધુની મસમોટી રકમનું ધોવાણ થઈ ગયું છે, જેનાથી રોકાણકારોમાં ફફડાટ વ્યાપી ગયો છે.

 ટેક શેરોમાં કડકો - SK Hynix ૧૨ ટકા તૂટ્યો - નાસ્ડેક ફ્યુચર્સમાં પણ ઘટાડો:

આજના આ કડાકામાં ટેક સેક્ટર સંપૂર્ણપણે નબળું સાબિત થયું હતું અને તે કેન્દ્રસ્થાને રહ્યું હતું. સિઓલ માર્કેટમાં જાણીતી કંપની 'SK Hynix Inc.' ના શેરમાં ૧૨ ટકાનો મોટો ઘટાડો નોંધાયો હતો, જ્યારે શુક્રવારે તેના યુએસ-લિસ્ટિંગ અમેરિકન ડિપોઝિટરી રિસિપ્ટ્સ (ADR) ના ટ્રેડિંગ ડેબ્યૂમાં ૧૩ ટકાનો ઉછાળો જોવા મળ્યો હતો. બીજી તરફ, અમેરિકાના નાસ્ડેક ૧૦૦ ઇન્ડેક્સના ફ્યુચર્સ કોન્ટ્રાક્ટ્સ પણ ૧.૧ ટકા જેટલા નીચે સરક્યા હતા, જ્યારે યુરોપિયન બજારો પણ ખૂલતાની સાથે જ આશરે ૧ ટકા જેટલા ઘટાડા સાથે ટ્રેડ થવા માટે નિર્ધારિત જણાયા હતા. બજારોમાં નબળા સેન્ટિમેન્ટની સીધી અસર ક્રિપ્ટોકરન્સી માર્કેટ પર પણ પડી હતી, જેમાં ડિજિટલ કરન્સી 'બિટકોઈન' ૨ ટકાથી વધુ ગબડીને આશરે ૬૨,૮૦૦ ડોલરની સપાટીએ આવી ગયો હતો.

 અમેરિકાના ઈરાન પર હુમલા અને ક્રૂડ ઓઈલની તેજીથી મોંઘવારી વધવાનો ભય:

અમેરિકી સેન્ટ્રલ કમાન્ડના જણાવ્યા અનુસાર, હોર્મુઝની સામુદ્રધુનીમાંથી પસાર થતા નાગરિક જહાજો પર હુમલા કરવાની ઈરાનની ક્ષમતાને નબળી પાડવાના હેતુથી રવિવારે અમેરિકી સેનાએ ઈરાન પર ભીષણ હવાઈ હુમલા કર્યા હતા. ઈરાન દ્વારા અગાઉ અમેરિકાના સાથી દેશો એવા કુવૈત, જોર્ડન અને કતાર પર ડ્રોન અને મિસાઈલ હુમલા કરવામાં આવ્યા હતા, જેના જવાબમાં અમેરિકાએ આ કાર્યવાહી કરી છે. આ યુદ્ધની સ્થિતિ વચ્ચે આંતરરાષ્ટ્રીય બજારમાં ક્રૂડ ઓઈલના ભાવ વધવાથી મોંઘવારી (ઇન્ફ્લેશન) નિયંત્રણની આખી પ્રક્રિયા વધુ જટિલ બનશે તેવી ચિંતા રોકાણકારોને સતાવી રહી છે. આ સ્થિતિને કારણે ડિસેમ્બર સુધીમાં ફેડરલ રિઝર્વ દ્વારા વ્યાજદરમાં આશરે ૪૦ બેસિસ પોઈન્ટના વધારાની શક્યતાઓ સેવાઈ રહી છે, જે જૂનની શરૂઆતમાં માત્ર ૧૫ બેસિસ પોઈન્ટની આસપાસ હતી.

 યુએસ ફુગાવાના આંકડા અને ફેડ ચેરમેન વોશની કૉંગ્રેસ સમક્ષ રજૂઆત પર નજર:

ચાલુ સપ્તાહે જાહેર થનારા અમેરિકાના ફુગાવાના આંકડાઓ પર હવે વૈશ્વિક રોકાણકારોની નજર ટકેલી છે. આ સાથે જ, યુએસ ફેડરલ રિઝર્વના ચેરમેન પદની કમાન સંભાળ્યા બાદ પ્રમુખ વોશ પ્રથમ વખત કૉંગ્રેસ સમક્ષ ઉપસ્થિત થવાના છે. તેમણે વ્યાજદરોના આઉટલુક અંગે અગાઉથી માર્ગદર્શન આપવાની પ્રક્રિયાને મર્યાદિત કરવાનો સંકલ્પ વ્યક્ત કર્યો છે, ત્યારે તેમની આ રજૂઆત બજારની આગામી દિશા નક્કી કરવામાં અત્યંત મહત્વપૂર્ણ સાબિત થશે.