કાનપુર :ઉત્તર પ્રદેશના કાનપુરમાંથી એક અત્યંત ચોંકાવનારો કિસ્સો પ્રકાશમાં આવ્યો છે, જ્યાં એક નવા કાર માલિકને પેટ્રોલ પંપ પર ગાડીમાં પેટ્રોલ ભરાવવું ભારે પડી ગયું. ચરણ સિંહ નામના એક વ્યક્તિએ જ્યારે પોતાની નવી નક્કોર ફોક્સવેગન વર્ચસ કારમાં પેટ્રોલ ભરાવ્યું, ત્યારે તેમને આપવામાં આવેલા બિલમાં ૫૨ લિટર પેટ્રોલનો આંકડો જોઈને તેઓ સ્તબ્ધ થઈ ગયા હતા. સૌથી મોટી વાત એ હતી કે, તેમની કારની ટાંકીની મહત્તમ ક્ષમતા માત્ર ૪૫ લિટર જ છે. આ વિસંગતતાએ પેટ્રોલ પંપ પર ચાલતા કોઈ મોટા કૌભાંડ તરફ ઇશારો કર્યો છે.
કઈ રીતે પકડાયું આ કૌભાંડ?
ઘટનાક્રમ મુજબ, ચરણ સિંહની કારમાં ઇંધણ લગભગ ખાલી હતું. તેમણે પેટ્રોલ પંપ કર્મચારીને ટાંકી ફૂલ કરવા માટે જણાવ્યું હતું. કર્મચારીએ શરૂઆતમાં ૪૧ લિટર પેટ્રોલ ભર્યું અને ત્યારબાદ કોઈ કારણોસર પ્રક્રિયા રોકી દીધી. જ્યારે સિંહે આ બાબતે પૂછપરછ કરી, ત્યારે કર્મચારીઓએ અસ્પષ્ટ જવાબો આપ્યા અને ફરીથી પેટ્રોલ ભરવાનું શરૂ કર્યું. અંતે જ્યારે બિલ હાથમાં આવ્યું, ત્યારે ૫૨ લિટરનો આંકડો જોઈને સિંહના હોશ ઉડી ગયા. તેમણે તાત્કાલિક સ્ટાફને પડકાર ફેંક્યો કે ૪૫ લિટરની ટાંકીમાં ૫૨ લિટર ઇંધણ કેવી રીતે સમાઈ શકે?
કંપનીના એન્જિનિયરે પુષ્ટિ કરી કે આ છેતરપિંડી છે
મામલો ગંભીર બનતા, સિંહે ત્વરિત કાર ઉત્પાદક કંપનીના ટેકનિકલ નિષ્ણાતને ઘટનાસ્થળે બોલાવ્યા. કંપનીના અધિકારીએ તપાસ કરીને અધિકૃત રીતે પુષ્ટિ કરી કે કારની ટાંકીની ક્ષમતા કોઈ પણ ભોગે ૪૫ લિટરથી વધી શકતી નથી. ટેકનિકલ પુરાવાઓ સામે આવતા પેટ્રોલ પંપના મેનેજમેન્ટે બચાવમાં બહાનાબાજી શરૂ કરી દીધી હતી. આ સ્પષ્ટપણે ગ્રાહકો સાથે કરવામાં આવતી છેતરપિંડીનો મામલો હોવાનું જણાતા, સિંહે વજન અને માપ વિભાગના અધિકારીઓની મિલીભગતની શંકા સાથે ઔપચારિક ફરિયાદ નોંધાવી છે.
તંત્ર દ્વારા તપાસના આદેશ
આ ઘટના બાદ સ્થાનિક વહીવટીતંત્રે કડક વલણ અપનાવ્યું છે. પેટ્રોલ પંપના ડિસ્પેન્સિંગ યુનિટ્સમાં કોઈ પ્રકારની ટેકનિકલ હેરાફેરી અથવા ચીપ દ્વારા મીટર સાથે છેડછાડ કરવામાં આવી છે કે કેમ, તેની તપાસ કરવા માટે જિલ્લા વહીવટીતંત્રે ખાસ ટીમને કામે લગાડી છે. આ કિસ્સો પેટ્રોલ પંપ પર થતી ચોરી સામે લાલબત્તી સમાન છે અને કાનપુરના વાહન માલિકોમાં આને લઈને ભારે રોષ અને ચિંતાનો માહોલ જોવા મળી રહ્યો છે.