નવી દિલ્‍હીઃ તા.૧૯: હવે તહેવારોની સિઝન શરૂ થઈ ગઈ છે. દુર્ગા પૂજા, દિવાળી અને છઠ નજીક છે. આવી સ્‍થિતિમાં ખાંડના વધેલા ભાવે લોકોનું બજેટ બગાડી દીધું છે. ખાંડના ભાવ સાતમા આસમાને પહોંચી ગયા છે. સામાન્‍ય માણસના ખિસ્‍સા પર બોજ વધ્‍યો છે. આવી સ્‍થિતિમાં સરકાર સતત ખાંડની મીઠાશ પાછી લાવવા માટે પગલાં લઈ રહી છે. જી હા, તહેવારોની સિઝન પહેલાં ખાંડને લઈને રાહતના સમાચાર છે. છેલ્‍લા ૩ અઠવાડિયામાં ખાંડના છૂટક ભાવમાં લગભગ ૧૦%નો ઘટાડો થઈને રૂ.૬૫થી રૂ.૫૮.૫ પ્રતિ કિલો થઈ ગયો છે. એટલું જ નહીં, કેન્‍દ્ર સરકારે મોટી માત્રામાં ખાંડનો ઉપયોગ કરતા વેપારીઓ માટે સ્‍ટોક રાખવાની મર્યાદા ૧૫ દિવસથી વધારીને ૩૦ દિવસ કરી છે. તેનાથી તહેવારો દરમિયાન ખાંડની ઉપલબ્‍ધતા જાળવી રાખવામાં મદદ મળી શકે છે.

TOIના અહેવાલ મુજબ, તહેવારોની સિઝન પહેલાં કેન્‍દ્ર સરકારે શુક્રવારે જથ્‍થાબંધ ખાંડના ગ્રાહકો માટે સ્‍ટોક રાખવાની મર્યાદામાં છૂટ આપી છે. હવે તેઓ હાલની ૧૫ દિવસની મર્યાદાની જગ્‍યાએ ૩૦ દિવસ સુધી ખાંડનો સ્‍ટોક રાખી શકશે. તેનું કારણ એ છે કે છેલ્‍લા ૩ અઠવાડિયામાં છૂટક ભાવમાં લગભગ ૧૦%નો ઘટાડો થયો છે.

સરકારે આ નિર્ણય એવા સમયે લીધો છે, જ્‍યારે ખાંડનો છૂટક ભાવ લગભગ રૂ.૬૫ પ્રતિ કિલોથી ઘટીને રૂ.૫૮.૫ પ્રતિ કિલો થઈ ગયો છે. જોકે, તહેવારોની સિઝન દરમિયાન માગ વધવાની આશા છે. તેનું કારણ એ છે કે દુર્ગા પૂજાથી લઈને દિવાળી અને છઠ દરમિયાન મીઠાઈ અને વિવિધ વાનગીઓ મોટા પ્રમાણમાં બનાવવામાં આવે છે. તેમાં ખાંડનો ઉપયોગ થાય છે. આવી સ્‍થિતિમાં ખાંડની માગ વધશે તે નક્કી છે.

જોકે, ખાદ્ય વિભાગે ઉદ્યોગોને જણાવ્‍યું છે કે છૂટક ભાવમાં થયેલો ઘટાડો મિલમાંથી બહાર આવ્‍યા બાદના ભાવમાં થયેલા મોટા ઘટાડાની સરખામણીએ ઓછો છે. વિભાગના જણાવ્‍યા અનુસાર, મિલમાંથી બહાર નીકળતી ખાંડના ભાવમાં લગભગ ૨૫%નો ઘટાડો થઈ ચૂક્‍યો છે, પરંતુ સપ્‍લાય ચેઇન દ્વારા તેનો સંપૂર્ણ લાભ ગ્રાહકો સુધી પહોંચ્‍યો નથી. વિભાગે જથ્‍થાબંધ વેપારીઓ, છૂટક દુકાનદારો અને વેપાર સાથે જોડાયેલા અન્‍ય લોકોને તાત્‍કાલિક ભાવમાં થયેલા ઘટાડાનો લાભ ગ્રાહકો સુધી પહોંચાડવા માટે કહ્યું છે.

જથ્‍થાબંધ ગ્રાહકોમાં મોટી કન્‍ફેક્‍શનરી બનાવતી કંપનીઓ, બિસ્‍કિટ ઉત્‍પાદકો, સોફટ ડ્રિક અને બેવરેજ કંપનીઓ, મીઠાઈ વેચનારા અને હલવાઈનો સમાવેશ થાય છે. હાલમાં કાચા માલ તરીકે દર મહિને ૧૦ ટનથી વધુ ખાંડનો ઉપયોગ કરતા ઔદ્યોગિક ગ્રાહકોને ૧૫ દિવસના વપરાશ જેટલો સ્‍ટોક રાખવાની મંજૂરી છે. વિભાગે કહ્યું છે કે હવે આ મર્યાદા વધારીને ૩૦ દિવસ કરવામાં આવી છે, પરંતુ એક શરત સાથે. જૂની ૧૫ દિવસની મર્યાદા કરતાં વધુ જે પણ સ્‍ટોક રાખવામાં આવશે, તે માત્ર ટેરિફ રેટ ક્‍વોટા અથવા એડવાન્‍સ ઓથોરાઇઝેશન સ્‍કીમ હેઠળ આયાત કરવામાં આવેલી ખાંડમાંથી જ લેવો પડશે.

કેન્‍દ્ર સરકારે ટેરિફ રેટ ક્‍વોટા હેઠળ ૧૦ લાખ ટન ખાંડની આયાત કરવાની મંજૂરી આપી છે. આ ઉપરાંત એડવાન્‍સ ઓથોરાઇઝેશન સ્‍કીમ હેઠળ ખરીદવામાં આવેલી નિકાસ માટે નિર્ધારિત ખાંડને સ્‍થાનિક બજારમાં વેચવાની પણ મંજૂરી આપવામાં આવી છે. બીજી તરફ, સ્‍થાનિક ખુલ્‍લા બજારમાંથી ખરીદવામાં આવેલી ખાંડનો સ્‍ટોક હજુ પણ ૧૫ દિવસના વપરાશ સુધી જ મર્યાદિત રહેશે. સરકારે જથ્‍થાબંધ ગ્રાહકો માટે દર શુક્રવારે ખાદ્ય વિભાગના ઓનલાઈન પોર્ટલ પર પોતાના ખાંડના સ્‍ટોકની માહિતી આપવી ફરજિયાત કરી છે.