નવી દિલ્હી:  દેશની રાજધાની દિલ્હીના વૈભવી ભારત મંડપમ ખાતે આજે ભારતીય જનતા પાર્ટી અને રાષ્ટ્રીય લોકતાંત્રિક ગઠબંધન (NDA) ના ઘટક પક્ષોની એક અત્યંત મહત્વપૂર્ણ અને હાઈ-પ્રોફાઈલ બેઠક યોજાઈ હતી. પીએમ નરેન્દ્ર મોદીના નેતૃત્વમાં કેન્દ્ર સરકારના સફળ ૧૨ વર્ષ પૂર્ણ થવાની ખુશીમાં આયોજિત આ મહાસંમેલનમાં બંગાળી સ્વાદનો એવો તડકો જોવા મળ્યો કે આખો માહોલ હળવો-ફૂલ થઈ ગયો હતો. પશ્ચિમ બંગાળના નવા મુખ્યમંત્રી સુવેન્દુ અધિકારીએ બેઠક દરમિયાન પીએમ મોદીને બંગાળની પ્રખ્યાત અને મસાલેદાર સ્ટ્રીટ ફૂડ ‘ઝાલમુરી’ (મમરાની ભેળ) ઓફર કરી હતી. પીએમ મોદીએ ન માત્ર અત્યંત હોંશે-હોંશે આ ઝાલમુરીનો સ્વાદ માણ્યો, પરંતુ હસતા-હસતા પોતાના હાથે અન્ય સાથી પક્ષોના મુખ્યમંત્રીઓ અને વરિષ્ઠ નેતાઓને પણ તે વહેંચી હતી.

આ ઝાલમુરી માત્ર ખાદ્યપદાર્થ નથી, પરંતુ તેની પાછળ એક અત્યંત ઊંડો રાજકીય સંદેશ છુપાયેલો છે. બંગાળ વિધાનસભા ચૂંટણીના પ્રચાર દરમિયાન ખુદ પીએમ મોદીએ ઝારગ્રામમાં એક ઝાલમુરીના સ્ટોલ પર રોકાઈને આ નાસ્તો કર્યો હતો, જેને ભાજપે બંગાળની સંસ્કૃતિ સાથે જોડાવાના પ્રતીક તરીકે રજૂ કર્યો હતો. હવે જ્યારે મમતા બેનર્જીની તૃણમૂલ કોંગ્રેસ (TMC) માં ભયાનક આંતરિક બળવો થયો છે અને ૨૦ સાંસદો પક્ષ છોડવાની અણી પર છે, ત્યારે ભાજપના વિજયના પ્રતીક સમાન સુવેન્દુ અધિકારીના હાથે પીએમ મોદીને ઝાલમુરી ખવડાવવાનો આ વીડિયો સોશિયલ મીડિયા પર જોરદાર વાયરલ થઈ રહ્યો છે. ટીએમસીના પતન અને બંગાળમાં ભાજપના શાસનના પ્રારંભની ઉજવણી તરીકે આ ક્ષણને જોવામાં આવી રહી છે.

આ ભવ્ય બેઠક પાછળ એક મોટો ઐતિહાસિક રેકોર્ડ પણ જવાબદાર છે, જેના કારણે આખો હોલ તાળીઓના ગડગડાટથી ગુંજી ઉઠ્યો હતો. પીએમ નરેન્દ્ર મોદીએ આઝાદ ભારતના પ્રથમ વડાપ્રધાન પંડિત જવાહરલાલ નેહરુનો સૌથી મોટો રેકોર્ડ સત્તાવાર રીતે તોડી નાખ્યો છે. પીએમ મોદી સતત ૪,૩૯૯ દિવસ સુધી દેશના વડાપ્રધાન પદ પર અવિરત રહીને ભારતના ઇતિહાસમાં સૌથી લાંબો સમય શાસન કરનારા લોકતાંત્રિક રીતે ચૂંટાયેલા વડાપ્રધાન બની ગયા છે (આ પહેલા નેહરુ સતત ૪,૩૯૮ દિવસ પદ પર રહ્યા હતા). આ ઐતિહાસિક સિદ્ધિ બદલ આંધ્રપ્રદેશના સીએમ ચંદ્રબાબુ નાયડુ અને નાગાલેન્ડના સીએમ નેફિયુ રિયો દ્વારા સંયુક્ત પ્રસ્તાવ લાવીને પીએમ મોદીનું વિશેષ સન્માન કરવામાં આવ્યું હતું, જેમાં કેન્દ્રીય મંત્રીઓ અમિત શાહ અને રાજનાથ સિંહ સહિત ૨૨ રાજ્યોના મુખ્યમંત્રીઓ સાક્ષી બન્યા હતા.