એડમન્ડ (ઓક્લાહોમા): અમેરિકાના ઓક્લાહોમા સિટી પાસે આવેલા પ્રખ્યાત લેક આર્કેડિયા ખાતે રવિવારે રાત્રે એક મોટી દુર્ઘટના સર્જાઈ છે. યુવાઓના એક વિશાળ મેળાવડા દરમિયાન અચાનક થયેલા ગોળીબારમાં ઓછામાં ઓછા ૧૨ લોકો ઘાયલ થયા હોવાના અહેવાલ છે. આ હિંસક ઘટનાને પગલે સમગ્ર વિસ્તારમાં ભયનો માહોલ ફેલાઈ ગયો છે અને પોલીસ કાફલો ઘટનાસ્થળે ઉતારી દેવામાં આવ્યો છે.
પાર્ટીમાં ડાન્સ અને સંગીત વચ્ચે ગુંજી ઉઠી ગોળીઓ
સ્થાનિક પોલીસના જણાવ્યા અનુસાર, રવિવારે રાત્રે આશરે ૯ વાગ્યે લેક આર્કેડિયા પાસે 'સન્ડે ફનડે' નામની એક મોટી પાર્ટી ચાલી રહી હતી. સેંકડો યુવાનો મ્યુઝિક અને ડાન્સની મજા માણી રહ્યા હતા ત્યારે જ અચાનક ગોળીબાર શરૂ થયો હતો. ગોળીઓનો અવાજ સાંભળતા જ મજા માણી રહેલા યુવાનોમાં નાસભાગ મચી ગઈ હતી અને લોકો જીવ બચાવવા સુરક્ષિત જગ્યાઓ શોધવા લાગ્યા હતા.
હોસ્પિટલોમાં ઈમરજન્સી જેવી સ્થિતિ
એડમન્ડ પોલીસના પ્રવક્તા એમિલી વોર્ડે પ્રેસ કોન્ફરન્સમાં જણાવ્યું કે, અત્યાર સુધી ૧૨ લોકોને એમ્બ્યુલન્સ મારફતે વિવિધ હોસ્પિટલોમાં લઈ જવામાં આવ્યા છે. ઇન્ટિગ્રિસ હેલ્થ બાપ્ટિસ્ટ મેડિકલ સેન્ટર અને એડમન્ડ હોસ્પિટલમાં ઘાયલોની સારવાર ચાલી રહી છે. પોલીસને આશંકા છે કે ઘાયલોની સંખ્યા વધી શકે છે, કારણ કે કેટલાક લોકો વ્યક્તિગત વાહનોમાં પણ હોસ્પિટલ પહોંચ્યા હોવાના અહેવાલ છે. ઘાયલોની સ્થિતિ અત્યારે અલગ-અલગ તબક્કે ગંભીર હોવાનું જણાવાયું છે.
હુમલાખોરો હજુ પોલીસ પકડથી દૂર
આટલી મોટી ઘટના બની હોવા છતાં હજુ સુધી કોઈ શંકાસ્પદ વ્યક્તિની ધરપકડ કરવામાં આવી નથી. પોલીસ અધિકારીઓ અત્યારે હોસ્પિટલોમાં ઘાયલો અને સાક્ષીઓના નિવેદન લઈ રહ્યા છે. હુમલાખોરો કોણ હતા અને ફાયરિંગ પાછળનો હેતુ શું હતો, તે અંગે હજુ સુધી કોઈ ચોક્કસ માહિતી મળી નથી.
જનતા માટે કોઈ ખતરો નથી: પોલીસ
પોલીસે જનતાને આશ્વાસન આપ્યું છે કે હાલમાં સામાન્ય જનતા માટે કોઈ તાત્કાલિક જોખમ નથી, કારણ કે આ એક ચોક્કસ જૂથ વચ્ચે થયેલી ઘટના હોવાનું પ્રાથમિક દ્રષ્ટિએ જણાય છે. જોકે, હુમલાખોરોને પકડવા માટે ઓક્લાહોમા મેટ્રો વિસ્તારમાં પોલીસે ચક્રો ગતિમાન કર્યા છે. સોશિયલ મીડિયા પર આ ઘટના પહેલાના કેટલાક વીડિયો વાયરલ થયા છે, જેમાં યુવાનો નૃત્ય કરતા જોવા મળે છે, જેના થોડી જ વાર બાદ આ હુમલો થયો હતો.