મેલબોર્ન:  રમતગમત અને રાજકારણ જ્યારે એક સ્ટેજ પર ભેગા થાય છે, ત્યારે ઇતિહાસમાં મોટી હેડલાઇન્સ બને છે. ઓસ્ટ્રેલિયાના પૂર્વ દિગ્ગજ કેપ્ટન ગ્રેગ ચેપલે સોશિયલ મીડિયા પર એક તસવીર શેર કરીને આખા વિશ્વનું ધ્યાન પોતાની તરફ ખેંચ્યું છે. આ વાયરલ તસવીરમાં ગ્રેગ ચેપલ એક ખાસ સફેદ રંગની ટી-શર્ટ પહેરેલા જોવા મળે છે, જેના પર ખૂબ જ મોટા અક્ષરોમાં "ફ્રી ઇમરાન ખાન" (Free Imran Khan) નો સંદેશ લખેલો છે. આ શર્ટમાં પાકિસ્તાનના પૂર્વ વડાપ્રધાન અને ક્રિકેટ કેપ્ટન ઇમરાન ખાનનું ચિત્ર, પાકિસ્તાની ધ્વજનો અર્ધચંદ્રાકાર-તારો અને સાથે "ક્રિકેટ વગેરે" શબ્દો અંકિત કરેલા છે.

ગ્રેગ ચેપલ અને ઇમરાન ખાન વચ્ચે ૧૯૭૦ અને ૧૯૮૦ ના દાયકાથી અત્યંત ગાઢ અને આદરપૂર્વકનો સંબંધ રહ્યો છે. પોતાની પેઢીના આ બે સૌથી પ્રભાવશાળી ઓલરાઉન્ડર અને કેપ્ટનોએ આંતરરાષ્ટ્રીય ક્રિકેટમાં એક સુવર્ણ યુગ સર્જ્યો હતો. ચેપલની આ તસવીર વાયુવેગે ક્રિકેટ ચાહકો અને રાજકીય વર્તુળોમાં શેર થઈ રહી છે. વાસ્તવમાં, ઓગસ્ટ ૨૦૨૩ થી જેલમાં બંધ ઇમરાન ખાનના પરિવાર અને પક્ષનો આરોપ છે કે તેમને જેલમાં સંપૂર્ણપણે એકલા રાખવામાં આવ્યા છે અને પરિવાર, વકીલો કે ડોક્ટરોને પણ મળવા દેવામાં આવતા નથી, જેના કારણે તેમનું સ્વાસ્થ્ય લથડી રહ્યું છે.

કપિલ દેવ અને ગાવસ્કરે પણ પાકિસ્તાન સરકારને પત્ર લખ્યો હતો

આ સપોર્ટ માત્ર ગ્રેગ ચેપલ પૂરતો મર્યાદિત નથી. આ અગાઉ વિશ્વના ૧૪ મહાન આંતરરાષ્ટ્રીય ક્રિકેટ કપ્તાનોએ ભેગા મળીને પાકિસ્તાનના વર્તમાન વડાપ્રધાન શેહબાઝ શરીફને એક ખુલ્લો પત્ર લખ્યો હતો. આ સહી કરનારાઓમાં ભારતના ૧૯૮૩ વર્લ્ડ કપ વિજેતા કેપ્ટન કપિલ દેવ અને મહાન ઓપનર સુનીલ ગાવસ્કરનું નામ પણ સામેલ હતું. આ પત્રમાં પાકિસ્તાની સત્તાવાળાઓને વિનંતી કરવામાં આવી હતી કે ૧૯૯૨ ના વર્લ્ડ કપ વિજેતા ઇમરાન ખાનને જેલમાં માનવીય સારવાર આપવામાં આવે અને તેમની આંખોની નબળી પડતી દ્રષ્ટિ માટે તાત્કાલિક પૂરતી તબીબી સહાય અને ન્યાયી કાનૂની ટ્રાયલની વ્યવસ્થા કરવામાં આવે.

સ્ટેડિયમમાં ટી-શર્ટ પર પ્રતિબંધનો વિવાદ

આ ‘ફ્રી ઇમરાન ખાન’ ટી-શર્ટ અગાઉ પણ વિવાદોમાં આવી ચૂકી છે. ઓસ્ટ્રેલિયામાં વિક્ટોરિયા અને દક્ષિણ ઓસ્ટ્રેલિયા વચ્ચે રમાયેલી શેફિલ્ડ શીલ્ડ ફાઇનલ મેચ દરમિયાન લ્યુક બ્રાઉન નામના એક ઓસ્ટ્રેલિયન ફેનને સ્ટેડિયમમાં આ જ ટી-શર્ટ પહેરીને પ્રવેશતા રોકવામાં આવ્યો હતો અને સુરક્ષા કર્મચારીઓએ તેને આ ટી-શર્ટ ઢાંકવાની ફરજ પાડી હતી. પાકિસ્તાની સત્તાવાળાઓ ભલે જેલમાં દુર્વ્યવહારના આરોપો નકારતા હોય, પરંતુ ગ્રેગ ચેપલ જેવા વૈશ્વિક ક્રિકેટ આઇકોનનું આ પગલું પાકિસ્તાની રાજકારણમાં નવો ભૂકંપ લાવી શકે છે.