નવી દિલ્હી, તા.29: દેશમાં ૧૦૦ ટકા ઇથેનોલ ઇંધણથી ચાલતા 'ફ્લેક્સ-ફ્યુઅલ' વાહનોને મંજૂરી આપવાના કેન્દ્ર સરકારના નિર્ણય સામે સુપ્રીમ કોર્ટે ગંભીર સવાલો ઉઠાવ્યા છે. ગુરુવારે નવી દિલ્હી ખાતે ઈથેનોલ એલોકેશન સાથે જોડાયેલી અરજીઓ પર સુનાવણી કરતી વખતે જસ્ટિસ એમ. એમ. સુંદરેશ અને જસ્ટિસ પ્રસન્ના બી. વરાલેની ખંડપીઠે સરકારને પ્રશ્ન કર્યો હતો કે જો ૧૦૦ ટકા ઇથેનોલ સંચાલિત વાહનોને મંજૂરી આપવામાં આવે, તો તેનો પૂરતો સપ્લાય અને ઉત્પાદન પુરવઠો કેવી રીતે સુનિશ્ચિત કરવામાં આવશે.

પ્રાપ્ત વિગતો અનુસાર, તાજેતરમાં માર્ગ પરિવહન અને હાઇવે મંત્રાલય દ્વારા સેન્ટ્રલ મોટર વ્હીકલ્સ રૂલ્સ ૧૯૮૯માં સુધારો કરીને E100 (લગભગ શુદ્ધ ઇથેનોલ) સુધીના ઇંધણ પર ચાલી શકે તેવા વાહનોને મંજૂરી આપવાના ઉત્સર્જન માપદંડો જાહેર કર્યા હતા. સુપ્રીમ કોર્ટે આ અહેવાલોનો ઉલ્લેખ કરીને સરકાર પાસે સ્પષ્ટતા માંગી હતી, જેના જવાબમાં એટર્ની જનરલ આર. વેંકટરામાનીએ અદાલતને જણાવ્યું હતું કે આ નીતિને અમલમાં મૂકવા માટે દેશના ઉત્પાદન ક્ષેત્ર અને સપ્લાય વ્યવસ્થામાં મોટો ફેરફાર કરવો જરૂરી બનશે.

સુનાવણી દરમિયાન સર્વોચ્ચ અદાલતે આ બાબતને માત્ર વાહન વ્યવહાર પૂરતી મર્યાદિત ન રાખતા તેને દેશના કરોડો ખેડૂતોના આર્થિક હિતો અને પર્યાવરણ સાથે પણ સાંકળી હતી. ખંડપીઠે વિશેષ ટિપ્પણી કરતા જણાવ્યું હતું કે, ઇથેનોલના વ્યાપક ઉપયોગથી ગામડાઓમાં વસતા સામાન્ય માનવી અને ખેડૂતોને કઈ રીતે આર્થિક રીતે સશક્ત બનાવી શકાય તે પાસા પર સઘન ધ્યાન આપવું અત્યંત જરૂરી છે, કારણ કે ઇથેનોલ પ્રોત્સાહનથી કૃષિ ક્ષેત્રને મોટો ફાયદો થઈ શકે છે.

આ સુનાવણીનો મુખ્ય આધાર ઇથેનોલ સપ્લાય યર (ESY) ૨૦૨૫-૨૬ માટે ઓઇલ માર્કેટિંગ કંપનીઓ દ્વારા કર્ણાટક હાઇકોર્ટના એક આદેશ સામે દાખલ કરવામાં આવેલી અરજી છે. આ અગાઉ સુપ્રીમ કોર્ટે કર્ણાટક હાઇકોર્ટના તે નિર્દેશ પર સ્ટે આપ્યો હતો, જેમાં સમર્પિત ઇથેનોલ ઉત્પાદક પ્લાન્ટ્સને વધુ ફાળવણી આપવાનો આદેશ કરાયો હતો, કારણ કે તે દેશની ૨૦ ટકા ઇથેનોલ બ્લેન્ડિંગની રાષ્ટ્રીય નીતિને અસર કરી શકે તેમ હતો.

કેન્દ્ર સરકાર વતી રજૂ થયેલા કાનૂની પ્રતિનિધિઓએ અદાલતમાં ખાતરી આપી હતી કે સરકારની નીતિઓ પહેલેથી જ ખેડૂતોના હિતોને પ્રાધાન્ય આપે છે અને આગામી દલીલો દરમિયાન ખેડૂતોના સશક્તિકરણ તથા સપ્લાય વ્યવસ્થા અંગે વિસ્તૃત રોડમેપ રજૂ કરવામાં આવશે.

સુપ્રીમ કોર્ટે આ સમગ્ર સંવેદનશીલ કેસની આગળની વધુ સુનાવણી આવતા મહિના સુધી મુલતવી રાખી છે, જેમાં કેન્દ્ર સરકાર તરફથી ઇથેનોલ ઉત્પાદન, ખેડૂતોની ભાગીદારી અને સપ્લાય નેટવર્ક અંગે વધુ સ્પષ્ટતા કરવામાં આવે તેવી પૂરી શક્યતા છે.