નવી દિલ્હી, તા. 16: ભારતીય ઉદ્યોગ જગતના જાણીતા નામ અનિલ અંબાણી માટે સુપ્રીમ કોર્ટમાંથી ચિંતાજનક સમાચાર આવ્યા છે. બેંક ઓફ બરોડા, IDBI બેંક અને ઈન્ડિયન ઓવરસીઝ બેંક જેવી નાણાકીય સંસ્થાઓ દ્વારા તેમને 'ફ્રોડ' (છેતરપિંડી) શ્રેણીમાં વર્ગીકૃત કરવાના આદેશ સામે અનિલ અંબાણીએ રાહત માંગી હતી, જેને સુપ્રીમ કોર્ટે ગુરુવારે નકારી કાઢી છે.
અનિલ અંબાણીએ કોર્ટ સમક્ષ એવી રજૂઆત કરી હતી કે તેઓ બેંકો સાથેના નાણાકીય વિવાદોનું સમાધાન કરવા ઈચ્છે છે. જોકે, સર્વોચ્ચ અદાલતે તેમની આ દલીલો પર કોઈ પણ પ્રકારનો અભિપ્રાય આપવાનો ઈનકાર કરી દીધો હતો. RBI ના માસ્ટર સર્ક્યુલર મુજબ જે કંપની કે વ્યક્તિને 'ફ્રોડ' જાહેર કરવામાં આવે છે, તેમના માટે ભવિષ્યમાં લોન મેળવવી લગભગ અશક્ય બની જાય છે. અંબાણી માટે આ કાયદાકીય લડાઈ હવે વધુ કપરી સાબિત થઈ શકે તેમ છે.