ઇસ્લામાબાદ: પાકિસ્તાનની રાજનીતિથી લઈને રાવલપિંડીના લશ્કરી મુખ્યાલય (GHQ) સુધી અત્યારે એક જબરદસ્ત રાજકીય ભૂકંપ આવ્યો છે. પાકિસ્તાન આર્મીના વડા જનરલ અસીમ મુનીર હાલમાં જ વોશિંગ્ટન પ્રવાસે ગયા હતા, જ્યાં અમેરિકી રાષ્ટ્રપતિ ડોનાલ્ડ ટ્રમ્પ તરફથી મળેલી અઢળક પ્રશંસા અને પોતાના મનપસંદ 'ફિલ્ડ માર્શલ'ના બિરુદથી તેઓ ફૂલ્યા સમાતા નહોતા. જનરલ મુનીર એવા ભ્રમમાં રાચી રહ્યા હતા કે તેમણે એકલા હાથે પાકિસ્તાનના ડૂબતા આર્થિક અને રાજદ્વારી જહાજને બચાવી લીધું છે. પરંતુ, તેમનો આ બધો જ ઘમંડ પાકિસ્તાનના શક્તિશાળી મૌલવી અને જમિયત ઉલેમા-એ-ઇસ્લામ (F) ના વડા મૌલાના ફઝલુર રહેમાને કરાચીની એક વિશાળ જનસભામાં એક ઝાટકે ઉતારી દીધો છે.

કરાચીના લ્યારીમાં ગર્જતા મૌલાના ફઝલુર રહેમાને જનરલ મુનીરની નબળાઈઓનો જાહેરમાં પર્દાફાશ કર્યો હતો. તેમણે આકરા પ્રહારો કરતા કહ્યું કે, પાકિસ્તાની સેના સરહદોની સુરક્ષા કરવાની પોતાની અસલી લશ્કરી ફરજ સંપૂર્ણપણે ભૂલી ચૂકી છે અને આર્મી ચીફ એક વ્યાવસાયિક રાજદ્વારીની જેમ દેશની વિદેશ નીતિ ચલાવવાનો દેખાવ કરી રહ્યા છે. મૌલાનાએ પાકિસ્તાનની કડવી વાસ્તવિકતા દેશ સામે મૂકતા દાવો કર્યો કે, સેનાની નિષ્ફળતાના કારણે બલુચિસ્તાન હવે પાકિસ્તાનના હાથમાંથી સાવ સરકી ગયું છે અને ત્યાં સરકાર કે લશ્કરનું કોઈ નિયંત્રણ રહ્યું નથી. તેમણે સવાલ ઉઠાવ્યો કે, જ્યારે તમારા પોતાના જ પ્રાંતો અને પાકિસ્તાન અધિકૃત કાશ્મીર (PoK) માં બળવો ફાટી નીકળ્યો હોય અને તમારી બહાદુર સેના તેને રોકવામાં નકામી સાબિત થઈ હોય, ત્યારે વિદેશી શક્તિઓ પાસે જઈને પીઠ થપથપાવવામાં કઈ સમજદારી છે?

મૌલાના ફઝલુર રહેમાને આટલેથી ન અટકતા જનરલ અસીમ મુનીરને સીધેસીધો લલકારતા કહ્યું, "જો તમને દેશ ચલાવવાનો અને રાજકારણ ખેલવાનો આટલો જ શોખ જાગ્યો હોય, તો પહેલા તમારો લશ્કરી યુનિફોર્મ ઉતારી નાખો અને સીધા ચૂંટણીના મેદાનમાં આવીને નસીબ અજમાવો. પછી જોઈએ કે પાકિસ્તાનની જનતા તમને કેટલા મત આપે છે!" તેમણે સેના પર કઠપૂતળી સરકાર ચલાવવાનો આરોપ લગાવીને ભારત અને અફઘાનિસ્તાન અંગેના સેનાના બેવડા ધોરણો પણ ખુલ્લા પાડ્યા હતા. પાકિસ્તાનના ઇતિહાસમાં સામાન્ય રીતે સેના સામે બોલવાની કોઈ હિંમત કરતું નથી, ત્યારે એક પ્રભાવશાળી મૌલવી દ્વારા આર્મી ચીફના લીરેલીરા ઉડાડવાની આ ઘટનાએ પાકિસ્તાની સૈન્ય કમાન્ડરોની ઊંઘ હરામ કરી દીધી છે.