ચેન્નાઈ: તમિલનાડુના મુખ્યમંત્રી સી. જોસેફ વિજયે ૮૦મા સ્વતંત્રતા દિવસ નિમિત્તે ચેન્નાઈના ઐતિહાસિક ફોર્ટ સેન્ટ જ્યોર્જ ખાતે રાષ્ટ્રધ્વજ ફરકાવીને રાજ્યના નવજાત શિશુઓ માટે "થૈમામન થંગા મોથીરામ થિટ્ટમ" નામની લોકકલ્યાણકારી યોજનાની જાહેરાત કરી છે.

મુખ્યમંત્રી તરીકેના પોતાના પ્રથમ સ્વતંત્રતા દિવસના સંબોધનમાં મુખ્યમંત્રી વિજયે જણાવ્યું હતું કે અંદાજે રૂપિયા ૭૫૫.૮૩ કરોડના જંગી ખર્ચવાળી આ યોજના આગામી ૧૫ સપ્ટેમ્બરથી સત્તાવાર રીતે લાગુ કરવામાં આવશે. આ યોજના હેઠળ સરકારી હોસ્પિટલોમાં જન્મ લેનાર પ્રત્યેક નવજાત શિશુને એક ગ્રામ સોનાની વીંટી અને વિશેષ બેબી વેલકમ કીટ ભેટ સ્વરૂપે આપવામાં આવશે.

સરકાર દ્વારા આ યોજના પાછળનો મુખ્ય ઉદ્દેશ્ય રાજ્યની સરકારી હોસ્પિટલોમાં ડિલિવરીનું પ્રમાણ વધારવાનો તેમજ નવજાત બાળકો અને માતાઓનું સન્માન કરવાનો છે. સત્તાવાર નિવેદન અનુસાર, આ યોજનાથી રાજ્યના ગ્રામીણ અને સામાન્ય પરિવારોને સીધો આર્થિક લાભ મળશે અને સરકારી સ્વાસ્થ્ય સેવાઓ પ્રત્યે લોકોનો વિશ્વાસ વધુ મજબૂત બનશે.

આ ભવ્ય યોજનાના સફળ અમલીકરણ માટે સ્વાસ્થ્ય વિભાગ દ્વારા તડામાર તૈયારીઓ શરૂ કરી દેવામાં આવી છે. આગામી સમયમાં આ યોજનાના માધ્યમથી લાખો પરિવારો લાભાન્વિત થશે અને તમિલનાડુ સરકાર દ્વારા માતૃત્વ તથા બાળ સંભાળ ક્ષેત્રે એક નવો સીમાચિહ્નરૂપ ઇતિહાસ રચવામાં આવશે તેવી અપેક્ષા રાખવામાં આવી રહી છે.