(ચેન્નાઈ): તમિલનાડુના મંદિરોમાં ભક્તો દ્વારા અર્પણ કરવામાં આવતી કરોડોની રાશિ અને તેના રોકાણ અંગે લાંબા સમયથી ચાલી રહેલા કાનૂની સંઘર્ષમાં સરકારે એક મોટું અને રાહતદૂરક વલણ અપનાવ્યું છે. શુક્રવારે રાજ્ય સરકારે મદ્રાસ હાઈકોર્ટ સમક્ષ સ્પષ્ટ કર્યું છે કે, તમિલનાડુ પાવર ફાઇનાન્સ એન્ડ ઇન્ફ્રાસ્ટ્રક્ચર ડેવલપમેન્ટ કોર્પોરેશન (TNPFIC) માં જમા કરાયેલા મંદિરના તમામ ભંડોળ માટે સરકાર 'સાર્વભૌમ ગેરંટી' (Sovereign Guarantee) આપવા તૈયાર છે.
શું હતો સમગ્ર વિવાદ?
હિન્દુ ધાર્મિક અને ચેરિટેબલ એન્ડોમેન્ટ્સ (HR&CE) વિભાગના ભંડોળને સરકારી સંસ્થાઓમાં રોકાણ કરવાના નિર્ણયને લઈને મંદિર કાર્યકર્તા ટી.આર. રમેશે જાહેર હિતની અરજી (PIL) દાખલ કરી હતી. અરજદારની મુખ્ય ચિંતા એ હતી કે, શું મંદિરોનું ભંડોળ આવી સંસ્થાઓમાં રોકવું સુરક્ષિત છે? ખાસ કરીને જ્યારે TANGEDCO જેવી સંસ્થાઓ ખોટમાં ચાલી રહી હોય, ત્યારે ભક્તોના દાનની રકમ જોખમમાં મૂકાઈ શકે છે, તેવો દાવો અરજદારે કર્યો હતો.
સરકારનું સાર્વભૌમ વચન
હાઈકોર્ટમાં દાખલ કરવામાં આવેલા મેમોમાં HR&CE સચિવ જે. કુમારગુરુબરને ખાતરી આપી હતી કે, સરકાર મંદિરોની થાપણોની સલામતીની સંપૂર્ણ જવાબદારી લે છે. ન્યાયાધીશો જી.આર. સ્વામીનાથન અને વી. લક્ષ્મીનારાયણનની ખંડપીઠ સમક્ષ સરકારે સ્પષ્ટ કર્યું હતું કે, "પાકતી મુદત સાથે બાકી ચુકવણી માટે રાજ્ય સરકાર સંપૂર્ણપણે કટિબદ્ધ છે." એટલું જ નહીં, અદાલતના આદેશ બાદ આ ગેરંટીનો વ્યાપ વધારીને તેને માત્ર 'મંદિરો' પૂરતું સીમિત ન રાખતા તમામ 'ધાર્મિક સંસ્થાઓ' સુધી વિસ્તૃત કરવામાં આવ્યો છે.
નાણાકીય સ્થિરતાનો દાવો
સરકારે કોર્ટને એ પણ જણાવ્યું હતું કે, TNPFIC અને તમિલનાડુ ટ્રાન્સપોર્ટ ડેવલપમેન્ટ ફાઇનાન્સ કોર્પોરેશન (TNTDFC) બંનેનો ટ્રેક રેકોર્ડ અત્યંત વિશ્વસનીય રહ્યો છે. સરકારી દસ્તાવેજો મુજબ, અત્યાર સુધી વ્યાજની ચુકવણીમાં એકપણ કેસમાં ડિફોલ્ટ નોંધાયો નથી. વધુમાં, ઇન્ડિયા રેટિંગ્સ દ્વારા TNPFIC ની ફિક્સ્ડ ડિપોઝિટને 'A' રેટિંગ આપવામાં આવ્યું છે, જે તેની આર્થિક સ્થિરતા સાબિત કરે છે.
આગામી સુનાવણી પર નજર
આ મામલે હવે છ અઠવાડિયા પછી સુનાવણી હાથ ધરવામાં આવશે. સરકારે ભલે ગેરંટી આપી દીધી હોય, પરંતુ અરજદાર દ્વારા TNPFIC ના રેટિંગ અને નાણાકીય નુકસાન અંગે ઉઠાવેલા મુદ્દાઓ હવે કોર્ટની વિચારણા હેઠળ રહેશે. હાલ તો આ નિર્ણયથી લાખો ભક્તોમાં એક પ્રકારની રાહતની લાગણી છે કે તેમના દ્વારા અર્પણ કરવામાં આવેલી રાશિ સરકારની સીધી દેખરેખ અને ગેરંટી હેઠળ છે.