મુંબઈ:પશ્ચિમ એશિયામાં ચાલી રહેલા ભીષણ સંઘર્ષ અને ઈરાન પર અમેરિકા-ઈઝરાયલના સંયુક્ત લશ્કરી હુમલાઓ બાદ વૈશ્વિક સ્તરે રાજદ્વારી હિલચાલ તેજ બની છે. આ ગંભીર પરિસ્થિતિ વચ્ચે ફ્રાન્સના રાષ્ટ્રપતિ ઇમેન્યુઅલ મેક્રોને ૧૬ એપ્રિલ, ગુરુવારના રોજ વડાપ્રધાન નરેન્દ્ર મોદી સાથે ટેલિફોન પર વાતચીત કરી હતી. બંને નેતાઓએ પશ્ચિમ એશિયાની વર્તમાન સ્થિતિ અંગે ચર્ચા કરી હતી અને હોર્મુઝની સામુદ્રધુનીમાં વહાણવટાની સુરક્ષા તેમજ સ્વતંત્રતા તાત્કાલિક અસરથી પુનઃસ્થાપિત કરવાની જરૂરિયાત પર સહમતી વ્યક્ત કરી હતી.
વડાપ્રધાન નરેન્દ્ર મોદીએ સોશિયલ મીડિયા પ્લેટફોર્મ X પર આ વાતચીત અંગેની માહિતી આપતા જણાવ્યું હતું કે, "મારા પ્રિય મિત્ર રાષ્ટ્રપતિ ઇમેન્યુઅલ મેક્રોનનો ફોન આવ્યો હતો. અમે પશ્ચિમ એશિયાની સ્થિતિ પર ચર્ચા કરી અને હોર્મુઝની સામુદ્રધુનીમાં નેવિગેશનની સુરક્ષા અને સ્વતંત્રતા પુનઃસ્થાપિત કરવા સંમત થયા છીએ. આ ક્ષેત્રમાં અને તેની બહાર શાંતિ અને સ્થિરતા જાળવવા માટે અમે અમારો ગાઢ સહયોગ ચાલુ રાખીશું."
હોર્મુઝની સામુદ્રધુનીનું મહત્વ અને વર્તમાન સંકટ:
હોર્મુઝની સામુદ્રધુની વિશ્વના સૌથી મહત્વપૂર્ણ શિપિંગ કોરિડોર પૈકીનો એક છે, જ્યાંથી વૈશ્વિક તેલ અને ગેસના વેપારનો મોટો હિસ્સો પસાર થાય છે. આ સાંકડા જળમાર્ગમાં કોઈપણ વિક્ષેપ સમગ્ર વિશ્વના વેપાર, ઊર્જા બજાર, નૂર હેરફેર અને વીમા ખર્ચ પર તાત્કાલિક અસર કરે છે. અમેરિકા અને ઈઝરાયલ દ્વારા ઈરાન પર કરાયેલા લશ્કરી હુમલા બાદ આ માર્ગની સુરક્ષા સામે મોટો ખતરો ઉભો થયો છે, જેને લઈને ભારતે ફ્રાન્સ સાથે મળીને ચિંતા વ્યક્ત કરી છે.
 તેહરાનમાં રાજદ્વારી હિલચાલ અને બીજા રાઉન્ડની વાટાઘાટો:
વડાપ્રધાન મોદી અને રાષ્ટ્રપતિ મેક્રોન વચ્ચેની આ વાતચીત એવા સમયે થઈ છે જ્યારે પાકિસ્તાની સેના પ્રમુખ આસિમ મુનીરની આગેવાનીમાં એક ઉચ્ચ સ્તરીય પ્રતિનિધિ મંડળ બુધવારે તેહરાન પહોંચ્યું હતું. ગયા અઠવાડિયે ઈસ્લામાબાદમાં અમેરિકા અને ઈરાન વચ્ચે થયેલી પ્રથમ રાઉન્ડની મંત્રણા નિષ્ફળ રહ્યા બાદ, હવે બીજા રાઉન્ડની વાટાઘાટો દ્વારા સહમતી સાધવા માટેના પ્રયાસો તેજ કરવામાં આવ્યા છે.
પશ્ચિમ એશિયામાં વધતા જતા તણાવને ઘટાડવા અને વ્યાપારી જહાજોની સુરક્ષા સુનિશ્ચિત કરવા માટે ભારત અને ફ્રાન્સ સહિત વિશ્વના અનેક દેશો હવે સક્રિય બન્યા છે. બંને નેતાઓએ પ્રદેશમાં શાંતિ સ્થાપવા માટે સતત સંપર્કમાં રહેવાનો અને સહયોગ મજબૂત કરવાનો નિર્ધાર વ્યક્ત કર્યો છે.