દક્ષિણ ઇટાલીના દરિયાકાંઠાના વિસ્તારોમાં એક શક્તિશાળી ભૂકંપ આવ્યો હતો. જર્મન રિસર્ચ સેન્ટર ફોર જીઓસાયન્સિસ (GFZ) અનુસાર, ભૂકંપની તીવ્રતા રિક્ટર સ્કેલ પર 6.1 હતી. હાલમાં કોઈ નુકસાનના અહેવાલ નથી. જર્મન રિસર્ચ સેન્ટર ફોર જીઓસાયન્સિસ અનુસાર, ભૂકંપનું કેન્દ્ર જમીનથી આશરે 253 કિલોમીટર (157.21 માઇલ) ઊંડાઈએ સ્થિત હતું.

   જર્મન રિસર્ચ સેન્ટર ફોર જીઓસાયન્સિસે આપેલા અહેવાલ અનુસાર, ભૂકંપ મંગળવારે સવારે (સોમવારે 2212 GMT) સ્થાનિક સમય મુજબ 00:12 કલાકે આવ્યો હતો, જેનું કેન્દ્રબિંદુ દક્ષિણ કેલેબ્રિયા ક્ષેત્રના દરિયાકાંઠે સમુદ્રમાં હતું. સ્થાનિક મીડિયાના અહેવાલ અનુસાર, કેલેબ્રિયા, સિસિલી, કેમ્પાનિયા અને પુગ્લિયા સહિત દક્ષિણ ઇટાલીના ઘણા પ્રદેશોમાં ભૂકંપના આંચકા અનુભવાયા હતા. અત્યાર સુધી કોઈ જાનહાનિ કે મોટા નુકસાનીના સમાચાર આવ્યા નથી. સ્થાનિક અધિકારીઓ પરિસ્થિતિ પર નજર રાખી રહ્યા છે

   આ વર્ષની શરૂઆતમાં, જાન્યુઆરીમાં ઇટાલીના દક્ષિણ છેડા નજીક આયોનિયન સમુદ્રમાં 5.1 ની તીવ્રતાનો ભૂકંપ આવ્યો હતો, જેનાથી માલ્ટાનો મોટો ભાગ હચમચી ગયો હતો. યુરો-મેડિટેરેનિયન સિસ્મોલોજીકલ સેન્ટર અનુસાર, ભૂકંપ 58 કિલોમીટરની ઊંડાઈએ આવ્યો હતો અને દક્ષિણ ઇટાલીના રેજિયો કેલેબ્રિયાના દરિયાકાંઠેથી લગભગ 62 કિલોમીટર દૂર હતો.