પાકિસ્તાનના કબજા હેઠળના કાશ્મીરમાં હાલમાં સ્થિતિ અત્યંત ગંભીર બની ગઈ છે. પાકિસ્તાન સરકાર દ્વારા કરવામાં આવેલી અત્યાચારી કાર્યવાહી અને 600 થી વધુ નાગરિક અધિકાર કાર્યકર્તાઓની ધરપકડ બાદ, સ્થાનિક લોકોનો ગુસ્સો હવે રસ્તા પર ઉતરી આવ્યો છે. લોકો માત્ર પાકિસ્તાન સરકારનો વિરોધ જ નથી કરી રહ્યા, પરંતુ ખુલ્લેઆમ ભારત પાસે મદદની માંગણી કરી રહ્યા છે.

સ્થાનિક સંસ્થા જૉઇન્ટ અવામી એક્શન કમિટી (JAAC) દ્વારા આ આંદોલનનું નેતૃત્વ કરવામાં આવી રહ્યું છે. આ આંદોલનની શરૂઆત ત્યારે થઈ જ્યારે પ્રમુખ નેતા શૌકત નવાજ મીરની ધરપકડ કરવામાં આવી. આ ધરપકડ બાદ લોકોમાં રોષ ભભૂકી ઉઠ્યો છે. JAACના સભ્યોએ પાકિસ્તાની શાસન સામે ખુલ્લો પડકાર ફેંકતા કહ્યું છે કે- આજે અમારા નેતાઓને જેલમાં પૂરવામાં આવ્યા છે, પરંતુ ગુલામીની સાંકળો હવે તૂટવી જ જોઈએ.

સોશિયલ મીડિયા પર JAACના મુખ્ય સભ્ય સરદાર અમન ખાનનો એક વિડિયો ખૂબ જ વાયરલ થઈ રહ્યો છે. આ વિડિયોમાં તેઓ ભીડને સંબોધતા ભાવુક થઈ ગયા હતા અને પાકિસ્તાનના દમનકારી શાસનની પોલ ખોલી હતી. તેમણે સ્પષ્ટ શબ્દોમાં કહ્યું- અહીં રાશનની અછત છે, દવાઓ મળતી નથી. અમે પૂંછ, રાજૌરી, ડોડા અને સમગ્ર સરહદ પારના લોકોથી અપીલ કરીએ છીએ કે અમને તમારી મદદની જરૂર છે.

આ આંદોલન હવે માત્ર વિરોધ પૂરતું મર્યાદિત નથી રહ્યું. લોકો હવે પાકિસ્તાનના નિયંત્રણમાંથી બહાર નીકળવા માટે તત્પર છે. સરદાર અમન ખાને પ્રદર્શનકારીઓને સંબોધતા પૂછ્યું હતું કે- શું આપણે સીઝફાયર લાઈન (LoC)ની તરફ આગળ વધવું જોઈએ? જેના જવાબમાં હાજર હજારોની મેદનીએ એકસૂરે હા કહી હતી. આ ઘટના દર્શાવે છે કે PoKના લોકો હવે પાકિસ્તાનની સરહદોને માનવા તૈયાર નથી.

પાકિસ્તાની અધિકારીઓની ધમકીઓને નકારી કાઢતા અમન ખાને કહ્યું કે- જો તમને લાગે છે કે અમને ગોળીઓ મારીને તમે ડરાવી શકશો, તો તમે ભૂલ કરો છો. અમારી પાસે પણ વિકલ્પો છે. તમે વફાદારી બતાવશો તો અમે વફાદારી બતાવીશું, અને જો તમે ક્રૂરતા બતાવશો, તો અમે પણ તે જ ભાષામાં જવાબ આપીશું.

તેમણે સ્પષ્ટ કર્યું કે કાશ્મીરના લોકો હવે પાકિસ્તાનના દબાણમાં રહેવા માંગતા નથી. છેલ્લા એક મહિનાથી PoKના લોકો જે પ્રકારના જુલમ અને દબાણનો સામનો કરી રહ્યા છે, તેનો આ વિસ્ફોટ છે.

આ સમગ્ર ઘટના પાકિસ્તાન સરકાર માટે એક મોટી મુસીબત બની રહી છે. એક તરફ આર્થિક સંકડામણ અને બીજી તરફ સ્થાનિકોનો સતત વધી રહેલો વિરોધ, પાકિસ્તાનના શાસકો માટે મુશ્કેલ પરિસ્થિતિ ઉભી કરી રહ્યો છે. ભારત પાસે મદદની આ માંગણીએ આંતરરાષ્ટ્રીય સ્તરે પણ ધ્યાન ખેંચ્યું છે.