(સુરેશ ડુગ્ગર દ્વારા) જમ્મુ : કાશ્મીરમાં સક્રિય આતંકવાદી સંગઠનો હવે પોતાની પરંપરાગત રણનીતિ બદલીને શહેરી વિસ્તારોને પોતાના નવા હુમલાના સ્થળ બનાવી રહ્યા હોવાનો ખુલાસો વરિષ્ઠ પોલીસ અધિકારીઓએ કર્યો છે. બુધવારે અનંતનાગના લાલ ચોકમાં અમરનાથ યાત્રાની ડ્યુટી પર તૈનાત એક પોલીસ જવાનની અત્યંત નજીકથી ગોળી મારીને કરવામાં આવેલી હત્યા બાદ ગુપ્તચર એજન્સીઓના આ આકલનને વધુ બળ મળ્યું છે. આતંકી જૂથો હવે લાંબી ચાલતી સામસામેની ગોળીબારની સરખામણીએ શહેરી અને ભીડભાડવાળા વિસ્તારોમાં ઝડપી તથા લક્ષિત ગોળીબાર (ટાર્ગેટ કિલિંગ)ને વધુ પ્રાથમિકતા આપી રહ્યા છે.

વરિષ્ઠ પોલીસ અધિકારીઓના જણાવ્યા મુજબ, આ નવી વ્યૂહરચનાનો મુખ્ય હેતુ સુરક્ષા દળો સાથે સીધા સંઘર્ષથી બચીને વિસ્તારમાં સ્થપાયેલી 'સામાન્ય સ્થિતિ'ના પ્રતીકો પર પ્રહાર કરવાનો છે. ગુપ્તચર માહિતી પરથી એ પણ સામે આવ્યું છે કે આતંકી સરગનાઓએ પોતાના ગુમાસ્તાઓને અમરનાથ યાત્રા દરમિયાન ઝડપી હુમલા કરીને તુરંત ભાગી જવાની સૂચના આપી હતી, જેથી રાષ્ટ્રીય સ્તરે ધ્યાન ખેંચી શકાય. અનંતનાગની ઘટનાને તપાસકર્તાઓ આતંકવાદના પુનરુત્થાન તરીકે જોવાને બદલે બદલાયેલી રણનીતિના એક ભાગ તરીકે મૂલવી રહ્યા છે.

એક ઉચ્ચ પોલીસ અધિકારીએ વિગત આપતાં જણાવ્યું હતું કે, છેલ્લા કેટલાક મહિનાઓથી મળેલી વિગતો વ્યૂહરચનામાં ફેરફાર તરફ ઈશારો કરતી હતી અને તાજેતરની ઘટના તે જ પેટર્નમાં બેસે છે. આવા હુમલાઓનો હેતુ હવે મોટા પાયે લોકોને જાનહાનિ પહોંચાડવાનો નથી, પરંતુ સરકારના 'સામાન્ય પરિસ્થિતિ'ના દાવા સાથે જોડાયેલા પ્રતીકો જેવા કે જાહેર સ્થળોએ તૈનાત સુરક્ષાકર્મીઓ અને વ્યસ્ત બજારોને નિશાન બનાવવાનો છે. તેનાથી આતંકીઓને લાંબા સંઘર્ષ વગર વધુ પબ્લિસિટી મળી રહે છે.

જોકે, અધિકારીઓએ સ્પષ્ટ કર્યું હતું કે આ ઘટનાથી અમરનાથ યાત્રાની મુખ્ય સુરક્ષા વ્યવસ્થામાં કોઈ ગાબડું પડ્યું હોવાનું સાબિત થતું નથી, કારણ કે આતંકીઓનું નિશાન મુખ્ય યાત્રાધામ રૂટ નહીં પરંતુ જાહેર વિસ્તારમાં તૈનાત એક પોલીસ જવાન હતો. કાશ્મીરમાં આતંકવાદ વિરોધી સતત ચાલતા સઘન અભિયાનોને કારણે આતંકી નેટવર્ક અત્યંત નબળું પડ્યું છે, ઘૂસણખોરીના માર્ગો બંધ કરી દેવાયા છે અને તેમનું ઓપરેશનલ ક્ષેત્ર મર્યાદિત બની ગયું છે.

છેલ્લા કેટલાક વર્ષોમાં સ્થાનીય સ્તરે આતંકી ભરતીમાં આવેલો ભારે ઘટાડો પણ આ વ્યૂહરચના બદલવા માટે જવાબદાર છે, જેના કારણે આતંકી જૂથો માટે મોટા સંગઠનો જાળવવાનું મુશ્કેલ બન્યું છે. પરિણામે, હવે ગુપ્તચર એજન્સીઓ એક કે બે વ્યક્તિ ધરાવતા નાના મોડ્યુલ્સ પર ધ્યાન કેન્દ્રિત કરી રહી છે, જેમને ઓછી સામગ્રીની જરૂર પડે છે પરંતુ તેઓ ચોક્કસ હુમલા કરીને માનસિક રીતે મોટો પ્રભાવ પાડી શકે છે. સ્થિતિમાં મોટો સુધારો આવ્યો છે પરંતુ આ નાના જૂથોના ચુનંદા હુમલાઓ સામે સુરક્ષા દળો વધુ સતર્ક બન્યા છે.