જોધપુર : ભારતને અમેરિકાનું અત્યાધુનિક પાંચમી પેઢીનું સ્ટેલ્થ ફાઈટર જેટ F-35 વેચવા અંગે હજુ સુધી કોઈ સત્તાવાર દરખાસ્ત મળી નથી. બીજી તરફ, રશિયાના પાંચમી પેઢીના ફાઈટર જેટ Su-57ને ખરીદવા અથવા તેની ક્ષમતાઓનું મૂલ્યાંકન કરવા અંગે પણ ભારતે હજુ સુધી અંતિમ નિર્ણય લીધો નથી. જોધપુરમાં આયોજિત બહુરાષ્ટ્રીય હવાઈ કવાયત ‘તરંગ શક્તિ-2026’ ના સમાપન પ્રસંગે પત્રકારો સાથે વાતચીત દરમિયાન ભારતીય વાયુસેનાના વડા એર ચીફ માર્શલ એપી સિંહે સ્પષ્ટતા કરી ભારતનું સત્તાવાર વલણ રજૂ કર્યું હતું.

અમેરિકાના F-35 વિમાનની સંભવિત ખરીદી અંગે પૂછવામાં આવેલા પ્રશ્નના જવાબમાં વાયુસેના પ્રમુખે રમૂજી અંદાજમાં જણાવ્યું કે, "તમારા લોકો તો અમને વિમાનની નજીક પણ જવા દેતા નથી અને તમે અમને તે વેચવાની વાત કરો છો." તેમની આ ટિપ્પણી અમેરિકાના આધુનિક વિમાનની ખરીદી અંગે ચાલતી વિવિધ અટકળો વચ્ચે આવી છે. અત્રે નોંધનીય છે કે આ પત્રકાર પરિષદમાં અમેરિકન વાયુસેનાની પેસિફિક એર ફોર્સિસ (PACAF) ના કમાન્ડર પણ ઉપસ્થિત હતા, જેમની હાજરીમાં એર ચીફ માર્શલે વિમાન વેચવા અંગે કોઈ સત્તાવાર પ્રસ્તાવ મળ્યો ન હોવાની વાત સ્પષ્ટ કરી હતી.

રશિયાના Su-57 લડાકુ વિમાન અંગે એપી સિંહે જણાવ્યું કે, આ વિમાન માટે રશિયા તરફથી પ્રસ્તાવ આપવામાં આવ્યો હોવાની તેમને જાણકારી છે, પરંતુ ભારતીય વાયુસેના તેનું મૂલ્યાંકન કરશે કે નહીં તે હજુ નક્કી થયું નથી. તેમણે સ્પષ્ટ કર્યું કે સરકાર તરફથી કોઈ દિશા-નિર્દેશ મળ્યા બાદ જ વાયુસેના ચકાસશે કે Su-57 ભારતની સંરક્ષણ અને કામગીરી સંબંધિત જરૂરિયાતોને કેટલી હદે પૂર્ણ કરી શકે છે. આથી સરકારી સ્તરે નિર્ણય લેવાયા બાદ જ આગળનું મૂલ્યાંકન શરૂ થશે.

ભારત પોતાની ભવિષ્યની સંરક્ષણ જરૂરિયાતોને પહોંચી વળવા પાંચમી પેઢીના સ્વદેશી લડાકુ વિમાન (AMCA) ના વિકાસ પર પણ ઝડપથી કામ કરી રહ્યું છે, જે આત્મનિર્ભરતા તરફ એક મોટું કદમ છે. ઉલ્લેખનીય છે કે જોધપુરમાં યોજાયેલી ‘તરંગ શક્તિ-2026’ કવાયતમાં ભારત સહિત આઠ દેશોની વાયુસેનાઓએ ભાગ લીધો હતો. આગામી સમયમાં ભારતીય વાયુસેના પોતાની યુદ્ધક્ષમતા વધારવા માટે સ્વદેશી ઉત્પાદન અને વૈશ્વિક વિકલ્પોની સમીક્ષા કરીને યોગ્ય કાનૂની તેમજ વ્યૂહાત્મક પગલાં લેશે.