વોશિંગ્ટન:અમેરિકાના પ્રમુખ ડોનાલ્ડ ટ્રમ્પે વૈશ્વિક રાજદ્વારી ગલિયારાઓમાં ખળભળાટ મચાવતા એક મોટા નિર્ણયમાં પોતાના વિશેષ પ્રતિનિધિઓની પાકિસ્તાન મુલાકાત રદ કરી દીધી છે. ઈરાન સાથે ચાલી રહેલા સંઘર્ષને ડામવા અને મધ્ય પૂર્વમાં શાંતિ સ્થાપવા માટે પાકિસ્તાન જે મધ્યસ્થીની ભૂમિકા ભજવી રહ્યું હતું, તેને ટ્રમ્પે એકાએક મોટો ઝટકો આપ્યો છે. ટ્રમ્પે સ્પષ્ટ શબ્દોમાં જણાવ્યું છે કે અમેરિકા અત્યારે મજબૂત સ્થિતિમાં છે અને નકામી ચર્ચાઓ માટે તેના પ્રતિનિધિઓએ લાંબી મુસાફરી કરવાની કોઈ જરૂર નથી.

'અમારી પાસે બધા જ પત્તા છે' - ટ્રમ્પનો આક્રમક મિજાજ:

ફોક્સ ન્યૂઝના અહેવાલ મુજબ, અમેરિકાના પ્રતિનિધિઓ પાકિસ્તાન જવા માટે રવાના થઈ રહ્યા હતા તે જ સમયે ટ્રમ્પે તેમને અટકાવ્યા હતા. એક ફોન કોલ દરમિયાન ટ્રમ્પે જણાવ્યું કે, "મેં મારા લોકોને થોડીવાર પહેલા જ કહી દીધું કે તમારે જવાની જરૂર નથી. માત્ર નકામી વાતો કરવા માટે ૧૮ કલાકની ફ્લાઈટ ખેડીને ત્યાં જવાનો કોઈ અર્થ નથી. અત્યારે બધી બાજી આપણા હાથમાં છે. ઈરાનને જ્યારે પણ વાત કરવી હોય ત્યારે તે આપણને ગમે ત્યારે ફોન કરી શકે છે, પરંતુ આપણે હવે આવી લાંબી મુસાફરીઓ કરીને બેસી રહેવાની જરૂર નથી."

ઈરાની વિદેશ મંત્રીની પાકિસ્તાન મુલાકાત અને મધ્યસ્થતાનો પ્રયાસ:

બીજી તરફ, ઈરાનના વિદેશ મંત્રી અબ્બાસ અરાઘચીએ શનિવારે જ પાકિસ્તાનની પોતાની રાજદ્વારી મુલાકાત પૂર્ણ કરી છે. તેમણે પાકિસ્તાનના વડાપ્રધાન શેહબાઝ શરીફ, વિદેશ મંત્રી ઈશાક ડાર અને આર્મી ચીફ અસીમ મુનીર સાથે મહત્વની બેઠકો યોજી હતી. પાકિસ્તાન આ યુદ્ધવિરામ માટે મુખ્ય મધ્યસ્થી તરીકે ઉભરી રહ્યું હતું. અરાઘચીએ પાકિસ્તાનના પ્રયાસોની પ્રશંસા કરી હતી પરંતુ સાથે જ ઈરાન પર લાદવામાં આવેલા યુદ્ધને રોકવા માટે પોતાની સૈદ્ધાંતિક શરતો પણ રજૂ કરી હતી. ઈશાક ડારે જણાવ્યું હતું કે ઈરાની પ્રતિનિધિમંડળ સાથે બે કલાક લાંબી ચર્ચા ચાલી હતી, જેમાં પાકિસ્તાને સંવાદ અને મુત્સદ્દીગીરી પર ભાર મૂક્યો હતો.

અમેરિકી પ્રતિનિધિઓ પાકિસ્તાન આવવાના હતા:

અગાઉ વ્હાઇટ હાઉસના પ્રેસ સેક્રેટરી કેરોલિન લેવિટે સંકેત આપ્યો હતો કે અમેરિકાના પ્રતિનિધિઓ સ્ટીવ વિટકોફ અને જેરેડ કુશ્નર પાકિસ્તાન જશે. ઈરાને પોતે રૂબરૂ વાતચીત માટે ઈચ્છા વ્યક્ત કરી હોવાનું જણાવાયું હતું. અગાઉ ઉપરાષ્ટ્રપતિ જેડી વેન્સ પણ બે અઠવાડિયા પહેલા પાકિસ્તાનમાં વાટાઘાટોનું નેતૃત્વ કરી ચુક્યા હતા. જોકે, ઈરાનના સરકારી મીડિયાએ અગાઉ જ સ્પષ્ટ કર્યું હતું કે અરાઘચીનો અમેરિકી અધિકારીઓને મળવાનો કોઈ કાર્યક્રમ નથી અને પાકિસ્તાન માત્ર એક કડી (ચેનલ) તરીકે કામ કરશે.

આગામી રણનીતિ: રશિયા અને ઓમાનની મુલાકાતે અરાઘચી:

૨૮ ફેબ્રુઆરીથી શરૂ થયેલા આ ભયાનક સંઘર્ષને રોકવા માટે હવે ઈરાની વિદેશ મંત્રી ઓમાન અને રશિયાની મુલાકાતે જવાના છે. પાકિસ્તાનના વિદેશ મંત્રાલયે આ મુલાકાતને પ્રાદેશિક શાંતિ અને સ્થિરતા માટેના પ્રયાસ ગણાવ્યા છે. જોકે, ટ્રમ્પના આ આકરા વલણ બાદ મધ્યસ્થતાની પ્રક્રિયામાં પાકિસ્તાનની ભૂમિકા નબળી પડી હોય તેવું જણાય છે, કારણ કે ટ્રમ્પે હવે સીધા સંવાદ અને અમેરિકાની શરતો પર વધુ ભાર મૂકવાનું નક્કી કર્યું છે.