મુંબઈ, તા.30: માયાનગરી મુંબઈની રફ્તાર પર ગઈકાલે બુધવારે જાણે બ્રેક લાગી ગઈ હતી. મુંબઈને નવી મુંબઈ સાથે જોડતા અત્યંત વ્યસ્ત એવા સાયન-પનવેલ હાઈવે પર સર્જાયેલા મેગા જામને કારણે હજારો લોકો કલાકો સુધી રસ્તા પર ભૂખ્યા-તરસ્યા ફસાયેલા રહ્યા હતા. સ્થિતિ એવી ગંભીર હતી કે જે રસ્તો પસાર કરવામાં સામાન્ય રીતે 12 થી 15 મિનિટ લાગે છે, ત્યાં લોકોને 5 થી 6 કલાક સુધી રાહ જોવી પડી હતી.
કેવી રીતે સર્જાયો આ અકસ્માત?
આ આખી આફતની શરૂઆત મંગળવારે રાત્રે 11 વાગ્યે થઈ હતી. માનખુર્દ વિસ્તારમાં ફ્લાયઓવરના બાંધકામ માટે વપરાતી એક વિશાળ ઉત્ખનન (Excavation) મશીન અચાનક સંતુલન ગુમાવતા રોડ પર પલટી ગઈ હતી. ઉબડ-ખાબડ જમીનને કારણે મશીન પલટતા હાઈવેનો મુખ્ય માર્ગ બંધ થઈ ગયો હતો. આ અકસ્માત અને ત્યારબાદ સર્જાયેલી અફરાતફરીમાં એક પોલીસકર્મીએ પોતાનો જીવ ગુમાવ્યો હોવાના દુખદ સમાચાર પણ સામે આવ્યા છે.
તંત્રની ધીમી કામગીરી અને લોકોની હાલાકી
હાઈવે પર પડેલા આ મહાકાય મશીનને હટાવવામાં વહીવટી તંત્રના પસીના છૂટી ગયા હતા. આશા હતી કે રાતોરાત રસ્તો સાફ થઈ જશે, પરંતુ કામગીરી બુધવાર બપોર સુધી ખેંચાઈ હતી. મશીનને ઉંચકવા માટે બીજી મોટી ક્રેન બોલાવતા ટ્રાફિકની સમસ્યા વધુ જટિલ બની હતી અને ચેમ્બુરથી માનખુર્દ સુધી વાહનોની લાંબી લાઈનો લાગી ગઈ હતી. કિલોમીટરો સુધી માત્ર હેડલાઈટ્સનો દરિયો જ જોવા મળતો હતો.
વીડિયો બનાવી ઠાલવ્યો રોષ
જામમાં ફસાયેલા મુસાફરોએ સોશિયલ મીડિયા પર વીડિયો શેર કરીને પોતાની આપવીતી જણાવી હતી. અનેક લોકોએ મુંબઈના ટ્રાફિક મેનેજમેન્ટ અને ઈન્ફ્રાસ્ટ્રક્ચર સામે સવાલો ઉઠાવ્યા હતા. લોકોએ જણાવ્યું કે એમ્બ્યુલન્સ પણ આ જામમાં ફસાઈ ગઈ હતી. જોકે, લેટેસ્ટ રિપોર્ટ્સ અનુસાર, ગુરુવાર સવાર સુધીમાં મશીન હટાવી લેવામાં આવ્યું છે અને હવે ટ્રાફિકની સ્થિતિ ધીમે ધીમે સામાન્ય થઈ રહી છે, પરંતુ ગઈકાલનો આ અનુભવ મુંબઈગરાઓ માટે કોઈ દુઃસ્વપ્નથી ઓછો નહોતો.